Mərkəz rəhbəri: "Sənəd qəbulunu həm nazirliyin, həm də universitetlərin aparması qəbuledilməzdir"

"Absurd bir vəziyyətdir, magistraturaya sənəd qəbulunu paralel olaraq həm Elm və Təhsil Nazirliyi, həm də universitetlər aparır. Həm elektron, həm də kağız formasında. Uzun illərdi ki, bu format dəyişməyib”.

Reyting.az xəbər verir ki, bunu Multimedia Mərkəzinin rəhbəri Osman Gündüz bildirib.

Mərkəz rəhbəri əlavə edib ki, yenə də Elm və Təhsil Nazirliyi magistrantların sənədlərini mərkəzləşmiş portal, portal.edu.az vasitəsilə qəbul edir:

“Ədalət naminə deyim ki, normal bir informasiya sistemi qurublar, normal da işləyir. Lakin universitetlər də paralel olaraq magistrantlardan kağız və elektron formada xeyli sənədlər, onların notarial təsdiqlərini tələb edirlər. Hansı ki, bu sənədlərin hamısı müxtəlif dövlət qurumlarında elektron formada var".

Onun sözlərinə görə, UNEC yeganə universitetdir ki, kağız formasından imtina edib, amma o da özünün portalında əlavə qeydiyyat tələb edir.

O. Gündüz düşünür ki, Elm və Təhsil Nazirliyi (ETN) mərkəzləşmiş və universitetlərin informasiya sistemləri məsələsinə də aydınlıq gətirməlidir. Yəni bu cür paralellik yolverilməzdir.

Mərkəz rəhbəri ETN-ə və rəqəmsal hökumət quruculuğuna cavabdeh olan İnnovasiya və Rəqəmsal İnkişaf Agentliyinin məsul şəxslərinə sual da ünvanlayıb:

“Bu cür paralelçilik nə deməkdir? Axı rəqəmsallaşma, innovasiyalar xərcləri azaldıb, insanlara rahatlıq gətirməliydi. Bizdə isə bu sektorda uzun illərdi ki, nəinki daha effektiv və rahat mexanizmlər yaranıb, əksinə, hökumətin xərcləri də artıb və vətəndaşlar daha çox əziyyət çəkirlər.

Anlamıram ki, ETN sistemindən universitetlərə APİ üzərindən servislər təqdim etmək bu qədərmi çətindir? ETN üçün öz qurumları arasında inteqrasiya, rəqəmsal transformasiya bu qədərmi mürəkkəbdir?

Əgər bütün sənədlər ETN portalında varsa, bu portal digər qurumlara, DİM-ə, İAMAS-a və s. inteqrasiya olunub və magistrantların statusu dərhal müəyyənləşibsə, onda universitetlər yenidən sənədləri, güzəşt sənədlərini, min cür arayışları, notaril təsdiqləri nə üçün tələb edirlər?”

Ekspert xatırladıb ki, bir müddət öncə Azərbaycan prezidenti tərəfindən onlarla qanunverici akta dəyişikliklər təsdiqlənib: “Yəni əgər vətəndaşla bağlı bir dövlət qirumunda hansısa sənəd varsa digər dövlət qurumu vətəndaşdan deyil, məhz bu qurumdan inteqrasiya ilə bu sənədləri əldə etməlidir. Amma göründüyü kimi, hələlik bu normalara əməl olunmur”.

O. Gündüz əlavə edib ki, 15 ildir ölkədə eGov quruculuğu gedir, amma hələ də bu cür elementar bir proses öz rəqəmsal həllini tapmayıb. O, ümid edirəm ki, eGov-a cavabdeh olan RİNN-nin İRİA qurumu və ETN bu problemi qısa zamanda həll edib, heç olmasa, bakalavrlara bu əziyyəti yaşatmazlar.

E. KAMAL

Ana səhifəyə dön