“Yaşıl Dünyanın Qarabağ Modeli” müsabiqəsi yekunlaşıb

25 dekabr 2024-cü ildə UNEC-in əsas binasında “Yaşıl Dünyanın Qarabağ Modeli” adlı ümumrespublika elmi məqalə müsabiqəsinin yekununa həsr olunmuş tədbir keçirilib.

Reyting.az xəbər verir ki, müsabiqəni UNEC Tədqiqat mərkəzlərinin işinin əlaqələndirilməsi və təşkili şöbəsi ilə UNEC Qarabağ İqtisadi Araşdırmalar Mərkəzi «Baku Steel Company» QSC-nin dəstəyi ilə reallaşdırıb.

Xatırladaq ki, Azərbaycan Respublikası Prezidentinin 25 dekabr 2023-cü il tarixli Sərəncamı ilə 2024-cü il Azərbaycanda «Yaşıl dünya naminə həmrəylik ili» elan olunub. UNEC rektoru bunu rəhbər tutaraq 2024-cü ili «Yaşıl UNEC ili» (Green UNEC) elan edib. Keçirilən müsabiqə də bununla bağlı Tədbirlər Planının icrasını təmin etmək məqsədi daşıyıb.

Müsabiqənin məqsədi ölkənin ali təhsil və elmi-tədqiqat müəssisələrinin professor-müəllim heyətinin, doktorant, magistr və tələbələrinin Qarabağın iqtisadiyyat quruculuğunda ekoloji problemlərin və yaşıl dünya konsepsiyasının mahiyyətinin öyrənilməsi, regionun təbii resurslarından qənaətlə istifadə, yaşıl enerji infrastrukturunun yaradılması və qlobal ekoloji problemlərin həlli yolları üzrə tədqiqatların aparılmasının təşviqindən ibarət olub.

Elmi məqalə müsabiqəsinin əsas istiqamətləri kimi:

Qarabağda yaşıl iqtisadiyyat quruculuğunun strateji aspektləri;

Qarabağın yaşıl enerji zonasına çevrilməsi prioritetləri;

Qarabağın təbii ehtiyatlarından səmərəli və qənaət rejimində istifadə edilməsinin aktual problemləri;

Qarabağın ekoloji-iqtisadi sisteminin formalaşdırılması və inkişaf etdirilməsi istiqamətləri;

Azərbaycanın COP29 kontekstində qlobal ekoloji problemlərinin həllində rolunun artması məsələləri götürülüb.

Müsabiqədə baxılan elmi istiqamətlər bu il böyük uğurla Azərbaycanda reallaşdırılan və qlobal iqlim dəyişkilikləri ilə bağlı problemlərə həsr olunan COP29 kontekstində müstəsna əhəmiyyət kəsb edir. Müsabiqə iştirakçılarının təqdim etdikləri məqalələrdə alternativ enerji resurslarının formalaşdırılması, yaşıl iqtisadiyyat quruculuğunun tərkib elementlərinin müəyyənləşdirilməsi, Qarabağın yaşıl iqtisadiyyat və yaşıl enerji sahəvi strukturunun formalaşdırılması, xüsusilə günəş enerjisindən səmərəli istifadə, su mənbələrinin ehtiyatlarının qiymətləndirilməsi, regionun ekoloji problemlərinin həll olunması problemləri və həlli yolları daha çox aktuallıq təşkil edir.

Qeyd edək ki, ümumrespublika elmi məqalə müsabiqəsinin keçirilməsi ilə əlaqədar əvvəlcədən mətbuatda müvafiq elanlar verilib, materiallar dərc olunub və ali təhsil müəssisələrinə məktublar göndərilib. Müsabiqə haqqında məlumatlar UNEC-in saytında yerləşdirilib, sosial media platformalarında təbliğat və təşviqat işləri görülüb.

Müsabiqənin Təşkilat Komitəsinin ünvanına ölkənin müxtəlif elm və ali təhsil müəssisələrindən, tədqiqat institutlarından və mərkəzlərindən, müstəqil tədqiqatçılardan 90 məqalə daxil olub. Məqalələrin qiymətləndirilməsi zamanı əsas meyarlara məqalənin adının məzmuna uyğunluğu;

aktuallığı;

elmi məzmunu;

praktikliyi və əsaslandırma dərinliyi müəyyənləşdirilib.

