“Qərbi Azərbaycanın tarixi və mədəni irsi” - Yeni kitab işıq üzü görüb

30 oktyabr 2023-cü ildə Azərbaycan Turizm və Menecment Universitetində “Qərbi Azərbaycanın tarixi və mədəni irsi” kitabının təqdimat mərasimi keçirilib. Kitab Tətbiqi Tədqiqatlar Fondunun Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Qərbi Azərbaycanın tarixi və mədəni köklərinin araşdırılması və təbliği” layihəsi çərçivəsində nəşr olunub.

Reyting.az xəbər verir ki, tədbirdə Turizm və Menecment Universitetinin (ATMU) professor-müəllim heyəti, tələbələr, kənardan dəvət olunmuş qonaqlar iştirak ediblər.

Tədbiri giriş nitqi ilə açan ATMU-nun prorektoru professor Zaur Bağırov deyib ki, təqdim olunan kitab müasir dövrün aktual problemlərindən birini əhatə edir.

Bildirilib ki, zaman keçdikcə dünyada vəziyyət dəyişir. Mövcud dünya nizamında baş verən dəyişikliklər yeni reallıqların öz yerini tutmasına gətirib çıxarır. Dövlətlərin durumunda baş verən dəyişikliklər vaxtilə əsarət altına düşmüş, haqqı tapdanmış xalqlara öz müstəqilliklərini bərpa etməyə, haqqını özünə qaytarmağa imkan verir. Azərbaycan da öz siyasi müstəqilliyini əldə etdikdən sonra inkişaf edir, dünya miqyasında özünəməxsus olan yerini tutur. Qarabağ müharibələrinin yekunu olaraq Azərbaycanın bütün sərhədləri daxilində süverenliyini təsdiq etməsi, beynəlxalq aləmdə haqqının tanınmasına nail olması, dünya iqtisadi məkanında layiqli yerini tutması onun düzgün istiqamətdə inkişaf etdiyinin aşkar sübutudur.

Tətbiqi Tədqiqatlar Fondunun rəhbəri İbrahim Əliyev isə Azərbaycanın müasir dövrdə üzləşdiyi peoblemlərə toxunub. Onun sözlərinə görə, Azərbaycan belə bir çətin şəraitdə ən çətin problemlərindən birini öz gücü ilə həll edib və bununla bütün mütərəqqi dünya ictimaiyyətinin rəğbətini qazanıb.

Qeyd olunub ki, bu gün Azərbaycanın maraqları, onun haqqı ilə hesablaşırlar. Onun maraqlarına münasibətdə ikili yanaşma standartları hər addımda müşahidə edilsə də, Azərbaycanın möhkəm mövqeyi, qəti iradəsi sayəsində yekun olaraq haqqı tanınır.

Xatırlanıb ki, Azərbaycan tarix boyu, xüsusilə XIX-XX əsrlərdə çox ədalətsizliklə üzləşməli olub. Ərazisi işğal olunaraq, güclü qonşuları tərəfindən bölüşdürülüb. Dövlətçiliyi ləğv edilib. Torpaqlarının xeyli hissəsi qonşularına verilib. İtirdiklərini geri qaytara bilməməsi üçün onun iradəsini qırmağa, tarixini və mənəviyyatını saxtalaşdırmağa çalışıblar. Lakin tarix sübut etdi ki, bu iradəni məhv etmək mümkün deyil. İtirilənlər qayıtmalıdır, Azərbaycanın haqqı bütün tarixi torpaqlarında bərpa olunmalıdır.

İndiki nəslin, onun gənclərinin, ziyalılarının müqəddəs borcu bu haqqın arxasında durmaq, onun yerini tapmasına nail olmaqdır. Bu məsələ Azərbaycanın indiki sərhədlərindən kənarda olan ərazilərdə tarixi haqqımıza, mədəni irsimizə sahib olmaq, bu həqiqəti dünyada tanıtmaqdır.

Dünyada mövcud olan beynəlxalq normalardan biri sərhədlərin toxunulmazlığıdır. Azərbaycan bu qanuna hörmət edir, lakin bizə aid olanı inkar etmək, onları unutmaq fikrimiz yoxdur. Ən azı biz həqiqi tariximizi bilməliyik, bizə məxsus olan mədəniyyətə sahib çıxmalıyıq.

Digər çıxışçı G. Qafarova deyib ki, ərazilərimizin bir hissəsinin daxil olduğu qonşu dövlətlərdə zaman-zaman haqqımızın pozulmasının şahidi oluruq. Burada bizim tarixi torpaqlarımızda Rusiya imperiyasının və Sovet rejiminin yaratdığı Ermənistanda tariximizə, mədəniyyətimizə, yer adlarımıza, abidələrimizə qarşı düşmənçiliyin qatı nümunələrindən birini görürük. Buna görə də həmin məsələlərin qaldırılması, işıqlandırılması, dünyaya çatdırılması, yaddaşlarımıza həkk olunması onların qayıtması üçün vacib şərtlərdəndir.

Təqdimat mərasimində maraqlı müzakirələr aparılıb, nəşr olunmuş kitabın əhəmiyyəti vurğulanıb. İştirakçılara kitab paylanıb.