"Azərbaycan "ADEX 2014" müdafiə sənayesi sərgisində 27 məhsulla təmsil olunmuşdusa, builki sərgidə bu göstərici 260-dan çox olacaq".

Bunu müdafiə sənayesi nazirinin müavini Yəhya Musayev deyib.

Onun sözlərinə görə, bu il sərgidə nümayiş olunacaq açıq havada olan platformanın əhatə dairəsi də genişlənib: "Nazirliyə aid bütün məhsulların hamısı nə qədər mümkündürsə göstəriləcək və məlumat veriləcək".

Nazir müavini əlavə edib ki, sərgi çərçivəsində həmçinin bir sıra müqavilələrin imzalanması da nəzərdə tutulub. (Report)

Reyting.az-ın xəbərinə görə, nazir müavini jurnalistlərə açıqlamasında deyib ki, Azərbaycanın heç bir ölkədən pulsuz silah-sursat almasına ehtiyac yoxdur.

Y.Musayev bildirib ki, Azərbaycanın xarici ölkələrdən müasir texnologiyalar alıb silah-sursat istehsal etməyə gücü var: "Biz ordumuzu kifayət qədər silah-sursat, döyüş texnikası ilə təmin etməyə qadirik".

Y.Musayev qeyd edib ki, Ermənistanda keçirilən parad sadəcə parodiya olub.

Nazirlik rəsmisi Ermənistandakı "İskəndər M" raketlərinə bərabər kompleksin Pakistandan alınması üçün danışıqların aparılması ilə bağlı sualı cavablayarkən vurğulayıb ki, Azərbaycan Müdafiə Sənayesi Nazirliyi istehsalçıdır və silah-sursat almır: "Bu sualı Müdafiə Nazirliyinə ünvanlasanız, daha yaxşı olar".

O, həmçinin bildirib ki, Azərbaycanın istehsal etdiyi məmulatlara olan tələbatın çoxluğundan bəzi sifarişlərdən imtina edilir: "Qısa müddətdə istehsal etməyə vaxtımız və imkanımız yoxdur. Müraciətlər əsasən Avropa, Afrika və Asiya ölkələrindəndir. Onlar ən çox döyüş sursatları, silahlar almaq istəyirlər. Silahlarımız rəqabətli, keyfiyyətlidir və həmin məmulatlar dünya bazarındakı qiymətlərə uyğun satılır".