ATƏT PA-nın Tbilisidə keçirilən yay sessiyasında Komitələrdə iş davam etdirilib.

Reyting.az-ın məlumatına görə, iyulun 3-də olduqca gərgin və işgüzar şəraitdə keçən 1-ci Komitənin iclasına azərbaycanlı millət vəkili, ATƏT PA-nın Büro üzvü, Siyasi və Təhlükəsizlik Komitəsinin sədr müavini Azay Quliyev sədrlik edib.

ATƏT PA-nın rəsmi saytı oscepa.org-un yaydığı məlumatda bildirilir ki, iclasda ATƏT PA-nın Büro üzvü, Komitənin sədr müavini Azay Quliyev vida çıxışı edib:

"Cənab sədr, hörmətli həmkarlar!

Bu önəmli Komitədə mənim sədr müavini kimi tutduğum vəzifədə sonuncu iclasım olduğu üçün istərdim ki, hər birinizə səlahiyyət müddətim ərzində göstərdiyiniz dəstəyə və anlayışınıza görə səmimi minnətdarlığımı bildirim.

Sizin mənə əmanət etdiyiniz inam və etibarınızı yüksək qiymətləndirirəm. Bu mənə ATƏT-in ümumi maraqlarının bələdçilik etdiyi güclü örnək olmuşdur.
Sizi ATƏT və onun Parlament Assambleyasını eyni qətiyyətlə dəstəkləməkdə davam etməyə hazır olduğuma əmin etmək istəyirəm. Mən əməkdaşlıq və dialoqa sadiq tərəfdar olaraq qalacağam.
Bizim ortaq hədəf və məqsədlərimizdə nailiyyətlərə çatmaq istiqamətində hamınızla işləməyi səbirsizliklə gözləyirəm.

Bir daha təşəkkür edirəm”.

Qeyd edək ki, Azay Quliyev ATƏT-in Siyasi Məsələlər və Təhlükəsizlik Komitəsinin sədr müavini vəzifəsinə ilk dəfə 2013-cü ildə İstanbul sammitində seçilmişdi. 2014-2015-ci illərdə isə bu vəzifəyə təkrar seçilib.