Qərbi Azərbaycanla bağlı yeni kitab nəşr olunub

“Qərbi Azərbaycana qayıdış haqqı” adlı kitab işıq üzü görüb. Kitab, Azərbaycan Respublikasının Qeyri- Hökumət Təşkilatlarına Dövlət Dəstəyi Agentliyinin maliyyəsi ilə Tətbiqi Tədqiqatlar Fondunun reallaşdırdığı eyni adlı layihə çərçivəsində nəşr olunub.

Reyting.az xəbər verir ki, 15 avqust 2015-ci ildə kitabın təqdimatı keçirilib.

Kitabda azərbaycanlıların əbədi yaşadığı Cənubi Qafqaz ərazilərinin işğalı, müstəmləkə zamanı erməni amilinin rolu və yeri, onun ictimai həyatın bütün sahələrində dərin iz qoymuş dağıdıcılıq fəaliyyətinə tutarlı faktlarla işıq salınır. Yeni nəşrdə geniş yazılı və maddi mənbələrdən əldə edilmiş məlumatlar əsasında ermənilərin və onların havadarlarının regionda məkrli siyasətinin əsl məqsədləri ön plana çəkilir, yerli müsəlman-türk əhalisinin vətən haqqının pozulması addım-addım izlənilir. Bu da, regionda Rusiyanın yüzilliklər ərzində apardığı məkrli siyasətin mahiyyətini dərk etməyə, həyatın bütün sahələrində erməni amilindən istifadə edilməklə yeridilən daçıdıcı əməlləri ifşa etməyə imkan verir.

Azərbaycan xalqının tarixinin müasir mərhələsində bu vaxta qədər itirilmiş tarixi torpaqlarımıza - doğma yurd yerlərimizə qayıdış problemi aktual şəkildə üzə çıxır. Yeni dünya nizamında köklü dəyişikliklərin getdiyi bir vaxtda yaranmış şans bu istiqamətdə addımların atılmasını zəruri edir.

Dünya durumunda baş verən dəyişikliklər vaxtilə əsarət altına düşmüş, haqqı tapdanmış xalqlara öz müstəqilliklərini bərpa etməyə, haqqını özünə qaytarmağa imkan verir. Belə bir məqam müasir dövrdə yaşanır. Azərbaycan da öz siyasi müstəqilliyini bərpa etdikdən sonra inkişaf edir, dünya miqyasında özünəməxsus yeri tutur. Qarabağ müharibələrinin yekunu olaraq Azərbaycanın bütün sərhədləri daxilində süverenliyini təsdiq etməsi, beynəlxalq aləmdə haqqının tanınmasına nail olması, dünya iqtisadi məkanında layiqli yerini tutması onun düzgün istiqamətdə inkişaf etdiyinin aşkar sübutudur.

Bu gün dünyada Azərbaycanın maraqları, halal haqqı ilə hesablaşırlar. Onun maraqlarına münasibətdə ikili yanaşma standartları hər addımda müşahidə edilsə də, Azərbaycanın möhkəm mövqeyi, qəti iradəsi sayəsində yekun olaraq haqqı tanınır.

Biz tarixi torpaqlarımızda Rusiya imperiyasının və Sovet rejiminin yaratdığı Ermənistanda tariximizə, mədəniyyətimizə, yer adlarımıza, abidələrimizə qarşı düşmənçiliyin qatı nümunələrindən birini görürük. Buna görə də həmin məsələlərin qaldırılması, işıqlandırılması, dünyaya çatdırılması, yaddaşlarımıza həkk olunması həmin ərazilərə qayıdış üçün vacib şərtlərdəndir.

“Qərbi Azərbaycana qayıdış haqqı” layihəsi şərçivəsində aparılan araşdırmalarda türk-müsəlman əhalinin yaşadığı ərazilərə ermənilərin köçürülməsi, yerləşdirilməsi, onun mərhələləri işıqlandırılır və əsl məqsədləri ortaya qoyulur. Bu da regionda Rusiyanın yüzilliklər ərzində apardığı məkrli siyasətin mahiyyətini dərk etməyə, həyatın bütün sahələrində erməni amilindən istifadə edilməklə yeridilən daçıdıcı əməlləri ifşasına imkan verir.