Tailandda tədqiqatçılar 550 minə yaxın qan nümunəsini araşdırıb və üç yerli sakində nadir B(A) qan fenotipi aşkara çıxarıblar. Bu fenotipdən olan insanlardakı qan əsasən B qrupuna aiddir.

Reyting.az-ın məlumatına görə, tədqiqatçılar deyiblər ki, ABO genində baş verən nadir dəyişikliklər səbəbindən eritrositlərdə cüzi A-oxşar işarələri yaranır və bu, standart testlərdə uyğunsuzluğa səbəb olur. Tədqiqatlarda belə hallar çox az, təxminən 0,00055 faiz və ya 180 min nəfərdən cəmi bir adamda rast gəlindiyi müəyyən edilib.

Tədqiqatçılar qrupundan olan tailandlı alimin sözlərinə görə, ola bilsin, belə nadir, həm də qədim qan qrupu fenotipi min illər əvvəl yaşayan insanlarda və ya hansısa tayfada olub.

Mütəxəssislərin fikrincə, ümumiyyətlə, elmi aləmində qəbul olunmuş nəzəriyyəyə görə, tamamilə mümkünsüz görünən, eyni zamanda mövcud olan və nadir qan qrupu sayılan B(A) fenotipi daşıyan bu insanlarla bağlı daha geniş araşdırmalar aparılmalıdır. 

Tədqiqatçılar bildiriblər ki, bu cür ziddiyyətli elmi nəticələr zaman-zaman ortaya çıxdıqda, əvvəlcə, genetik testləşmə aparmaq vacibdir. Bu cür testlər insan genetikasının sirləri haqqında daha yeni və çox maraqlı elmi məlumatlar verə bilər.

Oqtay QORÇU