Ermənistanda müftə peyvənd: İrəvan nə yoğurdu, nə yapdı, hazırca kökə tapdı

Dünyada COVID-19-a yoluxma bir həftə ərzində 3 faiz artıb.

Reyting.az xəbər verir ki, Ümumdünya Səhiyyə Təşkilatının (ÜST) mütəxəssisləri ötən həftə 2.68 milyondan çox koronavirusa yoluxma və 54 min ölüm halı qeydə alıblar.

ÜST-nin Cenevrədəki qərargahından iyulun 6-da verilən məlumata görə, əvvəlki yeddi günlə müqayisədə yoluxma sayı 3 faiz yüksəlib, ölüm nisbəti isə7 faiz azalıb və keçən ilin oktyabr ayından bəri ən aşağı səviyyəyə düşüb.

Təşkilat 26 iyun-4 iyul tarixləri arasında dünyada 2.688.651 yoluxma aşkar edib və 53.958 ölüm qeyd edilib. Təkcə iyulun 4-nə qədər ümumən 183.198.019 yoluxma və 3.971.687 xəstə ölümü statistik hesabatlara yazılıb.

ÜST bir həftə ərzində ən çox yeni infeksiya sayının Braziliyada qeydə alındığını bildirib (364.709). Onu Hindistan (312.250), Kolumbiya (204.556), İndoneziya (168.780) və İngiltərə (161.805) izləyir. Ən yüksək yoluxma nisbəti Seyşel adalarında (100 min əhaliyə 758 yeni hadisə), Monqolustanda (472), Kolumbiya (402), Namibiya (367) və Kiprdə (324) qeydə alınıb.

Amerikada yoluxma bir həftə ərzində azalıb (13%). Eyni zamanda, artım Avropada (30%), Afrikada (15%), Şərqi Aralıq dənizi hövzəsində (11%), Qərbi Sakit okean bölgəsində (10%) və Cənub-Şərqi Asiyada (7%) da qeydə alınıb.

Afrikada ölüm sayı xüsusilə artıb (23%). Ölüm sayında azalma Cənub-Şərqi Asiyada (12%) və Amerikada (11%) qeyd olunub. Avropada yeddi gündə 505 mindən çox insan COVID-19-a yoluxub və 6 mindən çox xəstə ölüb, Amerikada 990 mindən çox yeni yoluxma və 26 mindən çox ölüm qeyd edilib. Cənub-Şərqi Asiyada həkimlər 612 mindən çox yoluxma aşkar ediblər, 11 mindən çox insan ölüb.

ÜST bülleteninə görə, Hindistanda kəşf edildikdən sonra mütəxəssislərə 2020-ci ilin oktyabrından bəri məlum olan “Delta” ştammının "digər variantları tez bir zamanda üstələyəcəyi və yaxın aylarda dominant olacağı gözlənilir". Avropada bu ştamm ucbatından avqustun sonuna qədər yeni yoluxmaların 90 faizini təşkil edəcəyi proqnozlaşdırılır.

Bu cür bədbin proqnozların hakim olduğu dövrdə koronavirusun cənginə aldığı İrandan Ermənistana pulsuz “Corona” əleyhinə peyvənd səyahətləri geniş vüsət alıb.

Reyting.az bu mövzuya artıq bir dəfə müraciət edib.

Xatırladaq ki, son günlərdə sosial şəbəkənin İran kontentində Ermənistanda pulsuz COVID-19 əleyhinə peyvənd reklamaları yer alır. Ermənistana koronavirusa qarşı müftə peyvənd səyahəti bir çoxlarını şirnikləndirib. Çünki İranda koronavirus əleyhinə vaksinasiya kampaniyasında xeyli geriləmə var. Buna görə də, bəzi İran vətəndaşları 7-20 milyon tümən arası xərclə xarici ölkəyə riskli səyahətə baş vurub.

“BBC Farsi” və Almaniyanın “Deutsche Welle/Persian”ın "Ermənistana pulsuz peyvənd səyahəti" başlıqları ajiotajı bir az da böyüdüb və sadəlövh insanları qonşu ölkəyə səyahətə təşviq edib. Fürsətçilərə aldanmış iranlıların əksəriyyəti Tehran və İranın digər mərkəzi əyalətlərindən olan şəxslərdir. Onların böyük qismi Tehran-Culfa marşrutlu avtobusla sərhədə yetişdikdən sonra Ermənistanda gözləmədikləri vəziyyətlə qarşılaşıblar.

