Hindistan hökuməti istehsalçılara 90 günə qədər vaxt verib ki, dövlətin təqdim etdiyi "Sanchar Saathi" tətbiqini ölkədəki bütün smartfonlarda əlçatan etsinlər. Şərtə görə, bu yerli proqram həm yeni, həm də istifadə olunan cihazlarda qurulmalı və silinməməlidir.

Reyting.az xəbər verir ki, bu barədə "Reuters" agentliyi məlumat yayıb.

Məlumata görə, Hindistanın tətbiqi kibercinayətkarlıqla mübarizə, oğurlanmış telefonların tapılması və dövlət xidmətləri haqqında məlumat vermək üçün nəzərdə tutulub. Üstəlik, "Sanchar Saathi" vasitəsilə artıq 700 min itirilmiş və ya oğurlanmış telefonun məlumatları bərpa olunub.

Hindistanın əsas müxalifət partiyaları, eyni zamanda hüquq müdafiəçiləri dövlətin bu qərarını "antikonstitusion" adlandırıblar. Ölkə müxalifətinin təmsilçiləri bununla bağlı çox kəskin açıqlamalar veriblər. Böyük narahatlıq keçirən Hindistan müxalifətinin iddiasına görə, hökumət yerli tətbiqdən xüsusi məqsədlərlə vətəndaşlara nəzarət üçün istifadə edəcək. 

Qeyd olunur ki, "Apple" bu tələbi yerinə yetirməməyi planlaşdırır və narahatlıqlarını hökumətə çatdıracaq.

Oqtay QORÇU