“Qrenlandiyadakı Rusiya təhlükəsini aradan qaldırmağın vaxtı çatıb. Danimarka son 20 ildə onu neytrallaşdıra bilməyib”.

Reyting.az xəbər verir ki, bunu ABŞ prezidenti Donald Tramp özünün sosial media hesabı olan “Truth Social”da yazıb.

O qeyd edib ki, vəziyyət təcili həll tələb edir və bu, tezliklə təmin olunacaq.

“NATO 20 ildir Danimarkaya deyir ki, Qrenlandiyadan Rusiya təhlükəsini aradan qaldırmalısınız. Təəssüf ki, Danimarka bu barədə heç nə edə bilməyib. İndi vaxtdır və bu, ediləcək”,- ABŞ prezidenti yazıb.

Qeyd edək ki, ABŞ maliyyə naziri Skott Bessent ABŞ-nın qitənin təhlükəsizlik sahəsindəki zəifliyini əsas gətirərək Qrenlandiyanı ələ keçirmək mövqeyindən geri çəkilməyəcəyini bildirib.

Amerikanın Qrenlandiya üzərində nəzarətin mümkün qurulması ilə bağlı açıqlamaları NATO daxilində ciddi böhrana səbəb olub və Alyansın birliyini şübhə altına alıb. “Economist” xəbər verir ki, D. Trampın Qrenlandiyanın tam satın alınmasına nail olmaq niyyəti Avropa müttəfiqlərinin kəskin reaksiyasına və transatlantik münasibətlərin gərginləşməsinə səbəb olub.

“Politico” nəşri isə yazır ki, Avropa NATO-nu əvəz etmək üçün ABŞ olmadan - “könüllülərin koalisiyası”na əsaslanaraq və Ukraynanın iştirakı ilə alternativ təhlükəsizlik ittifaqı yaratmaq imkanını nəzərdən keçirir.

E. KAMAL