Məşhur şirkət ağır cinayətdə ittiham olunur

Belçika hökuməti ABŞ-nın dünya şöhrətli, həmçinin ən varlı korporasiyalarından birinə qarşı sərt qərar verib. Bu dövlətin hüquq-mühafizə orqanları qeyri-qanuni minerallara görə "Apple" şirkətinə qarşı cinayət təhqiqatına başlayıb

Reyting.az "Financial Times" nəşrinə istinadla bildirir ki, rəsmi Brüsselin "Apple"-yə qarşı başlatdığı tədqiqat və ilkin mərhələdə cinayət işinin açılması xəbəri artıq öz təsdiqini tapıb.

Məlumata görə, Amerikanın tanınmış texnologiya nəhəngi Konqo Demokratik Respublikası ərazisində uzun müddətdir tamamilə qanunsuz fəaliyyət göstərən silahlı qruplardan "bilərəkdən" "qan mineralları" almaqda ittiham olunur.

2024-cü ilin dekabrında Konqo ilk dəfə hərəkətə keçib Belçikada, həmçinin Fransada sərbəst şəraitdə, eləcə də vergi ödəyiciləri kimi fəaliyyətdə olan "Apple" törəmə şirkətlərinə qarşı qalmaqallı belə bir ittiham motivli iddia qaldırıb.

Bildirilir ki, Afrika ölkəsinin hakimiyyət orqanları çox ciddi faktlar təqdim etməklə, Amerikanın nəhəng şirkətini silahlı qruplaşmalarla işbirliyinə getməkdə təqsirli sayır. Konqonu təmsil edən rəsmilərin sözlərinə görə, ABŞ şirkəti beynəlxalq qanunlara və bütün dünyada qəbul olunan normalara tamamilə əhəmiyyət verməyib, gizli şəkildə, Konqo Demokratik Respublikasının ərazisindən qeyri-qanuni hasil edilən minerallardan istifadə edib.

Belçikalı prokurorlar hətta artıq istintaqa nəzarət etmək üçün müstəntiq hakimi də təyin ediblər. Bu isə o deməkdir ki, onlar səlahiyyətli şəxslər kimi həbsə orderlərin verilməsi, tədqiqatlarda adı keçən hər bir şübhəlinin telefonunun dinlənilməsinə və reydlərin keçirilməsinə cavabdehdirlər.

İddiada qeyd olunur ki, Amerika nəhəngi "Apple" şirkəti "iPhone"-ların istehsalına yardım üçün bütün dünya ehtiyatlarının yarıdan çoxunun Konqoda olduğu çox az tapılan tantalı alıb. Üstəlik, "Apple" ilə silahlılar arasında qurulan bu qeyri-qanuni ticarətdən əldə edilən bütün gəlirlər Konqonun şərqində döyüşlərdə iştirak edənlərə dəstək üçün yönləndirilib.

Nəşr yazır ki, həmin silahlı qruplara xərclənən pullar onların nəzarətindəki istehsalçılardan əldə edilən gəlirlərdir. "Apple" ilə ticarət sayəsində Amerika şirkəti Konqodakı silahlı qruplardan xeyli qalay, volfram və qızıl alıb. İddiaçılar bu qanunsuz ticarətin hətta indi də davam etdiyini bildirirlər.

"Apple" şirkəti konqolu milislərdən qanun xaricində tantal və digər mineral almasını ilə bağlı ittihamları inadla rədd edir. "Apple" istifadə etdiyi mineralların Ruanda ərazisində yerləşən mədənlərdən, eləcə də münaqişələrdən təsirlənməyən bölgələrdən əldə etdiyini bildirib. Lakin ittiham tərəfi şirkətin bəyanatını doğru saymır və iddia edir ki, "Apple", həm də digər nəhənglər üçün sertifikatlaşdırma prosesi çox ciddi şəkildə qüsurlu sənədləşdirilib.

"Apple" şirkətinin Afrika ölkəsində böyük cinayət əməllərinə yol verdiyini, eləcə də bilərəkdən yerli qanunsuz silahlı qrupla əlbir işlədiyini bəyan edən ittihamçıların fikrincə, Ruandadan gəldiyi iddia olunan minerallar əslində Konqo mədənlərində hasil edilir.

Böyük bir hüquq firmasının rəhbəri kimi Konqo Demokratik Respublikasını təmsil edən Robert Amsterdam deyib ki, Yer üzündə elə bir texnologiya şirkəti yoxdur ki, Ruandanın ərazisindən aldığı məhsulun 90 faizinin Konqoya aid olduğunu bilməsin.

Oqtay QORÇU

Ana səhifəyə dön