Şimali Koreya casusları “Amazon” onlayn ticarət şəbəkəsinə sızmağa cəhd göstərirlər.

Reyting.az xəbər verir ki, bu barədə şirkətin rəhbər şəxsləri məlumat veriblər.

“Amazon”un təhlükəsizlik üzrə rəhbəri Stiven Şmidt Şimali Koreya agentlərinə aid olduğu ehtimal edilən 1800-dən çox iş müraciətinin saxta şəxsiyyətlər və “noutbuk fermaları” vasitəsilə edildiyinə görə bloklandığını açıqlayıb.

Stiven Şmidt sosial şəbəkə paylaşımında bildirib ki, Şimali Koreya vətəndaşları oğurlanmış və ya saxta şəxsiyyət vəsiqələrindən istifadə edərək uzaqdan İT vəzifələrinə müraciət etməyə çalışırlar: “Onların məqsədi adətən olduqca sadədir: işi əldə etmək, maaş almaq və bu gəliri rejimin silah proqramlarını maliyyələşdirmək üçün Pxenyana köçürmək”.

Bundan əvvəl ABŞ və Cənubi Koreya rəsmiləri Şimali Koreya agentlərinin onlayn fırıldaqçılıq fəaliyyəti ilə məşğul olduqları barədə xəbərdarlıq ediblər.

Şmidtin sözlərinə görə, son bir il ərzində “Amazon”a Şimali Koreya mənşəli iş müraciətlərinin sayında təxminən üçdə bir artım müşahidə olunub.

O qeyd edib ki, bu operatorlar tez-tez “noutbuk fermaları”nı idarə edən şəxslərlə əməkdaşlıq edirlər. Bu termin ABŞ ərazisində yerləşən, lakin xaricdən uzaqdan idarə olunan kompüter şəbəkələrinə aid edilir.

ABŞ Ədliyyə Nazirliyinin (ƏN) məlumatına görə, həmin şəxslər Şimali Koreya vətəndaşlarının ABŞ-da iş tapmasına kömək etmək məqsədilə amerikalılara məxsus oğurlanmış və ya saxta şəxsiyyət məlumatlarından istifadə ediblər.

Nazirlik həmçinin Şimali Koreya operatorları üçün iş təşkil edən ABŞ vətəndaşı olan vasitəçilərə qarşı da ittiham irəli sürüb.

Xatırladaq ki, bu ilin iyul ayında Arizona ştatından olan bir qadın Şimali Koreyalı İT işçilərinə 300-dən çox ABŞ şirkətində uzaqdan iş tapmağa imkan verən “noutbuk ferması”nı idarə etdiyinə görə səkkiz ildən artıq həbs cəzasına məhkum edilib.

Ədliyyə Nazirliyinin məlumatına görə, bu sxem nəticəsində həm qadın, həm də Pxenyan rejimi 17 milyon dollardan (12,6 milyon funt sterlinqdən) çox qanunsuz gəlir əldə edib.

V. QULİYEV