Azexport.az portalı dünyanın daha iki böyük ticarət portalına inteqrasiya olunub.

İqtisadi İslahatların Təhlili və Kommunikasiya Mərkəzindən Reyting.az-a verilən məlumata görə, bunlardan biri Şərqi Asiya ölkələrinə ixrac potensialı daha güclü olan EC21.com portalıdır.

Digəri isə dünyanın böyük portallarından biri olan Tradekey.com-dur ki, burada hər gün milyonlarla satış həyata keçirilir. Portalın məlumat bazasında 1,5 milyon şirkət nümayəndəsi, 3 milyon məhsul və 3 milyon qeydiyyatdan keçmiş alıcı var.

Qeyd edək ki, Tradekey.com portalı ərəb ölkələrinə olan ixrac potensialını ələ alan beynəlxalq platformadır. 2005-ci ildə fəaliyyətə başlayan bu şirkət, dünyanın 220 ölkəsindən alıcı və satıcıları bir araya toplayan global B2B platformudur. Həmçinin, dünyada ISO sertifikatları ilə təsdiq olunmuş ilk biznes portalı olaraq, beynəlxalq keyfiyyət standartları və müştəri məlumat və data bütövlüyü təhlükəsizliyini ən yüksək səviyyədə təmin edir.