Müsabiqədə iştirak edən müəlliflərin coğrafi dairəsi ölkəmizin əksər universitetlərini və elmi-tədqiqat müəssisələrini, o cümlədən Azərbaycan Dövlət İqtisad Universiteti, Bakı Dövlət Universiteti, Azərbaycan Dövlət Neft və Sənaye Universiteti, Naxçıvan Dövlət Universiteti, Bakı Mühəndislik Universiteti, Azərbaycan Dövlət Pedaqoji Universiteti, Xəzər Universiteti, Azərbaycan Texniki Universiteti, Azərbaycan Texnologiya Universiteti, Azərbaycan Memarlıq və İnşaat Universiteti, Sumqayıt Dövlət Universiteti, Bakı Biznes Universiteti, Mingəçevir Dövlət Universiteti, Azərbaycan Dillər Universiteti, Azərbaycan Kooperasiya Universiteti, Azərbaycan Universiteti, Gəncə Dövlət Universiteti, Azərbaycan Dövlət Dəniz Akademiyası, Milli Aerokosmik Agentliyinin Ekologiya İnstitutu, Elm və Təhsil Nazirliyinin akademik H.Ə.Əliyev adına Coğrafiya İnstitutu, Elm və Təhsil Nazirliyinin Təbii Ehtiyatlar İnstitutu, Elm və Təhsil Nazirliyinin Fizika İnstitutu, Ədliyyə Nazirliyinin Məhkəmə Ekspertizası Mərkəzi, Azərbaycan Tibb Universiteti, İqtisadiyyat Nazirliyinin İqtisad Elmi-Tədqiqat İnstitutu, Azərbaycan Əmək və Sosial Münasibətlər Akademiyası, Dövlət Gömrük Akademiyası, Elm və Təhsil Nazirliyinin Torpaqşünaslıq və Aqrokimya İnstitutunu əhatə edib.

Müsabiqənin yekunu olaraq, professor-müəllim heyəti, doktorant, magistr və tələbələr üçün iki nominasiya üzrə hər bir nominasiyada ilk 3 yeri tutanlara pul mükafatları verilib. Bundan əlavə, hər iki nominasiya üzrə 13, cəmi 26 elmi məqalə müsabiqəsi iştirakçısı sertifikatlara layiq görülüblər. Ümumilikdə 80 məqalənin toplu şəkildə elektron - kitab formatında nəşr edilməsi və UNEC-in rəsmi saytında yerləşdirilməsinə qərar verilib.

Tədbirin moderatoru - UNEC TMİƏT şöbəsinin müdiri Rəna Hüseynova bildirib ki, «Yaşıl dünya naminə həmrəylik ili» və «Yaşıl UNEC ili» çərçivəsində təsdiq olunmuş Tədbirlər Planının icrasını təmin etmək məqsədilə UNEC Tədqiqat mərkəzləri tərəfindən bu il ərzində bir çox silsilə tədbirlər təşkil edilib. Bu tədbirlərlə bağlı videoçarx da nümayiş olunub.

UNEC-in elm üzrə prorektoru professor Rövnəq Rzayev tədbirin əhəmiyyətindən, millət vəkilləri Vüqar Bayramov və Tural Gəncəliyev isə Qarabağın yaşıl iqtisadiyyat quruculuğunun iqtisadi-siyasi aspektlərindən xüsusi danışıblar.

UNEC Qarabağ İqtisadi Araşdırmalar Mərkəzinin rəhbəri professor Şəfa Əliyev və “Baku Steel Company” QSC-nin nümayəndəsi Şeyla Hacıyeva universitet-sənaye əməkdaşlığının genişləndirilməsinin vacibliyindən, gənclərin elmi tədqiqatlara cəlb olunmasının stimullaşdırılmasının əhəmiyyətindən söz açıblar.

Tədbirin sonunda qaliblər mükafatlandırılıb və sertifikatlar təqdim edilib.