Akademikin beyni 2 ildir dondurulub

Dünyada milyonlarla insan ölümündən əvvəl son arzularını bildirir. Hər kəs üçün fərqli olan bu arzu insandan insana dəyişir.

Çinli akademik Li Zehounun 2010-cu ildəki son arzusu olduqca qeyri-adidir. Şəxsin arzusu konkret olub - beyni dondurulsun, 300 və ya 500 ildən sonra çıxarılsın.

Reyting.az xəbər verir ki, bu qeyri-adi tələbin sahibi Li Zehou 1954-cü ildə Pekin Universitetinin fəlsəfə fakültəsini bitirib və Çin Sosial Elmlər Akademiyasında əvvəlcə baş elmi işçi, sonra isə Parisdəki Beynəlxalq Fəlsəfə Kollecində müəllim işləyib. O, sonradan həyatı boyu beyinlə bağlı elmi inkişafları yaxından izləyib və fəlsəfi araşdırmalara kömək edəcək irəliləyişlərə imza atıb.

Linin işi 1980-ci illərdə Çin akademiyasına böyük təsir edəndə o, Çin estetikası və fəlsəfəsində aparıcı şəxs kimi tanınıb.

O, Çin və Paris də daxil olmaqla, dünyanın müxtəlif tədqiqat institutlarında çalışıb. 1992-ci ildə ABŞ-a köçüb və 1999-cu ildə təqaüdə çıxana qədər Kolorado Kollecində dərs deyib.

Müasir alim hesab edilən Li Zehou 2021-ci ilin noyabrında 91 yaşında Koloradoda vəfat edib.

Li Zehou təəccüblü son istəklərini ilk dəfə 2010-cu ildə, 80 illik yubileyindən qısa müddət əvvəl “Southern People Veekly” jurnalına verdiyi müsahibədə açıqlayıb:

“Mənim məzar daşım olmayacaq, amma beynimi donmuş vəziyyətdə qoyacam. 300, 500 ildən sonra çıxarın. Arvadıma və uşağıma da dedim. Bəziləri bu şəkildə dirilmək istərdi, amma dirilməyi düşünmürəm.

Görəsən, mədəniyyət beyinə təsir edirmi və bir neçə yüz ildən sonra beynimdə Çin mədəniyyətinin qalıqlarını tapılacaqmı?

Bunun mümkün olub-olmadığını və Ji Dian (yağış) nəzəriyyəmi sübut etməyə çalışıram”.

Qeyd edək ki, Li Zehou Ji Dian nəzəriyyəsini 1960-cı illərdə inkişaf etdirib. O, insanın tarix və mədəniyyətə məruz qalmasının beynin fiziki quruluşunda iz buraxa biləcəyini iddia edir.

2020-ci ildə, 90 illik yubileyindən əvvəl jurnala verdiyi ikinci müsahibəsində Li, bir daha son arzularını ifadə edərək, beyninin “beyin elmi” kifayət qədər inkişaf edənə qədər saxlanılmasını istədiyini deyib. Amma onun arzusunun gerçəkləşməməsi ehtimalı 95 faizdir.

Linin dostları da daxil olmaqla, Çində demək olar ki, hər kəs onun istəyinə şübhə ilə yanaşır. Çünki onun tələbi cəsədlərin bədən bütövlüyünün qorunub saxlanılması ilə bağlı ənənəvi Çin inancına ziddir.

Lakin sonrakı illərdə Li ilə dostluq edən və onun bir çox kitablarını redaktə etmiş Ma Qunlin bu yaxınlarda bilib ki, alimin ailəsi onun öldüyü gün krionika şirkəti ilə əlaqə saxlayıb. Bu o deməkdir ki, onun beyni 2 ildən artıqdır soyuducu anbardadır.

Qeyd olunur ki, Linin beyni Arizonada yerləşən “Alcor Life Extension Foundation” adlı qeyri-kommersiya təşkilatı tərəfindən dondurulub.

V. QULİYEV

Ana səhifəyə dön