Qənirə Paşayeva, Ramilə Sultan, Şəmsiyyə Bəylər... Qızlar, sözüm sizədir

Bir neçə gün əvvəl aliment ödəməkdən yayınmış yazarın həbsi xəbərini, hamı kimi, mən də oxudum. Ardınca dostlarının köməyi ilə, Murad Köhnəqalanın 12 min manatlıq borcunun 3 min manatını ödədiyindən məlumatlandıq. Sonra dedilər, deputat Qənirə Paşayeva işə qarışıbmış...

“Murad Köhnəqala ilə bağlı narahat olan, mənə zəng edib “kömək edin" deyənlərə məlumat vermək istəyirəm ki, o, artıq azadlıqdadır. 2 gündür bu istiqamətdə bizə dəstək olan və Murad bəyin azadlığa buraxılması üçün müraciətimə müsbət yanaşıb mənimlə birlikdə dəstək olan Ümid müəllimə, Tovuzdan olan dəyərli dostlara, məhkəmə və vəkillik sistemində olan dəyərli insanlara təşəkkür edirəm.

Murad bəyin ailəsinə ödəməli olduğu və uzun müddət yığılıb qalmış böyük məbləğ vəsaitin, alimentin bir hissəsini ödədik, hüquqi prosedurlar həyata keçirildi və onun azadlığa buraxılması mümkün oldu. Ümid edirik ki, Murad bəy artıq azadlıqda olaraq bundan sonra alimentlə bağlı qalan xərcləri yavaş-yavaş ailəsinə ödəyəcək və bir daha belə vəziyyətlə üzləşməyəcək. Allah yardımçıları olsun!”

Bunu deputatın “Facebook” hesabından bütün KİV-lər köçürmüşdü.

Qənirə Paşayeva, Ramilə Sultan, Şəmsiyyə Bəylər... Qızlar, sözüm sizədir

İnsafən, dara düşən adamlara Qənirə Paşayeva həmişə kömək əli uzadıb. Amma aliment bataqlığında boğulan Murad Köhnəqalaya xilasedici kəmər atmasının səbəbini anlamadım.

Qadınlardan kitab yazan, qrant layihələri icra edən, daha nə deyim ey, hər tədbirdə, məsələn, “biz qadınların, məişət zorakılığı da daxil olmaqla, məruz qaldığı bütün növ zorakılıqlara, hər gün ailəmizdən, ətrafımızdan başlayaraq bu cür mənfi hallara qarşı hər birimiz mübarizə aparmalıyıq”, – deyən deputatın birdən-birə kişilərin, həm də aliment ödəməkdən yayınanların tərəfinə keçməsinin məntiqini başa düşməkdə indiyədək çətinlik çəkirəm.

Sözlə əməl düz gəlmədi axı, Qənirə xanım!

...Bircə Qənirə Paşayeva olsaydı, nə dərdim-azarım!

O gün, o gün deyəndə, azərbaycanlının o günü, Space-də Elçin Əlibəylinin “El bizim-Sirr bizim” verilişinə baxıram. Mövzu cəhalətdir, bir neçə yazar yığışıb, bir nəfər də fağır ekstrasens. Ağzını açan ekstrasensi sözlə qapazlayır.

Verilişin aparıcısı Elçin Əlibəylinin jurnalist-aparıcı kimi təqdim etdiyi Ramilə Sultan hədəfə alınan kişini qaraçıya bənzətdi, sonra düz gözünün içinin baxa-baxa “dələduz” adladırdı.

Qızdakı cəsarətə bax ha!

Qənirə Paşayeva, Ramilə Sultan, Şəmsiyyə Bəylər... Qızlar, sözüm sizədir

Düzü, mən Ramilə Sultan adda jurnalisti tanımadım. Google-da axtarış verdim, dedim, bəlkə mən bu günə qədər kor olmuşam, bu jurnalistin yazısını görməmişəm, amma sonra məlum oldu ki, jurnalist-aparıcının ucsuz-bucaqsız Google-da yalnız bir neçə tədbirdə çəkdirdiyi foto var. Bir də söyüşdüyü eyni verilişin videosu.

“Bizim cəmiyyətdə qadınlar aldanmağa meylli olurlar”. Bunu da Şəmsiyyə Bəylər kimi təqdim olunan başqa bir veriliş iştirakçısı dedi. Sevindim, axır ki, sözü ilə əməli üst-üstə düşən yazara rast gəldim... amma...

Publisist Şəmsiyyə Bəylərin (əvvəllər Bəylərqızı) həyat və yaradıcılıq dəryasına baş vurduqda Google-da nələr üzə çıxmadı, nələr...

Demə, 90-cı illərin axırlarından, Təfəkkür Universitetinin müəllimi olandan geniş oxucu kütləsinə tanış imiş. 2013-cü ildəsə...“Bu gün Bakı Ağır Cinayətlər Məhkəməsində dələduzluqda təqsirli bilinən Şəmsiyyə Bəylərqızı Şəmsiyyə Bəylərqızı 10 il müddətinə azadlıqdan məhrum olunub”.

Qənirə Paşayeva, Ramilə Sultan, Şəmsiyyə Bəylər... Qızlar, sözüm sizədir

Daha sonra, 2019-un martında: “Azərbaycan prezident İlham Əliyevin bu gün imzaladığı əfv sərəncamı ilə əfv olunanlar arasında Şəmsiyyə Bəylərqızı da var”.

Uzun sözün qısası, az düşündüm, çox düşündüm, axırda bu rəyə gəldim ki, bizim cəmiyyətdə qadınlar təkcə aldanmağa yox, aldatmağa da meylli olurlar.

Sevinc ABBASOVA

Ana səhifəyə dön