Hikmət Hacıyev İstanbulda: "Məqsədimiz qisas deyil, gələcək sülhə, barışa çağırışdı"

“Dünyada beynəlxalq təşkilatlar çoxdur. Amma biz qeyd etməliyik ki, Türk Şurası digər beynəlxalq təşkilatlardan çox fərqlənir”.

Bunu Azərbaycan Respublikası Prezidentinin köməkçisi, Prezident Administrasiyası xarici siyasət məsələləri şöbəsinin müdiri Hikmət Hacıyev İstanbulda keçirilən Türk Şurası Media Forumunda çıxışı zamanı deyib.

O bildirib ki, Türk Şurasının təməlində qardaşlığımız, dəyərlər, ortaq keçmişimiz, tariximiz durur:

"Türk Şurasının gücü, qüdrəti bundan ibarətdir. Türk Şurası bizim tarixdən gələn dostluğumuzu bir araya gətirərək bizi irəliyə aparan bir təşkilatdır.

Onu da deyim ki, Türk Şurasının Baş katibi Bağdad Əmriyevin bilavasitə dəstəyi ilə qarşıdan gələn sammitimizdə də çox önəmli ərarların qəbulu gözlənilir. Cənab Prezidentlərimizin imzası ilə bu qərarların qəbul olunmasıyla Türk Şurası beynəlxalq münasibətlərdə daha güclü bir mövqeyə sahib olacaq”.

Hikmət Hacıyev deyib ki, bu gün biz Türk Şurası dedikdə qardaş ölkələrimiz arasında bütün sahələri əhatə edən hərtərfli əməkdaşlığı görürük: "Bu ilk növbədə siyasi əməkdaşlığımızdır. Dövlətlərimiz bütün beynəlxalq arenalarda bir-birini qəti şəkildə dəstəkləyirlər. 2019-cu ildə Bakıda keçirilmiş Zirvə toplantısında cənab Prezident İlham Əliyev tərəfindən qeyd edildiyi kimi Azərbaycan öz sədrliyi dövründə əməkdaşlığımızın hərtərəfli inkişafına hər bir vəsilə ilə töhfə verməyə davam edəcək və bu əzmini ortaya qoyub. Məmnunluqda deyirəm ki, biz Azərbaycanın sədrliyi dövründə əməkdaşlığımızı daha da genişləndirdik”.

Prezidentin köməkçisi bildirib ki, Türk dünyasına, ölkələrimizə qarşı da beynəlxalq miqyasda dezinformasiya kampaniyaları aparılır:

"Azərbaycan müstəqilliyinin ilk günündən belə kampaniyaların ön sırasında olub. Bu gün də çox təəssüf ki, ölkəmizə qarşı bu cür kampaniyalar aparılır. Buna qarşı mübarizənin ən vacib və önəmli rolu həqiqətin düzgün formada çatdırılmasıdır. Həqiqətin çatdırılması üçün də birgə işləməyimiz və bir-birimizə qarşılıqlı şəkildə dəstək verməyimiz çox vacibdir”.

Onun sözlərinə görə, bu gün Azərbaycan qarşısına yeni mübarizə qoyub: "Bu, Prezident İlham Əliyevin də qeyd etdiyi kimi, Qarabağın yenidən qurulmasıdır”.

H.Hacıyev qeyd edib ki, Qarabağda 10 min kv.km-dən artıq Azərbaycan torpaqları tamamilə dağıdılıb və məhv edilib: "XXI əsrdə bir torpağın, şəhərin bu formada dağıdılması ağlasığan mənzərə deyildi. Türk Şurası ölkələrinin media nümayəndələri dağıdılmış ərazilərə dəfələrlə səfər edib, mediaturlara qatılıb. Onlar Azərbaycanın məhv edilmiş şəhərini, törədilmiş vandallıq aktlarını dünya ictimaiyyətinin diqqətinə çatdırıblar. Yenə də blogerlərdən, media nümayəndələrindən xahiş edirəm ki, Azərbaycanın haqq səsinə səs verək”.

Prezidentin köməkçisi bildirib ki, məqsədimiz qisas deyil: “Məqsədimiz gələcək sülhə, barışa çağırışdır. Bizim məqsədimiz bu kimi əməllərin dünyada gələcəkdə baş verməsinin qarşısının alınmasından ibarətdir. Eyni zamanda Qarabağda Azərbaycan və türk xalqına məxsus olan dərin mədəni və tarixi irs var. Təəssüflə qeyd etməliyik ki, bu mədəni irsimiz də illər ərzində, 30 il ərzində məhv edilib”.

Reyting.az

Ana səhifəyə dön