Qalib Ordunun 103 yaşı tamam olur

Bu gün Azərbaycan Silahlı Qüvvələri yaranışının 103-cü il dönümünü qeyd edir. Azərbaycan Silahlı Qüvvərinin tərkib hissəsi olan Azərbaycan Ordusu müstəqilliyin bərpasından sonrakı dövrdə müharibə apara-apara formalaşıb. Ordumuz 1994-cü ilin mayında əldə olunan atəşkəs rejimindən sonrakı dövrdə yenidən qurulmağa başlayıb. Mərhum Prezident Heydər Əliyev Azərbaycan Ordusunun yaranması, onun kadr potensialı, silah-sursatla təminatı istiqamətində mühüm işlər həyata keçirib.

Azərbaycan Respublikasının Prezidenti, Ali Baş Komandan İlham Əliyevin 2003-cü ildə hakimiyyətə gəlişindən sonra Azərbaycan Ordusu keyfiyyətcə yeni mərhələyə daxil olub. Azərbaycan Ordusu mütəmadi şəkildə hərbi təlimlərə cəlb olunub, ordunun təminatı və təchizatı üçün milyardlarla vəsait ayrılıb. Prezident şəxsən orduda aparılan işlərə nəzarət edib. Prezident İlham Əliyevin Azərbaycan Ordusuna xüsusi diqqət ayırması səbəbindən bir zamanlar ordumuzun büdcəsi az qala Ermənistanın dövlət büdcəsi qədər olub. Və bütün görülən bu işlər, yetişdirilən peşəkar kadrlar Azərbaycan Ordusunun 2020-ci ilin sentyabrın 27-dən, noyabrın 10-a qədər (44 gün) hansı döyüş qabiliyyətinə, peşəkarlığa sahib olduğunu ortaya qoyub. Məhz Müzəffər Ali Baş Komandanın rəhbərliyi ilə Azərbaycan Ordusu az qala 30 ilə yaxın işğal altında olan ərazilərimizi Ermənistan ordusundan təmizləyərək onu darmadağın edib və kapitulyasiya aktı imzalamaq məcburiyyətində qoyub.

Bu gün Azərbaycan Ordusu yaranışının 103-cü ilinə həm də ən böyük qalibiyyəti ilə daxil olur. Ordumuz 44 gün müddətində ölkənin ərazi bütövlüyünün qarantı olduğunu və bunu qısa müddətdə həyata keçirmək gücündə olduğunu sübuta yetirib.

Milli Məclisin deputatı, I Qarabağ müharibəsinin veteranı Arzu Nağıyev Ordu Günü ilə əlaqədar fikirlərini Reyting.az-la bölüşüb.

Arzu Nağıyev deyib ki, Azərbaycan Ordusunun yaranışı günü əslində Azərbaycanda ən böyük gündür. Onun sözlərinə görə, Ordu Gününü Azərbaycan Silahlı Qüvvələri həm də işğal altında uzun illər qalan ərazilərimizin işğaldan azad etməsi ilə eyni ildə qeyd edir: “Bu il Azərbaycan Ordusunun yarandığı gün həm də ordumuzun böyük qalibiyyəti ilə paralel qeyd olunur. Tarix və taleh elə gətirib ki, bizim ordunun formalaşdığı 1990-cı illərdə şəxsən mən bu proseslərin iştirakçısı olmuşam. Özüm I Qarabağ müharibəsinin veteranıyam. Ordumuz necə formalaşdı, kard potensialının, adi uniformanın olmaması, müxtəlif avadanlıq və hərbi texnikanın olmadığı dövrü yaşamışıq. Bəli, o zaman bütün bunlar ciddi problemlər törədirdi. 1994-cü ildə Ulu öndər Heydər Əliyev atəşkəs imzaladıqdan sonra ordu quruculuğunda misilsiz addımlar atdı. Məhz böyük neft kotraktlarından gələn gəlirlərin ordumuzun formalaşmasına və silahlanmasına yönəltməsi böyük addım idi. Biz, bu gün həm də o dövrdə atılan addımların nəticəsini görürük.

Ordumuz çox böyük bir dövr adlayıb, artıq güclü, hərbi sənayenin ən müasir silahları ilə təchiz olunub. Ali Baş Komandanın dəmir iradəsi, şəhadəti şərəf sayan Azərbaycan vətəndaşlarının hesabına düşmənə qalib gəldik. Bu prosesdə ordumuzun fəaliyyəti danılmazdır. Bu gün ordumuz ən müasir texnika, avadanlıqlar və cihazlarla təmin edilib”.

A. Nağıyev qeyd edib ki, dünyada elə ordular var ki, bir dəfə də vuruşmayıb, baxmayaraq ki, sayına görə bir nömrə hesab olunurlar: “Ancaq Azərbaycan Ordusu vuruşa-vuruşa, müharibədən keçərək bugünki günə gəlib çatıb. Əlbəttə, Azərbaycan Ordusu bu günə gəlib çıxdığı zaman baxımından şəhidlər verib, qazilərimiz var. Mən şəhidlərimizə Allahdan rəhmət, qazilərimizə tezliklə sağalmağı arzu edirəm. Azərbaycan Ordusunun bütün şəxsi heyətini bu müqəddəs gün münasibəti ilə təbrik edirəm”.

Deputat xatırladıb ki, Qarabağ müharibəsindən qələbə ilə çıxan Azərbaycan Ordusunun şəxsi heyəti Prezident İlham Əliyev tərəfindən təltif olunur: “Cənab Prezident rayonlarımızın işğaldan azad edilməsində iştirak edən hərbçilərimizi qiymətləndirir. Onlardan heç biri kənarda qalmır. Prezidentin bu qiymətləndirmə prosesinin davam edəcəyini gözləyirəm. Hesab edirəm ki, orduda zəhməti və əziyyəti keçən şəxs onun harada xidmət etməsindən asılı olmayaraq layiq olduğu qiymətini almalıdır. Bu, əslində Ali Baş Komandanın atdığı mühüm və humanist addımlardan biridir”.

A. Nağıyev bildirib ki, ordunun gücü yalnız onun texnikası və sayı ilə bağlı deyil: “Həm də ordunun döyüşdə özünü necə aparmasından, döyüş taktikasının seçilməsindən və ən nəhayət döyüş ruhunun necə olmasından asılıdır. Bu gün Azərbaycan Ordusu dünyada sayılıb-seçilən ordulardan biridir. Dünyada hibrid müharibə sistemi müxtəlif aparıcı dövlətlər tərəfindən öyrənilir. Azərbaycan Ordusunun həm pilotlu, həm də pilotsuz cihaz və qurğularından yüksək peşəkarlıqla istifadə etməsi indi dünyada nümunə kimi göstərilir”.

Azərbaycan Ordusu, 103 yaşın, böyük qələbən mübarək!

Reyting.az

Ana səhifəyə dön