Qobustan rayonunda saz və gitara ifa edən musiqiçi Rauf Cəbrayılov inzibati qayda pozuntusuna görə həbs olunub.

“Qaynarinfo”-nun məlumatına görə, Qobustan rayonu, Nərimankənd kənd sakini, 2001-ci il təvəllüdlü Rauf Cəbrayılov İnzibati Xətalar Məcəlləsinin 388-1.1.1-ci maddəsi ilə nəzərdə tutulan inzibati xətanı törətməkdə təqsirli bilinib və məhkəmənin hökmü ilə 20 gün müddətinə həbs edilib.

R. Cəbrayılov "TikTok” sosial şəbəkəsində "rauf music” adlı hesabından istifadə edərək musiqiçi kimi iştirak etdiyi tədbirlərdən videolar paylaşıb. Lakin təxminən iki həftə əvvəl sərxoş vəziyyətdə "TikTok” hesabında canlı yayım açıb və bu zaman etikadan kənar ifadələr işlədib. Daha sonra, heç bir aidiyyəti olmadığı təqdirdə benzinin qiymətini qaldıran şəxslər barəsində əxlaqa uyğun olmayan ifadələrdən istifadə edib.

R. Cəbrayılov məhkəmədə bildirib ki, həmin vaxt sərxoş olduğu üçün inzibati xəta törətdiyini dərk etməyib və ona həbslə bağlı olmayan inzibati tənbehin tətbiq edilməsini xahiş edib.

Qeyd edək ki, R. Tağıyev bir neçə il əvvəl fəaliyyətini dayandıran "Lider TV"də saz musiqi yarışmasının iştirakçısı olub.