Təmayüllü siniflər dərslik problemi ilə üzləşib

“Təmayülləşmə müstəqillik dövründə ümumtəhsil pilləsində həmişə prioritet istiqamətlərdən biri olmaqla istedadlı şagirdlərin ayrı-ayrı (humanitar, texniki, təbiət və s.) sahələr üzrə istedad və potensialının inkişafına xidmət edir”.

Reyting.az xəbər verir ki, bunu təhsil üzrə mütəxəssis Elşən Qafarov özünün müəllif yazısında qeyd edib.

Təhsil mütəxəssisi yazır ki, 19 iyun 2019-cu ildə qəbul edilmiş “Təhsil haqqında” Azərbaycan Respublikası Qanunun 19-cu maddəsinin 19-cu bəndində (Tam orta təhsil səviyyəsində təhsilin təmayülləşməsi (humanitar, texniki, təbiət və digər) təmin olunur.), eyni zamanda 29 mart 2019-cu il tarixində qəbul edilmiş “Ümumi təhsil haqqında” Qanunun 13-cu maddəsinin 18-ci bəndində (Ümumi təhsilin tam orta təhsil səviyyəsində təhsil təmayülləri üzrə (humanitar, texniki, təbiət və s.) təşkil edilir.

E. Qafarov qeyd edib ki, təmayül siniflərdə şagirdlərin sayı ən azı 15 nəfər olmaqla komplektləşdirilir. Tədris ili ərzində təmayül siniflərində şagird sayının azalması həmin siniflərin fəaliyyətinin davam etdirilməsinə məhdudiyyət yaratmır. Çünki tam orta təhsil səviyyəsində təmayülləşmənin tətbiqinə hüquqi baza yaradılıb.

Təhsil mütəxəssisi daha sonra yazır:

“İstedadlı şagirdlərin təhsil alması üçün Bakı şəhərində və regionlarda fəaliyyət göstərən lisey və gimnaziyalarla yanaşı 2015-2016-cı tədris ilindən başlayaraq ilk dəfə ölkənin 50 ümumi təhsil məktəbində təmayüllü siniflərin yaradılmasına başlanıldı. Növbəti tədris ilində daha 100 məktəbdə bu tip siniflərin yaradılması ilə tam orta təhsil səviyyəsində təmayüllü siniflərin şəbəkəsi genişləndirildi və artıq 2018-2019-cu tədris ilində ölkə üzrə tam təmayüllü siniflərin sayı tam orta səviyyədə olan siniflərin ümumi sayının 40 faizinə çatdırıldı. Eyni zamanda pilot layihə kimi ümumi orta səviyyədə də (5-9-cu siniflərdə) təmayüllü siniflər yaradılmağa başlanıldı”.

Təmayüllü siniflər dərslik problemi ilə üzləşib

E. Qafarov

E. Qafarov bildirir ki, bu sahədə atılan uğurlu addımlardan biri də 2019-2020-ci tədris ilindən başlayaraq Gəncə şəhəri və Quba rayonunda Təhsil nazirliyinin tabeliyindəki Fizika, riyaziyyat və informatika təmayüllü Respublika liseyinin, Şirvan və Şəki şəhərlərində isə nazirliyin tabeliyindəki Kimya-biologiya təmayüllü Respublika liseyinin siniflərinin yaradılmasıdır: “Bu siniflərə şagird qəbulu, əsasən 6, 7, 8 və 9-cu siniflər üzrə müsabiqə yolu ilə aparılır. Eyni zamanda son iki ildə Təhsil nazirliyinin keçirdiyi Respublika fənn müsabiqələrində yüksək nəticə göstərmiş şagirdlər 7, 8 və 9-cu siniflərə müsabiqəsiz qəbul edildilər. Bu prosesin yaxın gələcəkdə ölkənin bütün regionlarını əhatə edəcəyi gözlənilir.

Təmayüllü lisey və siniflərin əsas məqsədi istedadlı şagirdlərin üzə çıxarılması, onların istedad, bilik və bacarıqlarının inkişafıdır. Bu sahədə görülmüş işlərin nəticəsidir ki, təkcə 2018-2019-cu tədris ilində beynəlxalq fənn olimpiyadalarında şagirdlərimiz 48 medal qazanıblar”.

Mütəxəssis diqqətə çatdırıb ki, 2019-2020-ci dərs ilində ölkə üzrə 184 məktəbdə 404 təmayül sinfi fəaliyyət göstərir. Yaxın gələcəkdə bu siniflərin artacağı gözlənilir. Onun fikrincə, təmayüllü siniflərə qəbulun Təhsil nazirliyi tərəfindən mərkəzləşdirilmiş qaydada aparılması həmin siniflərə qəbul olunacaq şagirlərin təhsilini davam etdirməsinə şərait yaradardı.

E. Qafarov qeyd edir ki, təmayüllü sinif və liseylərin sayı artıqca bu sahədəki problemlər də həll olunmalıdır: “İlk növbədə təmayüllü liseylərin fərdi dərslikləri nəşr edilməlidir. Təhsil nazirliyi həmin liseyləri öz dərsliklərini hazırlayıb çap etdirməyə təşviq etməlidir. Eyni zamanda təmayüllü siniflər üçün fərdi dərsliklər hazırlanıb çap olunmalıdır. Dərslik problemi hazırda bu istiqamətdə daha uğurlu nəticələr əldə etmək yolunda ən böyük maneədir”.

Mütəxəssis sonda qeyd edib ki, təmayüllü siniflərdə çalışacaq müəllimlərin seçilməsi məsələsinə aydınlıq gətirilməli, bununla bağlı təlimat hazırlanmalıdır: “Sertifikasiyanın ikinci mərhələsində müəllimlərin peşəkarlıq səviyyəsinin qiymətləndirilməsinə qədər, həmin siniflərdə hansı kateqoriyalı müəllimlərin çalışa biləcəyi müəyyənləşdirilməlidir.

Ən əsası, Azərbaycan Respublikası Prezidentinin 19 yanvar 2015-ci il tarixli 995 №-li Sərəncamı ilə təsdiq olunmuş “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planında göstəridiyi kimi, 12 illik təhsilə keçidi reallaşdırmaq lazımdır. Yalnız bundan sonra təmayülləşmə prosesinin onunla bağlı olan bütün gözləntiləri özünü doğrulda bilər”.

Reyting.az

Ana səhifəyə dön