Ceyhun Bayramov: "Milli kurikulum sistemi gələcək əmək bazarının tələblərinə köklənib”

Bakıda, Dövlət İmtahan Mərkəzinin təşkil etdiyi Təhsilin Qiymətləndirilməsi üzrə Beynəlxalq Assosiasiyanın 45-ci illik konfransı (IAEA 2019) keçirilir.

Reyting.az xəbər verir ki, IAEA 2019 tədbirində Azərbaycanla birgə 55 ölkədən 300-dən artıq nümayəndə iştirak edir. Builki konfrans "Qiymətləndirmə və qərarvermə: fərdi və institusional həll yolları" mövzusuna həsr olunub. Məşğələlər "XXI əsrin funksional savadlılığına uyğun olaraq təhsildə və qiymətləndirmədə dayanıqlı keçidə nail olmaq üçün təlimlərin təşkili", "Qiymətləndirmə ədalətlidirmi?", "İmtahan keyfiyyətinin təmin olunmasına dair RCEC təşkilatının dəyərləndirmə sistemi" mövzularına həsr olunur.

Konfransda çıxış edən Azərbaycanın Təhsil naziri Ceyhun Bayramov deyib ki, Təhsilin Qiymətləndirilməsi üzrə Beynəlxalq Assosiasiyanın 45-ci illik konfransı (IAEA) iki əsas sahəyə - qiymətləndirmə və qərarverməyə diqqət ayırır.

C. Bayramov bildirib ki, qiymətləndirmə üçün informasiya vacibdir və bu istiqamətdə Dövlət İmtahan Mərkəzi Azərbaycan təhsil sistemində vacib rol oynayır: "Ölkədə sosial və iqtisadi dəyişiklik təhsil sisteminin daha da təkmilləşdirilməsini tələb etdiyi üçün Təhsilin İnkişafı üzrə Dövlət Strategiyası qəbul olunub. Bu strategiya təhsilin araşdırılması mərkəzlərinin inkişafı, yüksək səviyyəli mütəxəssislərin hazırlanmasının təmin edilməsi və təhsilin beynəlxalq standartlara cavab verməsinə yönəlib”.

Nazir qeyd edib ki, Azərbaycan təhsilin hər kəs üçün əlçatan olması və bərabərliyi istiqamətində böyük uğurlar qazanıb: “Təhsilin qiymətləndirilməsi üçün Azərbaycan bir sıra beynəlxalq qiymətləndirmə sistemlərində iştirak edib".

C. Bayramov diqqətə çatdırıb ki, təhsildəki problemləri araşdırmaq, inkişafı müəyyənləşdirmək və müvafiq strategiyanın hazırlanması üçün bu sistemlərin rolu əvəzsizdir.

Qiymətləndirmə ilə bağlı problemlərə toxunan nazir bildirib ki, bərabərlik və təhsilin əlçatan olması ev şəraiti, ailənin sosial və iqtisadi vəziyyəti ilə bağlıdır və bunlar məktəbdə iştiraka təsir edən amillərdir: "Milli və beynəlxalq qiymətləndirmələrə görə, şagirdin akademik sahədə nailiyyəti onun məktəbəqədərki hazırlığı ilə sıx bağlıdır. Son illərdə məktəbəqədər hazırlıq səviyyəsi 24 faizdən 75 faizədək qalxıb".

Mərkəzləşdirilmiş imtahan sisteminin vacib rol oynadığını deyən nazir bu sistemin şəffaflıq gətirdiyini qeyd edib:

"Milli kurikulum sistemi gələcək əmək bazarının tələblərinə və sosial rifaha köklənib. İnnovasiyalar və texnologiya sahəsində sürətli dəyişikliklər mili təhsil sistemi üçün çətinlik olaraq qalır. Bunlardan biri də kağız üzərindəki imtahanlardan kompüter əsaslı imtahanlara keçiddir".

Ana səhifəyə dön