Dünən Floridada keçirilən danışıqlarda ABŞ və Ukrayna Kiyevin NATO üzvlüyündən imtina etməsi ssenarisini müzakirə ediblər.

Reyting.az xəbər verir ki, bu məlumatı CNN öz mənbələrinə istinadən yayıb.

CNN-in mənbəsinin bildirdiyinə görə, danışıqlarda Ukraynanın NATO-ya üzv dövlətlərlə Moskva arasında aparılacaq birbaşa danışıqlar nəticəsində Alyansa qoşulmasının faktiki olaraq qadağan edilə biləcəyi ssenari gündəmə gətirilib.

Mənbə həmçinin vurğulayıb ki, Ukrayna rəsmi olaraq - yəni de-yure - bu istəyindən imtina etməyə məcbur edilməyəcək.

Lakin, əgər ABŞ Rusiya ilə ikitərəfli razılığa gələrsə və ya Rusiya NATO-dan çoxtərəfli zəmanətlər tələb edərsə, Ukrayna qərar qəbuletmə prosesində iştirak edə bilməyəcək.

“Son qərar hələ verilməyib və nəticə etibarilə bu məsələ Ukrayna prezidenti Vladimir Zelenskinin səlahiyyətində olacaq”,- mənbə CNN-ə bildirib.

Ümumilikdə, mənbə qeyd edib ki, danışıqlarda “irəliləyiş” müşahidə olunur və bu, Cenevrədə əldə edilmiş tərəqqi üzərində qurulub.

Mənbə əlavə edib: “Hələ görüləsi çox iş var və burada son qərarın verildiyini demək tezdir. Lakin görüş çox məzmunlu keçdi və sülh təkliflərinin ən problemli aspektləri ətraflı müzakirə olundu”.

“Wall Street Journal”ın məlumatına görə, danışıqlarda həmçinin Ukraynada yeni seçkilərin mümkün vaxtı, eləcə də Rusiya ilə Ukrayna arasında ərazi mübadiləsi perspektivi ilə bağlı məsələlər də müzakirə edilib. Bununla yanaşı, ABŞ və Qərb tərəfindən Ukraynaya veriləcək təhlükəsizlik zəmanətlərinin xarakteri kimi digər vacib məsələlər isə hələ də açıq qalır.

E. KAMAL