“ABŞ prezidenti Donald Tramp Qrenlandiya və Danimarkanı dəstəkləyən ölkələrə qarşı tarif tətbiq etmək təhdidləri ilə Avropanı zəiflətməyə çalışır”.

Reyting.az xəbər verir ki, bu fikirləri Fransa prezidenti Emmanuel Makron Davosda keçirilən Dünya İqtisadi Forumunda səsləndirib. Məlumatı “Le Monde” qəzeti yayıb.

Makron bildirib ki, ABŞ Avropanı zəiflətməyə cəhd göstərir. O, eyni zamanda “ən güclülərin qanunu”nun hökm sürdüyü bir dünyaya doğru gedildiyi barədə xəbərdarlıq edərək, Avropanı bu vəziyyəti passiv şəkildə qəbul etməməyə çağırıb.

Fransa prezidenti vurğulayıb ki, Avropa kobud gücə tabe olmaqdan imtina edənlərin maraqlarına xidmət edən çoxtərəfliliyi qorumalıdır.

Makron avropalıları ortaq həll yolları tapmağa və dialoqu gücləndirməyə çağırıb. O, Trampın təhdidlərinə cavab olaraq Qrenlandiyaya Avropa missiyasının göndərilməsini və G7 çərçivəsində aparılan müzakirələri nümunə kimi göstərib.

Fransa lideri, həmçinin Avropa Birliyinin ABŞ tariflərinə qarşı mübarizə aparmaq üçün nəzərdən keçirdiyi mexanizmlərə toxunaraq deyib:

“Avropanın çox güclü alətləri var və onlara hörmət edilmədikdə, eləcə də oyun qaydaları pozulduqda bu vasitələrdən istifadə etməliyik”.

Xatırladaq ki, yanvarın 17-də Tramp Qrenlandiya ilə bağlı iddialarını dəstəkləməyən bir sıra ölkələrə qarşı tariflər tətbiq ediləcəyini açıqlayıb.

E. KAMAL