Məmurların cinayət işində prokurorluq əməkdaşı ifadə verib

Azərbaycan Auditorlar Palatasının Maliyyə və texniki təminat idarəsinin sabiq rəisi Vəli Rəhimov, maliyyəçi-mühasib Gövhər Əhmədova və auditor Fəridə Novruzovanın cinayət işi üzrə məhkəmə prosesi keçirilib.

Reyting.az “Teleqraf”-a istinadla bildirir ki, Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən prosesdə şahid Vəlixan Allahverdiyev ifadə verib.

Prokurorluq əməkdaşı olan Vəlixan Allahverdiyev cinayət işi üzrə hesab əməliyyatları barəsində rəyini bildirib. Qeyd edib ki, ondan öncə Auditlər Palatası yoxlama aparıb:

“İş üzrə zərərçəkmiş qismində tanınan Auditlər Palatası özü də yoxlama aparmışdı. Sonra biz yoxlama apardıq. Məlum oldu ki, bir neçə şəxs qanunsuz olaraq müxtəlif kartlara pul köçürüblər.

Yoxlama 2018-2022-ci illər ərzində aparılıb. 2019-cu ilədək pullar kassadan, növbəti illər ərzində isə Auditlər Palatasından banka, ordan da hissə-hissə müxtəlif kartlara köçürülüb”.

Təqsirləndirilən Vəli Rəhimovun vəkili Faiq Nəcəfov yoxlamanı aparan şəxsə kassa yoxlaması zamanı mədaxil və məxaric olan pulların qeydiyyatı barədə qeyd götürüb-götürmədiyi və həmin məbləğlərin həcmi ilə bağlı sual verib.

Vəlixan Allahverdiyev məbləğlərin yaddaşında əzbər qalmadığını, qeydləri isə götürdüyünü bildirib. Vəkil sualını götürülən pulların yenidən kassaya mədaxil edilməsi ilə əsaslandırıb.

Şahid yoxlama və verilən rəyin Gövhər Əhmədova və Vəli Rəhimovun ona təqdim etdiyi sənədlər əsasında aparıldığını bildirib.

Təqsirləndirilən Vəli Rəhimov Gövhər Əhmədovanı saxta sənəd verməkdə ittiham edib: “Əvvəlki prosesdə də bildirmişəm, həmçinin bununla bağlı ittiham aktında da yazılıb. Gövhər xanım 65 nəfərin adı qeyd olunan siyahını imzalamaq üçün verirdi. Ona diqqət edirdim. 65 nəfərin maaşının cəmini hesabalamırdı. Artıq yazılan məbləğ həmin cəmə əlavə olunurdu”.

Vəli Rəhimovun vəkili mühasibatlıq ekspertizasının aparılması ilə bağlı məhkəməyə vəsatət verib. Məhkəmə ekpertizanın təmin olunması və ekspertə konkret sualların verilməsi ilə bağlı qərar qəbul edib.

Növbəti məhkəmə prosesi iyulun 4-nə təyin edilib.

Qeyd edək ki, Azərbaycan Auditorlar Palatasının üç vəzifəli şəxsi xüsusilə külli miqdarda mənimsəmə faktı ilə bağlı cinayət məsuliyyətinə cəlb edilib.

Daxili araşdırma nəticəsində 2018-2023-cü illər ərzində Maliyyə və texniki təminat idarəsinin əməkdaşları tərəfindən küllü miqdarda vəsaitin mənimsənilməsi aşkar edilib. Bunu nəzərə alaraq Palata rəhbərliyi tərəfindən 2023-cü ilin 10 iyul tarixində hüquq-mühafizə orqanlarına müraciət edilib, onun araşdırılması, günahkarların məsuliyyətə cəlb edilməsi və mənimsənilmiş vəsaitin Auditorlar Palatasının hesabına qaytarılması xahiş edilib.

Palatanın maliyyə və texniki təminat İdarəsinin sabiq rəisi, baş mühasib Vəli Rəhimov, maliyyə təminatı və xarici əlaqələr idarəsinin maliyyəçi-mühasibi Gövhər Əhmədova və digər auditoru Fəridə Novruzovaya qarşı Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə ittiham irəli sürülüb.

İş üzrə dəymiş ziyan 700 min manatdır.

Cinayət işi üzrə Azərbaycan Auditorlar Palatası zərərçəkmiş qismində tanınıb.

Ana səhifəyə dön