ABŞ dövlət katibi Marko Rubio gələn həftə Danimarka hakimiyyəti ilə Qrenlandiya məsələsini müzakirə edəcək.

Reyting.az xarici KİV-lərə istinadla xəbər verir ki, bu barədə Rubio jurnalistlərə açıqlama verib.

Jurnalistlərin Vaşinqtonun Qrenlandiyada mümkün hərbi əməliyyatı istisna edib-etmədiyi ilə bağlı sualına cavab verən dövlət katibi bildirib: “Mən bura Danimarka və ya hərbi müdaxilə məsələsini müzakirə etmək üçün gəlməmişəm. Gələn həftə danimarkalılarla görüşəcəyəm”.

Rubio qeyd edib ki, gələn həftə Danimarka tərəfi ilə Qrenlandiya məsələsi ətrafında müzakirələr aparılacaq, lakin hələlik əlavə detallar açıqlanmayıb.

Dövlət katibi həmçinin vurğulayıb ki, ABŞ prezidenti Donald Tramp Qrenlandiyanın ilhaqında maraqlı olan ilk Amerika lideri deyil.

Qeyd edək ki, daha əvvəl Donald Tramp ABŞ-nın müdafiə məqsədləri baxımından Qrenlandiyaya ehtiyac duyduğunu bəyan edib. O, həmçinin əlavə edib ki, digər tərəflər Venesuelada hərbi əməliyyatın Qrenlandiya məsələsi üçün nə məna kəsb etdiyinə özləri qərar verməlidirlər.

E. KAMAL