Sataşmağa kimsə yox... Və ya “Şərbazlar dərəsi”

Kamal Abdulla

Ekran-efirimiz, mediamız, sosial şəbəkələr şər-şəbədə ilə doludur. Şou-biznes aləmində tozanaq qoparanlar bir-birlərini ağla gəlməyən məsələlərdə ittiham edirlər. “Toylar starı”nın iti “Xınayaxdılar ulduzu”nun itinə nə vaxtsa tərs baxıb və s...

Ali təhsil ocağında çalışan, alim kimi elmi tədbirlərin yuxarı başına çəkilməsi iddiası ilə yaşayan birinin də “Şou-biznes bazarı”nın qaydaları ilə hərəkət etdiyini görəndə təəccüblənməyə bilmirsən. Elm adamı özünü niyə “Xınayaxdılar kralı” kimi aparsın ki?

Son vaxtlar sosial şəbəkələrdə Həbib Zərbəliyevin akademik Kamal Abdulla haqqında paylaşımları qarşıma çıxır. Həbib Zərbəliyev vaxtını və enerjisini akademik Kamal Abdullanın geniş elmi fəaliyyətinin və Azərbaycandan kənarda da yetərincə tanınan bədii yaradıcılığının təhlilinə sərf etsəydi bu mübahisəyə sevinmək olardı. Amma və lakin Həbib Zərbəliyevin paylaşımları şər-şəbədə, dedi-qodu ilə doludur.

Azərbaycan Dillər Universitetinin rektoru, akademik Kamal Abdulla guya saxta diplom satır... Bu gün Elm və Təhsil Nazirliyinin, dövlətin digər qurumlarının saxta diplomlara qarşı bəzən də aşırı görünən mübarizə apardığı bir dövrdə nüfuzlu ali təhsil ocağının rəhbəri diplom saxtakarlığına gedərmi? Ən əsası cəmiyyətin və mənim də yaxşı tanıdığım akademik Kamal Abdulla belə bir cinayətə imza atarmı? Təbii ki, yox! Şər-böhtan küləyinin vıyıltısı ortadadır...

90-cı illərin əvvəllərindən, Mədəniyyət Fonduna rəhbərlik etdiyi dövrdən tanıdığım, Milli Elmlər Akademiyası sistemində çalışanda, Bakı Slavyan Universitetinə rəhbərlik edəndə, Prezident Administrasiyasının millətlərarası, multikulturalizm və dini məsələlər üzrə Dövlət müşaviri kimi mühüm post tutanda rəsmi yığıncaqlarda, qeyri-rəsmi toplantılarda dəfələrlə görüşdüyüm, həmsöhbət olduğum, müsahibə götürdüyüm akademik, dəyərli ziyalı, dövlət xadimi, yazıçı-dramaturq Kamal Abdulla Həbib Zərbəliyevin atdığı şər-böhtanı haqq edirmi? Təbii ki yox!

Kamal müəllim uzun illər Bakı Slavyan Universitetinə rəhbərlik edib. Onun rektorluğu dövründə bu ali təhsil ocağında yaranan demokratik ab-hava, şəffaf mühit tələbələrin, onların valideynlərinin yaxşı yadındadır. Yuxarıda xatırlatdığım kimi, akademik Kamal Abdulla mühüm dövlət vəzifəsi daşıyıb, Prezident Administrasiyasının millətlərarası, multikulturalizm və dini məsələlər üzrə Dövlət müşaviri olub. Onun adı hansısa bir qanunsuz əməldə, saxtakarlıqda hallanıbmı? Həbib Zərbəliyev bununla bağlı hər hansı bir fakt ortaya qoya bilərmi? Son illər Dillər Universiteti kimi böyük bir ali təhsil müəssisəsinə başçılıq edən Kamal Abdulla buranın da idarəçiliyində şəffaflıq, demokratik ab-hava yaratmaq üçün islahatlar aparır. Görünür bu addımlar, qarşıya qoyulan tələblər kimlərisə ciddi narahat edir və onlar çox gənc yaşlarından elmi ictimaiyyətin, dövlət strukturlarının, ziyalıların, bütünlükdə cəmiyyətin yaxşı tanıdığı, artıq 73 yaşlı Kamal Abdullanı saxta diplom satan kimi təqdim etmək istəyir, şər-böhtan yağdırırlar.

Dünya şöhrətli fransız yazıçısı Viktor Hüqo yazırdı ki, vicdan məhkəməsi ən ali məhkəmədir! Xeyli yaşı, həyat təcrübəsi olan Həbib Zərbəliyevə məsləhət vermək mənə düşməz, amma təklifim odur ki, bu yaşda “Şou-biznes bazarı”nın qaydalatrı ilə hərəkət etməkdən, şər-böhtan atmaqdansa ən ali məhkəmə sayılan vicdan məhkəməsinin səsinə qulaq assın!

Etibar CƏBRAYILOĞLU
Reyting.az

Ana səhifəyə dön