İran Milli Təhlükəsizlik Şurası növbəti 24 saat ərzində Fars körfəzində ciddi hərbi eskalasiya barədə xəbərdarlıq edib.

Reyting.az xəbər verir ki, məlumatı “Banking News” yayıb.

Qeyd olunur ki, Milli Təhlükəsizlik Şurasının katibi Əli Şamxaninin “ABŞ əsgərləri ailələri ilə vidalaşmalıdır”,- açıqlaması beynəlxalq ictimaiyyətdə böyük ajiotaj yaradıb.

İran İnqilab Keşikçiləri Korpusu Hörmüz boğazı üzərində tam nəzarətini təsdiqləyib və qonşu ölkələrə xəbərdarlıq edib: İrana qarşı hava məkanından, qurudan və ya dəniz ərazilərindən hər hansı bir istifadə “düşmənçilik aktı” hesab ediləcək.

Bundan başqa, İran 27-29 yanvar tarixləri arasında Hörmüz boğazı ətrafında canlı atəşlə hərbi təlimlər keçirəcəyini elan edən xəbər yayıb. Eyni dövrdə ABŞ Mərkəzi Komandanlığı (CENTCOM) Yaxın Şərqdə çoxgünlük və genişmiqyaslı hava təlimi elan edib.

İsrail baş naziri Benyamin Netanyahu ABŞ-nın hücum ehtimalını nəzərə alaraq, İranın İsrailə hücumunun ciddi bir səhv olacağını deyərək, belə bir halda “İran əvvəllər heç görmədiyi bir qüvvə ilə qarşılaşacaq”,- deyə hədələyib.

V. QULİYEV