Əmisi oğlunun arvadına "gözü düşən" şəxsin ölümü bağlı məhkəmə prosesi başa çatıb

Sumqayıt Ağır Cinayətlər Məhkəməsində doğma əmisi oğlunu qətlə yetirməkdə təqsirləndirilən Tural Hacıyevin cinayət işi üzrə məhkəmə prosesi başa çatıb.

Reyting.az-ın məlumatına görə, TNS hadisənin təfərrüatlarını əldə edib.

İttihama görə, hadisə Şamaxı rayonunun Mədrəsə qəsəbəsində qeydə alınıb. Rayon sakini, 18 yaşlı Hacıyev Ramin Zaur oğlunun iplə boğularaq qətlə yetirilməsi barədə polisə məlumat daxil olub. Müəyyən edilib ki, Ramin Hacıyevi öz əmisi oğlu, 29 yaşlı Hacıyev Tural Mahir oğlu qətlə yetirib.

Mədrəsə qəsəbə sakini Tural Hacıyev gecə saatlarında yaşadığı ünvanda mobil telefonunun zənginə oyanıb, həyat yoldaşının yatdığı otağa daxil olarkən, əmisi oğlu, 2005-ci il təvəllüdlü Ramin Hacıyevi orada iki çarpayının arasında uzanmış vəziyyətdə görüb.

O, dərhal qonşuluqda yaşayan atasına zəng edərək, evə çağırıb, hadisə barədə məlumat verib. Bundan sonra ata-oğul birləşərək gənc oğlanın əllərini iplə bağlayıblar. Sonra Tural atasından evindəki tüfəng və patronları gətirməyi xahiş etsə də, atası onun sözünə əməl etməyib. T. Hacıyev Ramini əli-qolu bağlı vəziyyətdə döyərək işgəncələr verib.

Daha sonra Tural əmisi oğlunun əllərini açaraq, həmin ipi onun boğazına bağlayıb, mətbəxə aparıb. O, Ramini mətbəxdəki stulun üzərinə çıxarıb boynuna keçirdiyi ipin bir ucunu tavana bağlayıb, ayağının altındakı oturacaq stulunu çəkib. Asılı vəziyyətdə qalan Ramin boğularaq, ölüb.

“Atama dedim ki, tüfənglə patronu gətirsin, onu güllələyim”

Məhkəmədə ifadə verən təqsirləndirilən şəxs bildirib ki, o, 2017-ci ildən ailəlidir, 2 uşağı var. Əmisi oğlu Ramin qohum kimi onlara gəlib-gedib, ondan heç vaxt şübhələnməyib: “Hadisə vaxtı əmim oğlu Ramini həyat yoldaşımla yataq otağımda tutdum. Həmin gün səhər tezdən mal bazarına gedəcəkdim. Ona görə səhər tezdən uşaqları narahat etməmək üçün qonşu otaqda yatdım. Telefonum isə yataq otağımda qalmışdı. Telefonun səsinə oyanıb yataq otağına keçəndə Ramini 2 çarpayının arasında uzanmış görüb şoka düşdüm. Atama zəng vurub tüfəngi və 2 ədəd patron gətirməsini istədim. Dedim ki, onu güllələyəcəm. Atam gələnə qədər ona bir yumruq vurdum. Atam da vəziyyəti görüb, hər şeyi başa düşdü. İp gətirib onun ayaqlarını bağladım. Atam dedi ki, ona heç nə etməyim, polisə verim. Mən isə razılaşmayıb, atamı evinə göndərdim.

"Ramin yalvardı ki, buraxım, özünü öldürsün”

Ramin mənə yalvarmağa başladı. Dedi ki, onsuz da burdan çıxandan sonra özünü öldürəcək. Mənə yalvarsa da, baxmadım. Onun əlini və ayaqlarını açıb həmin ipi boğazına keçirib, arxamca dəhlizdəki mətbəxə gətirdim. Ramin özü dizlərini qoyub mətbəxdəki stulun üstünə çıxdı, ipi taxta arakəsməyə bağladı. Əli-ayağı əsirdi. Sonra üzərinə çıxdığı stulu öz ayağı ilə aşırdı. Bundan sonra mən həyətə çıxıb 102 xidmətinə zəng vurdum, əmim oğlunu öldürdüyümü dedim”.

“Anamgil Turala yalvardı ki, Ramini öldürməsin”

Məhkəmədə şahid qismində dindirilmiş T. Hacıyevin həyat yoldaşı bildirib ki, Turalla ailə qurana qədər Raminlə heç bir münasibətləri olmayıb: “Ailə qurandan sonra Ramin "Whatsapp" vasitəsilə danışıb, məndən xoşu gəldiyini bildirdi. Mən isə ona dedim ki, ailəliyəm, bu münasibət alınmayacaq. Hadisə baş verən gecəsi Ramin mənə zəng edib dedi ki, bizə gəlir, mənə üzbəüz söz demək istəyir. Mən israr etsəm də, o, gecə saat 12-də bizə gəldi, yataq otağıma girdi. Ona dedim ki, sözünü de, çıx get. O isə dedi ki, sözünü səhər deyəcək. O, çarpayıların arasına girib orada uzandı. Saat 2-3 radələrində otaqda Turalın telefonuna zəng gəldi, Tural zəngin səsinə otağa girəndə Ramini gördü. Tural atasına zəng vurub tüfəngi və patronları gətirməsini istədi. 10-15 dəqiqə sonra qayınatam otağa gəldi, amma tüfəngi gətirmədi. Tural stolun üstündəki bıçağı götürüb, həyətdəki ipi kəsib geri qayıtdı. Həmin iplə Raminin əl-ayağını bağladı. Sonra Tural mənim anama və qardaşıma zəng vurub çağırdı. Anam, qardaşım və qayınanam evə gəlib hadisəni gördülər. Onlar Turala yalvardılar ki, Ramini öldürməsin, buraxsın, onsuz da o özünü öldürəcək. Tural isə “ya onu öldürəcəm, ya da özümü”, - deyib Raminin boğazına ip salıb mətbəxə apardı. Sonra Tural qayıdıb dedi ki, Ramini öldürdü. Anamgil onu xilas etməyə getmək istəsə də, Tural onlara evdən çıxmağa icazə vermədi. Sonra Tural həyətə çıxıb polisə zəng vurdu, əmisi oğlunu öldürdüyünü dedi”.

Sumqayıt Ağır Cinayətlər Məhkəməsində T. Hacıyev və onun atası M. Hacıyevə hökm oxunub. Məhkəmənin hökmü ilə T. Hacıyev 11 il müddətinə azadlıqdan məhrum, M. Hacıyev 3 il şərti azadlıqdan məhrum edilib.

Ana səhifəyə dön