Yeddi sui-qəsd cəhdindən sağ çıxan Deyf yenidən hədəfdədir

HƏMAS-ın son illərdə İsrailə qarşı ən böyük əməliyyatı yenidən gündəmə gələn Deyfin taleyi bəlli olub. İsrail kəşfiyyatının axtarış siyahısında birinci yerdə olan və dəfələrlə sui-qəsdə məruz qalan Deyfin görüntüləri şok yaradıb.

Reyting.az xatırladır ki, bu günə qədər Məhəmməd Deyfin yeriyə və qolunu hərəkət etdirə bilmədiyini iddia olunurdu. Lakin İsrail mətbuatı məlumatın həqiqətə uyğun olmadığını yazır.

Deyfin həyatı haqqında çox az şey məlumdur. Qəzza küçələrində belə Deyfi tanıyan çox az adam var. Hətta o, İsrail kəşfiyyatının əlinə keçməmək üçün müxtəlif ünvanlarda gecələyir. Bu səbəbdən “Qonaq” ləqəbini alıb.

Məhəmməd Deyf

İsrail ordusunun bu yaxınlarda əldə etdiyi görüntülərə görə, illərdir təqib olunan HƏMAS-ın Əl-Qəssam Briqadalarının lideri Məhəmməd Deyf sağdır və heç bir fiziki qüsuru yoxdur.

“Jerusalem Post” qəzeti haqqında yazır:

“Qəzza zolağında kəşfiyyat məlumatlarının toplanması əməliyyatları zamanı çəkilən videolardan birində Deyf azacıq axsaq olsa da, öz ayaqları üzərində yeridiyi görünür. Bu videolardan aydın olur ki, Deyfin vəziyyəti İsrailin onu yaralamasına inanması ilə müqayisədə qat-qat yaxşıdır. Deyf təkbaşına yeriyə bilir və əlil arabasından istifadə etmir. O, yəqin ki, hər iki əlindən istifadə edir”.

Xatırladaq ki, Deyf HƏMAS-a 1980-ci illərin sonlarında yaradılarkən qoşulub. İsrailə qarşı silahlı mübarizəyə inanan Deyf təşkilatın hərbi qanadı olan İzzəddin əl-Qəssam Briqadalarının sıralarında yüksəlib.

ABŞ Dövlət Departamentinin keçmiş antiterror müşaviri, təhlükəsizlik üzrə ekspert Metyu Levitt deyir ki, Deyf HƏMAS daxilində sərtliyi ilə tanınır. O, 1990-cı illərdə öldürülən HƏMAS-ın komandirlərindən biri, “Mühəndis” ləqəbli Yəhya Ayyaşa yaxın şəxslərdən olub.

Ayyaş 1990-cı illərin əvvəllərində İsraildə bir sıra avtobus partlayışlarında təqsirli bilinirdi. Mühəndis 1996-cı ildə öldürülüb. Bundan sonra da avtobus partlayışları baş verib. Ayyaşdan sonra qisas hücumlarının arxasında Deyf durub. Bu isə Deyfin təşkilatdakı mövqeyini yüksəldib. 2002-ci ildə HƏMAS-ın qurucularından olan Salah Şehada öldürüldükdən sonra Deyf HƏMAS-ın hərbi qanadına rəhbərlik edib.

Deyf rəhbərlik etdiyi dövrdə HƏMAS-ın Qəssam raketlərini və Qəzzanın altında hörümçək toru kimi yayılan tunelləri layihələndirən şəxs kimi tanınır. Deyfin İsrail ordusu tərəfindən tutulmamaq üçün həyatının çox hissəsini bu tunellərdə keçirdiyi və HƏMAS-ı oradan idarə etdiyi iddia olunur.

Deyf üçün məxfilik ölüm-dirim məsələsidir. O, 2000-ci illərdə İsrailin dörd sui-qəsd cəhdindən sağ çıxa bilib. Deyfə qarşı beşinci sui-qəsd 2014-cü ildə İsrailin Qəzza əməliyyatı zamanı həyata keçirilib. İsrailin Şeyx Rıdvan məhəlləsinə endirdiyi hava zərbəsi nəticəsində Deyfin həyat yoldaşı Vidad və azyaşlı övladı Əli həlak olub. İsrail Deyfin də evdə olduğunu zənn edibmiş, amma belə olmayıb.

Hücumdan qısa müddət sonra HƏMAS Deyfin hələ də sağ olduğunu və hərbi əməliyyata rəhbərlik etdiyini açıqlayıb. Təhlükəsizlik mütəxəssisləri hesab edirlər ki, Deyf müasir kommunikasiya texnologiyalarından istifadə etmədiyi üçün onu tapmaq müşkülə çevrilib.

V. QULİYEV

Ana səhifəyə dön