DYP və BNA sakinlərin həyatına yaranmış təhlükəyə biganə yanaşır

Bakı şəhəri, Binəqədi rayonu, Xocasən qəsəbəsinin bir qrup sakini Azərbaycan Respublikasının Prezidenti İlham Əliyevə müraciət ünvanlayıb. Reyting.az-ın redaksiyasına da göndərilən müraciətə səbəb Baş Dövlət Yol Polisi İdarəsinin (DYP) və Bakı Nəqliyyat Agentliyinin (BNA) məsul şəxslərinin sakinlərin həyatına yaranmış təhlükəyə biganə yanaşmasıdır.

Xocasən qəsəbəsinin Həmid Sultanov küçəsinin sakinləri yazırlar ki, yaşadıqları ərazidə - Xocasən-Lökbatan yolundakı işıqfordan hərbi hissəyə qalxan yolun (Həmid Sultanov küçəsi) təqribən 100 metrliyində dəfələrlə avtomobil qəzaları baş verib. Sonuncu qəza 12 Noyabr 2022-ci ildə Həmid Sultanov küçəsi, 17-də qeydə alınıb. Xoşbəxtlikdən həmin zaman yolda insan olmadığı üçün təlafatla nəticələnməyib, sadəcə, avtomobil obyektin və yaşayış evinin divarını dağıdıb. Lakin bu, o demək deyil ki, növbəti qəza da insan tələfatı olmadan ötüşə bilər.

Şikayətçilər bildirir ki, H. Sultanov küçəsində avtomobillərin hərəkətinə nəzarət edən kamera, radar, tramplin, yol nişanı və s. olmadığına görə sürücülər sürət həddinə məhəl qoymur, bu isə qəzaları qaçılmaz edir:

“Həmid Sultanov küçəsinin sağı da, solu da yaşayış evləridir, amma ərazidə qadağanedici heç bir yol hərəkət nişanı və piyalar üçün səki yoxdur”.

Sakinlər yazır ki, yolun sağ və sol hissəsinin yaşayış evləri olmasına baxmayaraq, burada avtomobillər 80-90, hətta 100 km/saat sürətlə hərəkət edir:

“Bizim hər birimizin evində azyaşlı uşaqlar var. Belə olan halda təbii ki, daha çox narahat oluruq. Lakin müraciət etməyimizə baxmayaraq, Baş Dövlət Yol Polisi İdarəsi və Bakı Nəqliyyat Agentliyi yaranmış təhlükəli vəziyyətdən narahat olmur. Hər iki qurum məsuliyyəti bir-birinin üzərinə ataraq problemi həll etmək istəmirlər. Belə olan halda biz vətəndaşlar nə etməliyik?”

Sakinlər 28.12.2022-ci ildə məsələ ilə əlaqədar Baş Dövlət Yol Polisi İdarəsinə müraciət etsələr də, şikayət ərizələri baxılması üçün Binəqədi Rayon Polis İdarəsinə (RPİ) göndərilib: “Binəqədi RPİ-dən isə guya kimlərsə əraziyə baxış keçirib. Bu necə baxış keçirməkdir ki, bundan ərizəçilərin xəbəri olmayıb? Gəlib baxış keçirdikləri deyilsə də, bizimlə əlaqə saxlayıb şikayətimizin dəqiq hansı ərazidən bəhs etdiyini öyrənməli idilər. Bu günə qədər də həmin ərazidəki təhlükəli vəziyyətə qarşı heç bir tədbir görülməyib. Əgər şikayət etdiyimiz əraziyə baxan olsaydı, hansısa tədbir görülərdi”.

Narazı sakinlər daha sonra yazır:

“Hörmətli cənab prezident!

Biz çıxış yolunu kollektiv şəkildə yolu bağlayıb etiraz etmək və problemi daha da ictimailəşdirməkdə görürük. Çünki Baş Dövlət Yol Polisi İdarəsi və Bakı Nəqliyyat Agentliyi problemin həlli istiqamətində heç bir tədbir görmür və həyatımızın təhlükə ilə üz-üzə qalmasına biganə yanaşırlar”.

Problemin həlli üçün Azərbaycan prezidentindən kömək istəyən müraciət müəllifləri yazırlar ki, artıq altı aydır şikayət etsələr də, adıçəkilən qurumlar onların şikayətinə məhəl qoymur:

“Cənab prezident!

Ombudsman Aparatına da bununla bağlı dəfələrlə şikayət ərizəsi yazmışıq, zənglər etmişik, lakin onlar da bu işin öhdəsindən gələ bilmirlər. Sizdən xahiş edirik ki, bu problenin həlli üçün aidiyyatı qurumlara tapşırıq verəsiniz.

Öncədən təşəkkürümüzü bildiririk!”.

Onu da diqqətə çatdırırıq ki, sakinlər adından müraciəti - Daşdəmirov Fərhad Bayram oğlu (Şəhid atası), Hüseynov Pərviz Əsəddin oğlu (Qazi), Abdurahmanov Elxan Tofiq oğlu, Nəsrullayev Ceyhun İnqilab oğlu, Abıyev Vidadi Razim oğlu, Mustafayev Vüsal Aydın oğlu, Məmmədov Fikrət Talıb oğlu, Cahangirov Şubər Yağub oğlu və Nəcəfova Müşkünaz Baxış qızı imzalayıblar.

Şikayətçilər həm qəza ilə bağlı fotoları, həm də Baş Dövlət Yol Polisi İdarəsi və Bakı Nəqliyyat Agentliyi ilə yazışmalarının surətini də redaksiyamıza göndəriblər. Reyting.az isə əks tərəflərin də məsələyə münasibətinə yer ayırmağa hazırdır.