Sabiq Aparat rəhbərinin məhkəməsi davam etdirilib

Bu gün Bakı Şəhər İcra Hakimiyyətinin keçmiş Aparat rəhbəri Rasim Quliyevin məhkəmə prosesi davam etdirilib. Reyting.az-ın məlumatına görə, Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilən prosesdə şahid qismində "FF-2011" MTK-nın təsisçisi Tamella İbrahimova ifadə verib.

O, ifadəsində deyib ki, 2011-ci ildən şirkətin təsisçisidir və hazırda onkoloji xəstədir və ifadəsini oturduğu yerdə davam etməsini hakimdən xahiş edib: "Rasim Quliyevi birinci dəfədir burda görürəm. Şəkillərini görmüşəm, bir də adını son illərdə eşitmişəm. Rasim Quliyevin işi ilə bağlı Korrupsiyaya qarşı Mübarizə Baş İdarəsində dindirilmişəm. Lakin mənə orada Rasimin Quliyevin tutulması ilə bağlı məlumat verilməyib. Bir dəfə də olsun, aramızda üzləşmə olmayıb. Rasim Quliyevin həbs olunduğunu eşidəndə sonra tələb etsəm də, onunla məni üzləşdirmədilər".

Şahid deyib ki, 2012-ci ildə Dilara Əliyeva küçəsində ona borc qarşılığında torpaq verilib: "Sonradan mənə dedilər ki, orada park olacaq. Mən həmin vaxt Bakı Şəhər İcra Hakimiyyətinə müraciət etdim. Dedilər ki, sənə yer verəcəyik. Yay ayları idi, mənə zəng gəldi, icraya çağırdılar. Dedilər ki, sizə icazə verəcəklər, ev tikəcəksiniz. Mənə icazə verildi, başladıq Dilarə Əliyeva 145 ünvanında olan evləri almağa, layihə hazırladıq. Bakının baş memarı Akif Abdullayev mənə tanış memar təklif etdi, həmin memar bizimlə işləməyə başladı. Əvvəldən heç bir pozuntu olmayıb. Layihəni apardım Akif Abdullayevə göstərdim, dedi ki, bina böyükdür, kiçildək. Layihəni azaltdım, bütün qurumlardan təsdiqlədərək Akif Abdullayevə verdim və bütün sənədlərim qaydasındadır".

T. İbrahimova deyib ki, Bakı Şəhər İcra Hakimiyyətindən Zülfəli adlı şəxs ona zəng edərək Hacıbala Abutalıbovun ərazidə tikinti aparmağı qadağan etdiyi bildirib: "Müəyyən danışıqlar apardım. Sonradan dedilər ki, əraziyə ağır çəkili yük avtomobillərinin keçməsi yolu dağıdır. Axırda Zülfəli dedi ki, o, tikintiyə gələn-gedən maşınlara nəzarət edəcək. Mən də razılaşdım. 2015-ci ildən söküntüyə başladıq. Biz evi alırdıq, Bakı Şəhər İcra Hakimiyyəti sökürdü. Sakinlərdən biri BŞİH-ni məhkəməyə verdi və uddu. Zülfəli dedi ki, məsələni özü həll edəcək. Zülfəli mənim aldığım evlərə ayrı-ayrı adamları gətirib kirayə saxladı. Hələ də yaşayırlar. Dilarə Əliyeva 145-də isə memarlıq üslubu yoxdur. Bu bina memarlıq binası olsaydı, iki il sənədləşmə gedən halda mənə nəsə təqdim edərdilər".

T. İbrahimova bildirib ki, bir müddət keçəndən sonra Baş prokuror Zakir Qaralov məktub göndərib ki, bina qanunsuz tikilir: “Biz də işi saxladıq. Hacıbala müəllimlə görüşə getdim. O dedi ki, müavini Rauf Pənahov rəhmətə getdi, ona görə tikintini saxlayıblar. Sonradan mənə icradan dedilər ki, 2013-cü ildə aldığım sərəncam 2014-cü ildə ləğv edilib. 2014-cü ildə mən ora 17 milyon pul qoymuşdum. Sonradan sərəncam yenidən bərpa olundu. Bütün sənədləşmələri həyata keçirdim. Mənim o qədər sübutum var”.

Şahid qeyd edib ki, bir müddət sonra onun ofisinə Mədəniyyət Nazirliyindən Vüqar adlı şəxs gəlib: "Vüqar dedi ki, Mədəniyyət Nazirliyi yanında Mədəni İrsin İnkişafı və Qorunması üzrə Dövlət Xidmətinin rəisi Zakir Sultanovla görüşməlisən. Görüş zamanı o məndə çox mənfi təsir yaratdı. O zaman ona dedim ki, sənin yerin DTX-nın təcridxanasıdır. Deyirdi ki, evləri sökmüsən, tarixə abidəni məhv etmisən, tikintini dayandırmalısan. Mən ordan çıxıb Hacıbala müəllimin yanına getdim. Hacıbala müəllim yanımda nazir Əbülfəs Qarayevə zəng elədi. Əbülfəs Qarayev dedi ki, ərazidə evlər köhnədir, siz tikintinizi aparın. Zakir Sultanova tapşıracağını bildirdi".

Sonradan tikintini saxladılar və məsələ ilə bağlı o vaxt Baş nazirin müavini Hacıbala Abutalıbovun yanında olmuşam. Hacıbala müəllim mənim yanımda bəzi məmurlara zəng elədi və mən də telefonda səslərə qulaq asdım, dedi, get, arxayın ol”.

Hakim bildirib ki, şahidin ifadəsinin davamını gələn prosesdə dinləyəcəklər.

Proses oktyabrın 11-də davam etdiriləcək.

Qeyd edək ki, Rasim Quliyevə Cinayət Məcəlləsinin 308.2 və 314-2.3-cü maddələrl ilə ittiham elan edilib və barəsində məhkəmənin qərarı ilə həbs qətimkan tədbiri seçilib.(SİA)

Ana səhifəyə dön