Əsasən Tehrandan İran-Ermənistan sərhədindəki Norduz keçid məntəqəsinə yetişənlər sonradan öyrəniblər ki, qonşu ölkədə rəsmi qaydada peyvəndləmədən kənar heç bir xidmət yoxdur. Hesablamaya görə, təxminən 7.800 nəfər İran-Ermənistan sərhədini adlayıb. Son 13 gündə sərhədin o tayından bu tayına, bu tayından otayına 4.413 nəfər keçib.

Deməli, məhz onlar “pulsuz COVID-19 peyvəndi səyahəti” fırıldağının qurbanı olublar. “Aydındır ki, Ermənistan hökuməti də iqtisadi faydaya görə xarici KİV-lərin xəbərlərinə şərh verməyərək susmağı üstün tutub”, – deyə İRNA-nın şərhində təəssüflə bildirilir.

İran mediası mövzunun cazibəsindədir. Aparıcı KİV-lər oxucularını saxta reklamlara inanmağa çağırırlar. "Comhuriye Eslami" isə ölkədə COVID-19 əleyhinə kampaniyanın uğursuzluğuna işarə edərək yazıb ki, "Bu utancverici vəziyyətdə, bəzi insanlar ABŞ-a "Korona" əleyhinə peyvənd verilməsi şüarını səsləndirir, digərləri isə bir neçə Avropa ölkəsindən yerli peyvənd üçün kütləvi sifarişlərin alındığından dəm vururlar".

Fakt budur ki, pulsuz peyvənd üçün Ermənistana yollananların çoxu əli ətəyindən uzun geri dönsə də, Ermənistanda, həqiqətən, peyvənd olunanlar var. Ermənistan rəsmiləri bunun gəlir mənbəyi olduğunu başa düşərək, nəhayət, qonşu ölkədən gələnlər üçün müvafiq şərait yaradıblar. Ancaq, İrəvanın İrandakı səfiri Artaşes Tumanyanın bildirdiyi kimi, peyvənd olunan İran vətəndaşları Ermənistanda 10 və daha çox müddət qalmalıdır.

Ermənistan-İran Birgə Ticarət Palatasının rəhbəri Hervik Yaricanyan da təsdiqləyib ki, peyvənd olunmaq üçün Ermənistana gələn iranlıların sayı çoxdur. Buna əyani misal iranlı aktrisalar Şəbnəm Fərşadcu və Behnaz Cəfəridir. Hazırda "Corona" əleyhinə peyvənd vurdurma səyahəti ilə hər iki tanınmış sima Ermənistandadır. Hər ikisi bunu təsdiqləyən fotolar paylaşıblar, hətta fotoların birində Şəbnəm Fərşadcunun erməni BMP-si üzərinə çıxdığı görünür. “Instagram”-da "Ermənistana getdik və peyvənd olunduq" yazıblar.

Deməli, son günlər reklam olunan səyahətin real əsası varmış!

Yeri gəlmişkən, Ermənistanda son gündə koronavirusa 140 yeni yoluxma qeydə alınıb. Bu barədə ölkənin Səhiyyə Nazirliyi məlumat yayıb. Ümumən Ermənistanda koronavirusa yoluxmuş 225.801 nəfər qeydə alınıb. Hazırda 2.866 nəfər müalicə olunur, 217.303 nəfər sağalıb, son gündə 1 nəfər olmaqla, 4.531 xəstə ölüb. Bundan başqa, koronavirusu olan daha 1101 nəfər digər xəstəliklər ucbatından vəfat edib. Bu, ölənlərin ümumi sayını 5.632-yə çatdırır.

İrana gəlincə, son günlərdə pandemiya dalğası qorxulu həddə artıb və yoluxma hadisələrinin sayı ikiqat çoxalıb. 3 gün əvvəl 16.025 yeni xəstə əlavə olunmaqla, ölkədəki COVID-19 xəstələrinin ümumi sayı 3.270.800 nəfəri keçib. COVID-19-u olan 157 nəfər ölüb, bu da İrandakı ölümlərin ümumi sayını 84.949-a çatdırıb.

Ana səhifəyə dön