Mübariz Mənsimova cinayət işi açılıb

Türkiyədə fəaliyyət göstərən azərbaycanlı iş adamı, “Palmali” Şirkətlər Qrupunun rəhbəri Mübariz Mənsimovun barəsində cinayət işi açılıb.

Məlumata görə, Mübariz Mənsimovun Türkiyəni tərk etməsinə qadağa qoyulub. Onu FETÖ terror təşkilatı ilə əlaqədə və casusluqda ittiham edirlər.

Mənsimov özünün “Facebook” səhifəsində yazıb ki, ona qarşı irəli sürülən ittihamlar uydurmadır.

O, cinayət işinin və ittihamın təfərrüatları barədə ətraflı məlumat verməyib.

M. Mənsimovun müraciətindən belə anlaşılır ki, ona qarşı ifadə verənlər arasında “Palmali” şirkətinin keçmiş əməkdaşları, o cümlədən Azərbaycan vətəndaşları da var.

Reyting.az M. Mənsimovun sosial şəbəkələrdə yayılmış müraciətini təqdim edir:

“Əziz dostlarım, həmvətənlərim!

Məni sevənlər, namuslu bacı və qardaşlarım!

Bu danışığı aparmaq məcburiyyətindəyəm. Mənə qarşı çox çirkin oyun qurulub. Məni terrorla, FETÖ ilə əlaqədə və casusluqda ittiham edərək üstümə şər atmağa çalışırlar. Bunu edənlər şəxsi mənafeyini güdən insanlardır.

Bildiyiniz kimi, mən haqqımı tələb etmək üçün ali məhkəməyə müraciət etmişəm. Tezliklə bu mübarizədə məğlub olacağını başa düşən özəl şirkətlər və dövlət müəssisələri qəzəblənməyə başlayıb. İnsan əsəbiləşdikcə gözü və məntiqi kor olur, ardıcıl səhvlərə yol verir. Onlar hüququ, ədalətsizliyi pul ilə almağa cəhd göstərirlər. Pul ilə! Mənim satılmış keçmiş işçilərimi, bəzi hakimləri, dövlət məmurlarını əşya kimi alıblar. Onlar da pulun qulu olublar, nə şərəfləri var, nə də namusları. Oğrular, xainlər və FETÖ-çülər bir kənarda qalıb, bunlar məni ağlasığmaz məsələlərdə günahlandırırlar. Hər şey yalan və uydurmadır, bunu sübut etmək heç də çətin deyil. Onlar bir gün etdiklərinin cəzasını çəkəcəklər. Allahın ədaləti qılınc kimi kəskindir. Yazıqlar, bunu başa düşmədiniz ki, sahibləriniz sabah sizi də satacaq.

Məni ən çox incidən odur ki, satılmışların içində mənim həmvətənlərim də var: Azəri türkləri… Məni düşmən hesab etdiniz? Mən düşmən deyiləm və bilin ki, sizin etdiyiniz şərəfsizliyi düşmən də etməzdi. Bu, məni dərindən yaraladı. Mənə FETÖ-çü deməkdənsə, özünüzə, keçmişinizə, övladlarınızın harada təhsil aldığına baxın. Elə bilirsiniz, heç kimin bunlardan xəbəri yoxdur? Bu qədər safsınız, ya qarşınızdakı insanları aldadırsınız?

Ay yazıqlar, siz hələ də anlamamısınız ki, mənim üçün namus və şərəf maldan, dövlətdən öndədir. Bunlar sizdə olmadığı üçün başa düşməkdə çətinlik çəkirsiniz. Mən həmişə halal pul qazanmış, halal pul xərcləmişəm.

Mənim Allahım var və həmişə Allahımla olmuşam. O, məni heç vaxt tək qoymayıb. Sizin aqibətinizi isə fikirləşə bilmirəm”.

Qeyd edək ki, Mənsimovun barəsində cinayət işinin açılmasını Türkiyənin bəzi KİV-ləri də işıqlandırıblar.

Ana səhifəyə dön