Bir milyon dollarlıq qarışqa yükü tutulub

Keniyada, dünyada indiyə qədər təsadüf edilməyən qeyri-adi bir qaçaqmalçılığın qarşısı alınıb. Bu, qarışqa yüküdür.

Reyting.az "Reuters"-ə istinadla bildirir ki, Keniyaya səfər edən iki belçikalı gənc yüksək gəlir əldə etmək üçün unikal üsula əl atıblar. Onlar qaçaqmalçı kimi təxminən 10 000 dollar dəyərində olan 5000 "Messor Cephalotes" adlanan nadir növ “kombayn qarışqasını” qeyri-qanuni yolla ixrac etməyə cəhddə ittiham olunurlar.

Bildirilir ki, nadir həşəratlar, Belçika vətəndaşlarının istirahətdə olduğu Naivaşa şəhərindəki kirayə götürülmüş evdə aşkar edilib. Araşdırmalar nəticəsində məlum olub ki, ələ keçən şəxslər qarışqaları Avropanın və Asiyanın qara bazarlarında, eyni zamanda ayrı-ayrı adamlara satmaq üçün toplayırmış. İstintaqçılar müəyyən ediblər ki, bu cür nadir qarışqa növlərinə kolleksiyaçılar, formikarium həvəskarları arasında xüsusi tələbat var.

Məhkəmə zamanı müttəhimlər heç bir pis niyyətlərinin olmadığını və bu qarışqaları "əylənmək məqsədi ilə" yığdıqlarını deyiblər. Lakin keniyalı hakim səsləndirilən fikirlərin qeyri-inandırıcı olduğunu bildirib. Hakimin sözlərinə görə, nadir növ qarışqaların toplanmasında minlərlə şəxs iştirak edib.

Keniya məhkəməsi Belçika vətəndaşlarını 6,7 min avro cərimələyib. Məhkəmə daha sonra gənclərə xəbərdarlıq edib ki, cəriməni vaxtında ödəməsələr, Keniyada məhkum həyatı yaşayacaqlar.

Proses zamanı təqsirləndirilən şəxslər keniyalı hakimin qarşısında törətdikləri qanunsuz əməlləri etiraf ediblər.

Nadir növdən olan və Keniya sakinlərinin “kombayn” adlandırdıqları, lakin elm aləmində Biçerdöver kimi tanınan bu qarışqalar digər qarışqalardan seçilir. Bu qarışqaların fərqli qırmızı-qəhvəyi rəngi olur. Biçerdöver qarışqaları koloniyanın daxilində bəzək görünüşü və davranışlarına görə çox yüksək qiymətləndirilir.

Qaçaqmalçılıq yolu ilə xaricə daşınılması mümkün olmayan, yerli hüquq-mühafizə orqanları tərəfindən keçirilən əməliyyat nəticəsində elə Keniyanın öz ərazisində müsadirə edilən, nadir qarışqalar barədə ölkənin daha bir dövlət qurumu açıqlama yayıb.

Keniya Vəhşi Təbiət Xidməti bəyan edir ki, yükün küçə dəyəri 8,600 dollardan çox ola bilərdi. Dövlət qurumu nümayəndələri vurğulayıblar ki, baş verən bu hadisə yeni, narahatedici tendensiyaya işarə edir.

Qeyd olunur ki, brakonyerlərin təkcə iri heyvanlara deyil, daha kiçik və az görünən, lakin yerli ekosistem üçün az əhəmiyyət kəsb etməyən növlərə artan marağı təhlükəli həddə çatıb:

"Qarışqaların belə yollarla qeyri-qanuni ixracı ölkənin biomüxtəlifliyi üzərindəki suveren hüquqlarını pozur, həmçinin elmi araşdırmalara və ölkədəki yerli icmaların maraqlarına zərər verir".

Araşdırmaya görə, belçikalı gənclər nadir növ qarışqaları Avropaya çatdırsaydılar, İngiltərədəki pərakəndə satış qiymətləri sayəsində bir milyon dollar qazana bilərdilər.

Oqtay QORÇU

Ana səhifəyə dön