SSRİ rəhbərinə məxsus olmuş "Mersedes" satılır

Sovet İttifaqı Kommunist Partiyası Mərkəzi Komitəsinin keçmiş baş katibi Leonid İliç Brejnevə məxsus olmuş Almaniya istehsalı “Mercedes-Benz 450 SLC” satışa çıxarılıb.

Reyting.az "Motor" nəşrinə istinadla bildirir ki, bu köhnə avtomobil heç bir yerli elanda açıq şəkildə təklif edilməsə də, təxmini dəyəri də artıq hər kəsə məlumdur. L.İ.Brejnevin avtomobili Rusiyada 20 milyon rubla, yəni 221 min ABŞ dollarına satıla bilər.

Xatırladaq ki, "Mercedes-Benz 450 SLC" SSRİ-yə o vaxt Almaniya kansleri olmuş Villi Brandtın sayəsində 1973-cü ildə gətirilib. O, öz dövrü üçün yeni, həmçinin klassik model hesab edilən avtomobili Sovet İttifaqının rəhbəri Leonid Brejnevə hədiyyə edib. Premium kupe isə vaxtilə SSRİ daxili işlər naziri olmuş İqor Şelekovun oğlunun adına sənədləşdirilib, az sonra isə rəhbərə məxsus avtomobil kimi rəsmiləşdirilib.

Maşın həvəskarı olan Brejnevin belə bir bahalı hədiyyədən, eləcə də keyfiyyətinə görə digər xarici avtomobillərdən seçilən "Mercedes"-dən istifadə edib-etmədiyi dəqiq bilinmir.

Ancaq güman edilir ki, Brejnev məşhur avtomobil həvəskarı kimi və eləcə də kolleksiyaçı olaraq bu maşını dəfələrlə sınaqdan keçirib.

Bəzi hesablamalara görə, Brejnevin şəxsi kolleksiyası Xüsusi Təyinatlı Qarajda, yəni hökumət bağ evlərində saxlanılan, eləcə də rəsmi olaraq KP Mərkəzi Komitəsinin aparatına aid olan yüzlərlə avtomobildən ibarət olub.

Sovet rəhbərinə hədiyyə edilmiş xüsusi modelə malik bu "Mercedes-Benz 450 SLC" demək olar ki, istifadə olunmayıb - kupenin yürüşü 32 min kilometri keçmir. Lakin bununla belə, maşın alıcısı uzun müddət dayanmaların nəticələrini aradan qaldırmaq üçün SSRİ liderinə məxsus olmuş bu avtomobili əldə etmək üçün çoxlu pul xərcləməli olacaq. Nadir maşın sayıldığına görə, həmçinin avtomobillə bağlı toplanan bütün lazımi sənədlərin satış zamanı sənədləşmələrdə əlavə ediləcəyi bildirilir.

Nəşr yazır: "Daha bir problemi həll etmək lazım gələcək, çünki bu avtomobil indiyə qədər Sovet İttifaqında qeydiyyatdadır. Hələ də Moskva qeydiyyatı ilə, o dövrün qara seriyası ilə. Brejnevə hədiyyə olaraq verilmiş "Mercedes-Benz 450 SLC" zavoddan çıxarkən 225 at gücü hasil edən 4,5 litrlik atmosferli güclü V8 mühərriki ilə təchiz edilib. Mühərrik isə 3 pilləli avtomatik transmissiya ilə işləyir".

Bu avtomobil baş katibin kolleksiyasında yeganə "Mercedes-Benz" olmayıb, çünki 1960-cı illərin sonlarından Brejnevin kolleksiyasında "280 SL" Sedanı var idi və 1970-ci illərin ikinci yarısından sonra isə qaraja bir neçə alman markalı avtomobil əlavə olunub.

Bununla belə baş katibə məxsus qarajda olan avtomobilin Rusiyada satışa çıxarıldığına dair hələ də dəqiq bir əminlik yoxdur. Hərdən belə bir təsəvvür yaranır ki, sanki satışın elanı da xəsisliklə yayılır.

Digər tərəfdən, L. Brejnevin şəxsi kolleksiyasına aid olsa belə, yenə də "SLC 450"-nin sahibinin kim olmasından asılı olmayaraq, bu vəziyyətdə və az yürüşlü kupe klassik kolleksiyaçılar üçün kifayət qədər maraqlıdır.

Oqtay QORÇU

Ana səhifəyə dön