Sərhədsiz xeyirxahlıq və yaxşılıqlar sahibi - Sərhəd Qasımov

Aprelin 12-si Azərbaycan Teleradiosunda Həmkarlar İttifaqına yarım əsrdən çox rəhbərlik etmiş Sərhəd Rəhmət oğlu Qasımovun 80 yaşı tamam olur. Vaxtilə onunla birlikdə bir kollektivdə çalışan yüzlərlə jurnalist, rejissor, kino və televiziya operatoru, sürücü və digər peşə sahibləri onu təmənnasız xeyirxahlıq və yaxşılıqlar daşıyıcısı kimi tanıyır, xətrini əziz tutur və bu gün də onunla əlaqə saxlayır, sağlıq durumu ilə maraqlanır, kefini-əhvalını soruşurlar. Çünki Sərhəd müəllim Azərbaycan Televiziya və Radio Verilişləri Komitəsində işə başladığı ilk gündən, xüsusən də Həmkarlar İttifaqı Təşkilatına rəhbər seçiləndən elə bir iş prinsipi ilə fəaliyyət göstərib ki, analoji fakt tapmaqda xeyli çətinlik çəkməli olarsan. O, rastlaşdığı, salamlaşdığı insanların üzündən hansı problemlərlə qarşılaşdığını dərhal oxuyar və elə həmin gün əlindən gələn köməyi əsirgəməzdi. Sanatoriya və istirahət ocaqlarına yollayışların əldə edilməsi üçün heç birimiz çətinliyə düşməzdik. Yardıma ehtiyacı olanlar da yanından əliboş qayıtmazdılar. O, bizim ümid yerimiz, güvənc ünvanımız olub həmişə. Əməkdaşların yubileylərinin keçirilməsini təşkil edər, əzizlərini itirənləri tək qoymazdı. O illərdə heç bir əməkdaş haqsız yerə incidilməz, narahatlıq keçirməzdi. Çox şükürlər ki, Sərhəd müəllimin vaxtilə imza atdığı xoş ənənələr bu gün də Azərbaycan Teleradiosunda uğurla davam etdirilir.

İndi isə Sərhəd Qasımovun mənalı həyatını xarakterizə edən məqamlara nəzər salaq.

O, 1941-ci il aprel ayının 12-də Lənkəran şəhərində anadan olub. 1957-61-ci illərdə Rabitə texnikumunda təhsil alıb. Həmin ildən Respublika Radio-Televiziya Mərkəzində elektrik montyoru kimi əmək fəaliyyətinə başlayıb. İki il hərbi xidmətdən sonra 1964-cü ildə işıq sexinin rəisi vəzifəsinə təyin edilib. 1967-ci ilin oktyabrında Teleradionun Həmkarlar İttifaqı Komitəsinin ilk sədri seçilib. İlk azərbaycanlı olaraq 1970-75-ci illərdə Moskva Beynəlxalq Həmkarlar Akademiyasında təhsil alıb. İşlədiyi müddət ərzində SSRİ Radio və Televiziya Komitəsinin sədri Lapinin imzası ilə bir neçə dəfə fəxri fərman, diplom və döş nişanı ilə təltif olunub.

Sərhəd Qasımov Azərbaycan Respublikası Prezidentinin Sərəncamı ilə 2006-cı ildə “Əməkdar mədəniyyət işçisi” adına, 2009-cu ildə isə “Tərəqqi” medalına layiq görülüb. 2017-ci ilin mayınadək 50 il fasiləsiz olaraq Azərbaycan Televiziya və Radio Verilişləri Şirkəti Həmkarlar İttifaqı Komitəsinin sədri, 38 il Mədəniyyət İşçiləri Həmkarlar İttifaqı Respublika Komitəsinin Rəyasət Heyətinin üzvü və 25 il SSRİ Mədəniyyət İşçiləri Həmkarlar İttifaqı Komitəsinin plenum üzvü olub. 2018-ci ildən “Azərbaycan Həmkarlar İttifaqları Konfederasiyasının 100 illiyi” medalı ilə təltif olunub.

Üç qızı, bir oğlu, yeddi nəvəsi var.

Bir faktı da xatırladaq ki, Sərhəd müəllim tanınmış televiziya xadimi, professor Elşad Quliyevlə və istedadlı şair Camal Yusifzadə ilə orta məktəbdə bir sinifdə oxuduğuna görə həmişə fəxr etdiyini bildirir.

Sərhəd müəllim öz nəsli-şəcərəsi üçün əsl üzağlığı nümunəsi, şərəf və vicdan nişanəsidir. O, bizim də - bu yazıya imza atan dostlarının da əzizi, sevimlisidir. Zənnimizcə, hazırda istirahətdə olsa da, öz işindən ayrılsa da, qəlbi yenə AzTV ilə, bu kollektivdə çalışan dostları, iş yoldaşları ilə birgə döyünür. O, hamımızın işi-gücü, taleyi ilə dərindən maraqlanır, yeri gəldikcə köməyini, məsləhətlərini əsirgəmir. Biz də hamılıqla ona can sağlığı, uzun ömür, həyatdan daha çox ləzzət almağı arzulayırıq. Qoy, ətrafın həmişə səni istəyən, dəyərləndirən dostlarınla, təəssübkeşlərinlə dolu olsun, əziz və hörmətli Sərhəd müəllim. 80 illik yubileyin mübarək!

Akif Cabbarlı
Mübariz Süleymanlı

P.S. Xatırlatmaq istərdik ki, Mübariz Süleymanlı iyirmi ilə yaxın müddətdə Sərhəd Qasımovun müavini kimi fəaliyyət göstərmiş və sədrin dərin etimadını da qazanmışdır.

Ana səhifəyə dön