“Katolikos istefa verə bilməz. Katolikosun istefa verməsi üçün heç bir səbəb görmürəm”.

Reyting.az xəbər verir ki, bunu Erməni Apostol Kilsəsinin arxiyepiskopu Arşak Xaçatryan bu gün keçirdiyi mətbuat konfransında bildirib.

“Katolikos sadəcə, müəyyən dairələr, o cümlədən kilsə mənsubiyyəti çox şübhəli olanlar belə bir gündəm irəli sürdüyü üçün istefa verə bilməz. O, sadəcə, 10 yepiskopun tələb etdiyi üçün istefa verə bilməz. Katolikos milli kilsə şurası tərəfindən seçilir və onun təsdiqi olmadan katolikosun istefa vermək qərarı fərarilikdən başqa bir şey deyil”,- deyə arxiyepiskop bildirib.

O, əlavə edib ki, katolikos özü də dəfələrlə bunu deyib. Arxiyepiskop əmindir ki, belə bir qərar katolikos tərəfindən verilməyəcək: “Katolikosun kilsəyə və onunla bağlılığına son dərəcə yüksək baxışı var”.

Xatırladaq ki, Erməni Apostol Kilsəsinin bir qrup ruhanisi bütün ermənilərin katalikosu II Qareginin istefasını tələb edən bəyanat yayıb. Onların bəyanatı Ermənistanda böyük əks-səda doğurub. Ruhanilər Qareginin səlahiyyətinin dondurulmasını və ana taxtdan uzaqlaşdırılmasını istəyirlər.

II Qareginə sadiq olan arxiyepiskop Xaçatryan isə bu rihanilərin açıqlama verməsi üçün şantaja məruz qalmalarına işarə edib: “Bu açıqlamanı verən ruhanilər şantaj edilibmi? Açığı, bilmirəm, amma istənilən ssenaridə belə bir mövqe açıq-aşkar xəyanətdir. Mən üç aspekt görürəm, insanlar təkcə Allaha, təkcə kilsəyə deyil, həm də özlərinə xəyanət ediblər, keçmişlərinə aid olan hər şeyə, inandıqları hər şeyə xəyanət ediblər”.

Xatırladaq ki, Ermənistanda Apostol Kilsəsi faktiki olaraq hakimiyyət uğrunda mübarizəyə qoşulub və indiki baş nazir Paşinyanın hakimiyyətdən getməsi üçün ənənəvi müxalifətlərlə eyni mövqedən çıxış edir. Paşinyan hakimiyyəti isə bu işlərin başında duran II Qaregini vəzifədən uzaqlaşdırmağa çalışır.

E. KAMAL