Fatma Yıldırım: “Ermənistan növbəti dəfə hərbi cinayət törədir”

“30 ilə yaxın işğal altında saxladığı Azərbaycan torpaqlarını xarabalığa çevirən, kəndlərimizi, şəhərlərimizi yerlə-yeksan edən ermənilər Vətən müharibəsində məğlub olduqdan sonra da öz mənfur xislətlərinə uyğun davranışlarını davam etdirirlər. Belə ki, təcavüzkar ölkə vaxtilə işğal altında saxladığı torpaqlara, o cümlədən mülki təyinatlı infrastrukturlara minalar yerləşdirib. Lakin işğaldan azad edilmiş Azərbaycan torpaqlarına basdırılmış minaların xəritələri hələ də Azərbaycana verilməyib. Bu isə beynəlxalq konvensiyalara ziddir”.

Reyting.az xəbər verir ki, bu fikirləri Modern.az-a Milli Məclisin deputatı Fatma Yıldırım deyib.

Fatma Yıldırım bildirib ki, Ermənistan Azərbaycan ərazilərində basdırdığı minaların xəritələrini təqdim etməkdən boyun qaçırmaqla növbəti hərbi cinayət törədir:

“10 noyabr razılaşması ilə döyüş əməliyyatları dayandırılandan indiyə qədər həm hərbçilərimiz, həm də mülki insanlarımız mina partlayışları nəticəsində həlak olublar, ağır yaralanıblar. Son 4 ay ərzində 40-a yaxın mülki şəxs azad edilmiş ərazilərdə minaya düşərək həlak olub və ya ağır yaralanıb. Minalar hərbi təyinatı üzrə deyil, mülki infrastruktur təyinatlı ərazilərdə basdırılıb. Onlar bunu məqsədli şəkildə ediblər, məqsəd də, təbii ki, daha çox insanın həlak olmasıdır. Azərbaycan 10 noyabr Bəyanatına əsasən bütün işlərin həyata keçirilməsinə şərait yaratsa da, bir çox məsələlərdə humanistlik göstərsə də, Ermənistan tərəfi bunun əksini nümayiş etdirir. Yəni Ermənistan öz təxribatlarını, cinayət əməllərini davam etdirir. Beynəlxalq qanunlara əsasən, Ermənistan bu xəritələri qarşı tərəfə təqdim etməlidir. Xəritələri verməkdən boyun qaçırmaq beynəlxalq hərbi cinayətdir”.

Deputatın sözlərinə görə, 1999-cu ildə qəbul olunmuş beynəlxalq Konvensiyaya əsasən piyadalara qarşı minaların tətbiqi qadağan edilib: “Amma bütün bunlar bir daha Ermənistanın faşist ideologiyasına xidmət etdiyini təsdiqləyir. Fikrimcə, beynəlxalq təşkilatlar minalanmış ərazilərin xəritələrinin Azərbaycana verilməməsinə qarşı etiraz səsini ucaltmalıdır. Amma təəssüf ki, dünya ictimaiyyəti bu məsələdə Ermənistana təzyiq göstərmir. Əgər belə bir addımı biz atmış olsaydıq, beynəlxalq təşkilatların, dövlətlərin ölkəmizə qarşı çoxlu sayda bəyanatlarının şahidi olardıq. Ermənistanın bu hərbi cinayətinə nəyə görə beynəlxalq təşkilatlar, böyük dövlətlər susur? Bu onların növbəti ikili standartlarının göstəricisidir. Belə hallar yolveriməzdir. Beynəlxalq birliyin, müvafiq beynəlxalq təşkilatların bu ciddi məsələ ilə bağlı susqunluğu çoxlu sayda günahsız insanların minaların qurbanı olmasına səbəb olur. Ona görə də, dünya ictimaiyyəti və dövlətləri Ermənistana təzyiq göstərməlidir ki, belə hallar bir daha təkrarlanmasın, günahsiz insanlarımız həlak olmasın".

Ana səhifəyə dön