Hikmət Hacıyev sammitdə: "Biz 1990-cı illərin əvvəllərində bu savaşa hazır deyildik"

""Vətən müharibəsi dövründə strateji kommunikasiyanın düzgün aparılması Azərbaycanın qarşısında duran ən vacib məsələlərdən biri idi".

Bunu Azərbaycan Prezidentinin köməkçisi-Prezident Administrasiyasının Xarici siyasət məsələləri şöbəsinin müdiri Hikmət Hacıyev İstanbulda keçirilən Beynəlxalq Strateji Kommunikasiya-"Stratcom 21" sammitinin açılış mərasimində çıxışı zamanı deyib.

O qeyd edib ki, bu dövr ərzində ermənilərin yenidən Azərbaycana qarşı başlatdığı savaşa baxmayaraq, dünyanın bir çox aparıcı media orqanının qapıları ölkəmiz üçün qapalı qalmağa davam edirdi: "Burada Azərbaycan Prezidenti dünya mediası ilə birbaşa təmas quraraq ölkəmizin apardığı strateji kommunikasiyada ön sırada oldu. 44 günlük savaş dövrü ərzində demək olar ki, hər gün dünyanın 30-dan çox aparıcı televiziya və media agentliklərinə ölkə başçımızın saatlarla davam edən müsahibələri təşkil edildi. Əsgərlərimiz meydanda sərhədi necə yardılarsa, bu da informasiya savaşında sərhədlərin yarılması demək idi. Prezidentimizin sosial media ismarıcları həm informasiyanı dünyaya çatdırır, həm də xalqımızı məlumatlandırdı".

Ermənistanın sonda öz yalanlarının qurbanına çevrildiyini bildirən Prezidentin köməkçisi həqiqətlərin dünyaya çatdırılmasının önəmli olduğunu, bu xüsusda qardaş Türkiyə ilə Azərbaycanın bütün sahələrdə olduğu kimi, informasiya və media sahəsində də çiyin-çiyinə çalışmasını xüsusi vurğulayıb: "Təəssüf ki, Azərbaycan müstəqilliyinin ilk illərindən, hətta strateji kommunikasiyanın nə olduğunu dünyanın bilmədiyi dövrdə strateji kommunikasiya, dezinformasiya və yalan xəbərlərin ölkəmizə qarşı olduğunu gördük"/Report.

Reyting.az-ın məlumatına görə, Hikmət Hacıyev daha sonra deyib ki, bu gün müstəqilliyinin 30-cu ilini qeyd edən Azərbaycan ilk günündən informasiya, hibrid və psixoloji savaşlarla üzləşdi: "Xüsusilə Qarabağ müharibəsi əsnasında Ermənistanın Azərbaycana qarşı həyata keçirdiyi işğalçılıq siyasəti məhz bu əsaslarla, psixoloji və hibrid savaşlarla müşahidə olunub. Dünyanın hələ dezinformasiyanı tam qavramadığı dövrdə Azərbaycan bunlarla üz-üzə qaldı. Biz o zaman - 1990-cı illərin əvvəllərində bu savaşa hazır deyildik. Ona görə də Ermənistan Azərbaycan torpaqlarını günbəgün işğal etdi. Bu işğalın terror, aqressiv separatizm, ayrı-seçkilikə müşahidə olunduğu təqdirdə dünya Azərbaycanı qınayırdı. Ermənistanın Silahlı Qüvvələri tərəfindən insanlarımızın öldürüldüyü təqdirdə guya azərbaycanlıların erməniləri öldürdüyü irəli sürülürdü. Bunun nəticəsində erməni soyqırımı adı altında dünyada təbliğat aparılırdı. Bütün bunların fonunda Azərbaycan öz haqlı savaşını apararaq dünyaya həqiqəti çatdırmağa çalışırdı".

O qeyd edib ki, erməni lobbisinin dünya üzrə Azərbaycana qarşı apardığı bu siyasətin qarşısını yalnız strateji səviyyədə hərbi, diplomatik və informasiya siyasətimizi bir araya gətirərək koordinasiya olunmuş şəkildə siyasət həyata keçirərək ala bilərdik: "Bu proseslər dünyanın susduğu, baş verənləri görmədiyi, duymaq istəmədiyi anda baş verdi. Bu problemlərin fonunda biz uzunvədli yola çıxdıq. Otuzillik işğal dövründə strateji kommunikasiya və strateji rabitə formalaşdıraraq bunu həyata keçirməyə başladıq. Əsas hədəfimiz Azərbaycan tərəfindən həyata keçirilən siyasətin vahid bir mesajla dünyaya çatdırılması idi. Çətinliklərə baxmayaraq, düşünürəm ki, həqiqəti dünyaya çatdırmağa nail olduq. Bu, xüsusilə Azərbaycanın Vətən müharibəsində bir daha özünü doğrultdu".

Prezidentin köməkçisi bildirib ki, Türkiyə tərəfindən təşkil edilən forum böyük əhəmiyyət daşıyır:

"Müasir dünyada strateji kommunikasiyaların, yəni ismarışların əlaqələndirilmiş və ardıcıl şəkildə təqdim olunması böyük önəm kəsb edir. Bu xüsusda Azərbaycanın təcrübəsi konfrans iştirakçılarının nəzərinə çatdırıldı. Xüsusilə Ermənistanın Azərbaycana qarşı başlatdığı müharibə hibrid elementlərlə müşaiyət olunub və dezinformasiya, yalan xəbərlər əsnasında həyata keçirilib. Bu məsələ ötən əsrin 90-cı illərinin əvvəllərinə də aiddir. Azərbaycanın haqlı olmasına baxmayaraq ölkəmizin haqsız duruma salınmasına və bu münaqişə əsnasında yalanların beynəlxalq ictimaiyyətə təqdim olunmasına cəhd edilirdi. Tədbirdə çıxışım zamanı Birinci və İkinci Qarabağ müharibələrini müqayisə edərək, Prezident İlham Əliyevin rəhbərliyi altında Vətən müharibəsi zamanı aparılan strateji kommunikasiyanın əhəmiyyətini və metedolojiyasını konfrans iştirakçılarının diqqətinə çatdırdım. Vətən müharibəsi zamanı Prezident İlham Əliyev dünyanın 30-dan artıq media orqanına müsahibə verib. Həmin müsahibələr saatlarla davam edirdi. Eyni zamanda dövlət başçısının Azərbaycan xalqı ilə birbaşa dialoqunun həyata keçirilməsi və televiziyalar vasitəsi ilə cəbhədə baş verən hadisələri xalqa çatdırması, reallıqları təqim etməsi də böyük önəm daşıyırdı. Həmçinin Prezident tərəfindən sosial media hesabları üzərindən aparılan fəaliyyət və bütün ölkəmizdə kommuniyasiyanın vahid mərkəzdən idarə olunaraq əlaqələndirilmiş şəkildə, hər hansı fikir ayırılığına yol vermədən həyata keçirilməsi sahəsində olan təcrübəmizi bölüşdük".

Reyting.az

Ana səhifəyə dön