Azərbaycan Liberal Demokrat Partiyasının (ALDP) sədri Fuad Əliyev partiyanın Sədr Aparatının iclasını keçirib. İclasda ictimai-siyasi vəziyyət, 20 Yanvar faciəsinin növbəti ildönümünün yad edilməsi və təşkilati məsələlər müzakirə olunub.

Partiyadan Reyting.az-a verilən məlumata görə, toplantıda 20 Yanvar şəhidlərinin xatirəsi bir dəqiqəlik sükütla yad ediləndən sonra çıxış edənlər qeyd ediblər ki, bu faciənin törədilməsində birbaşa məsuliyyəti SSRİ rəhbəri Qorbaçov daşıyır. Belə ki, yanvarın 19-dan 20-nə keçən gecə SSRİ-nin ilk prezidenti Mixail Qorbaçovun əmri ilə sovet ordusunun Ryazan və Tuladakı desant, Krasnodar, Stavropol və Rostob vilayətlərində yerləşən motoatıcı diviziya qüvvələri Bakıya daxil olub. "Zərbə” kodu altında keşirilən əməliyyatda ağır hərbi texnikayla yanaşı, minlərlə əsgər və zabit iştrak edib. Bir gecədə 170 günahsız sakin qətlə yetirilib, 400 nəfər yaralanıb, onlarla itkin düşənlər qeydə alınıb. Qanlı 20 Yanvar faciəsinin əsas səbəbkar olan M.Qorbaçov məsuliyyəti öz üzərindən atmaq üçün ordunun Bakıya yeridlməsini 1990-ci il 13-15 yanvarda Bakıda ermənlərə münasibətlə əlaqələndirib. Əməliyyatda "Alfa”, "Vimpel” və "Vityaz” kimi xüsusi yəyinatlı dəstələrin iştrakı əsas məqsəddən xəbər verirdi – azərbaycanlıların azadlıq uğrunda mübarizəsini yatırtmaq.

Qeyd edilib ki, bu faciəni həyata keçirmək Kremlin planı olub. Qorbaçovun ermənipərəst ətrafı – Şahnazaryan, Sitaryan, Ambarsumyanlar kimi yüzlərlə erməni yaltağının xüsusi fəallığı ilə bu faciə baş verib.

ALDP sədri Fuad Əliyev deyib ki, hər bir azərbaycanlı getdiyi xarici məkanda Azərbaycanın başına gətirilən faciələrdən danışmalıdır. "Bu da bir həqiqətdir ki, faciələrimiz dünyanın ayrı-ayrı ölkələrində qeyd olunmaqla xalqımıza qarşı keçmiş SSRİ rəhbərliyinin, işğalçı Ermənistanın irtıcaçı mövqeyi ifşa olunur. Mənə elə gəlir ki, bu istiqamətdə bütün gücümüz səfərbər olunmalıdır. Avropa ilə əməkdaşlıq edən yerli QHT-lər, diaspor təşkilatlarımz, imkanlı azərbaycanlılar Azərbaycan xalqının başına gətirilən faciələrimizin dünyada tanıdılmasında yaxından köməklik göstərməlidirlər”.

F.Əliyev faciələrimizin dünya dövlətlərinin ali qanunverici organları tərəfindən tanıdılmasının mürəkkəb məsələ olduğunu desə də, təbliğat aparmaqla ən azından həmin cəmiyyətlərin şüurunda dəyişikliyə nail olunmasının mümkünlüyünü bildirib.