Venesuelanın saxlanılaraq ABŞ-a aparılmış prezidenti Nikolas Maduro və həyat yoldaşı Silía Flores Nyu-Yorkda hakim qarşısına çıxarılıblar. İlk iclas 30 dəqiqə davam edib. Məhkəmə prosesi haqqında rəsmi açıqlama verilməsə də, CCN kanalı mənbələrinə istinadla prosesin qısa xronikası ilə bağlı məlumat paylaşıb.

Reyting.az xəbər verir ki, hakim iclası açıb və Nikolas Maduro ayaqları qandallı zala gətirilib. O, masa arxasında həyat yoldaşından bir stul aralı əyləşdirilib.

Hakim: Təsdiq edin ki, siz Nikolas Madurosunuz.

Maduro: Təsdiq edirəm, mən Nikolas Maduroyam - Venesuela prezidentiyəm.

Hakim: Bunu müzakirə etmək üçün hələ vaxt və yer olacaq. Hazırda yalnız bir sual maraqlıdır: siz Nikolas Madurosunuz?

Maduro: Bəli.

Hakim (ittiham aktını oxuyur): Təqsirinizi etiraf edirsinizmi?

Maduro: Mən günahsızam. Mən ləyaqətli insanam. Mən hələ də, öz ölkəmin prezidentiyəm.

Silía Flores: Mən Venesuela Respublikasının birinci xanımıyam. Mən günahsızam, tamamilə günahsızam.

Hakim: Sizin Venesuela konsulu ilə görüşmək hüququnuz var.

Maduro və Flores: Bunu bilirik və bu hüquqdan istifadə etmək istəyirik.

Müdafiə tərəfinin vəkilləri: Bu gün girovla azad olunma ilə bağlı vəsatət verməyəcəyik. Bunu daha sonra edəcəyik.

Maduronun vəkili: Biz çoxlu vəsatətlər qaldıracağıq. Müvəkkilim suveren dövlətin başçısıdır və müvafiq imtiyazlar, eləcə də toxunulmazlıq hüququna malikdir. Onun qaçırılmasının qanuniliyi məsələsi var. Həmçinin sağlamlıq problemləri mövcuddur.

Floresin vəkili: Müvəkkilim qaçırılma zamanı ciddi xəsarətlər alıb. Ona tibbi müayinə lazımdır.

Hakim: Növbəti iclas 17 mart tarixinə təyin edilir.

Oqtay QORÇU