Qərbi Azərbaycana qayıdışın hüquqi əsasları müzakirə olunub

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Tətbiqi Tədqiqatlar Fondunun reallaşdırdığı “Qərbi Azərbaycana qayıdış haqqı” layihəsi çərçivəsində “Qərbi Azərbaycan əhalisinin doğma torpaqlarına qayıtmasının hüquqi əsasları” mövzusunda seminar keçirilib.

Reyting.az xəbər verir ki, seminar 04 iyul 2025-ci ildə AMEA-nın A. Bakıxanov adına Tarix və Etnologiya İnstitutunda reallaşıb.

Tarix və Etnologiya İnstitutunun direktor müavini professor İlqar Niftəliyev seminarın günümüzün aktual bir probleminə həsr edildiyini deyib.

Direktor müavini Azərbaycanın öz ərazisində dövlət suverenliyini tam bərpa etməsi ilə böyük regional və ümumdünya miqyaslı problemlərin həllində ölkəmizin qlobal uğurlarından da söz açıb.

Layihənin rəhbəri İbrahim Əliyev məruzəsində Cənubi Qafqazda Rusiya imperiyasının yeritdiyi siyasətin mahiyyətinə və nəticələrinə diqqət yönəldib, bu siyasətdə erməni amilinin oynadığı rolu bur daha əyani şəkildə, konkret faktlarla sadalayıb.

Xüsusi qeyd edilib ki, ermənilərin regiona məqsədyönlü şəkildə köçürülməsi vaxtından və dövlət quruluşundan asılı olmayaraq dönmədən aparılıb, Rusiya imperiyası, Sovet dövləti və hazırkı Rusiya Federasiyasının siyasətində elə bir ciddi fərq olmayıb.

Cənubi Qafqazın erməniləşdirilməsi, azərbaycanlıların öz doğma yurdlarından didərgin salınması tariximizin son 200 ilinin ən ağrılı məsələlərindən biridir. Ərazilərimizin işğalı və onun iki imperiya arasında bölüşdürülməsindən sonra işğalçıların Azərbaycanın dövlətçiliyinin məhv edilməsinə, onun azadlıq ruhunun qırılması, müstəqillik iradəsinin məhvinə yönəlmiş məqsədyönlü siyasəti xalqın tarixində qara bir zolaq kimi keçir. Hər bir atılan addım, qəbul edilən qərar, həyata keçirilən məkrli siyasət həmin dövlətlərin burada ağalıqlarını əbədiləşdirmək məqsədinə xidmət edib.

Məruzəçi diqqqəti 200 illik asılılıq dövründə Azərbaycan xalqının keçmiş olduğu təkamül prosesinə yönəldib. Qeyd olunub ki, tarixə bütöv nəzər saldıqda bu xalqın düşdüyü bəladan qurtuluşu istiqamətində irəliləyişini görə bilərik. Həmin dövrün tarixini vərəqlədikcə, bir birini əvəz edən mərhələlərin, dirçəliş prosesinin boy artımını görməmək mümkün deyil. Bu təkamülün yekunu günümüzün reallığı olan Azərbaycan Respublikasının yaranması və öz haqlarını addım-addım təsdiq etməsidir. Azərbaycanın müasir dövrdə atdığı addımların, o cümlədən əhalinin vaxtilə məhrum edildiyi doğma torpaqlarına qayıdışın hüquqi əsaslarının araşdırılması diqqət mərkəzinə gətirilib.

Məruzə ətrafında müzakirələr zamanı Tarix və Etnologiya İnstitutunun professorları İlqar Niftəliyev, Qasım Hacıyev, Hacı Həsənov, Mayis Əmrahov, Ramil Ağayev, Sahibə Budaqova çıxışlarında problemin vacib məqamlarına toxunub, bu istiqamətdə aparılan işlərin vacibliyini qeyd ediblər.

Çıxışlarda yeni dünya nizamının formalaşdığı indiki məqamda Azərbaycan Respublikası Prezidentinin rəhbərliyi altında güclü bir xətt yeridildiyi vurğulanıb, onun uğurla nəticələnəcəyinə inam ifadə olunub.

Onu da qeyd edək ki, tədbirdə qoyulan məsələlər geniş müzakirə olunub və çıxışların KİV-də işıqlandırılması planlaşdırılır.