Mədə problemindən necə qorunmalı?

“Mədə problemlərinin yaranmasında qidalanmanın önəmi çoxdur. Hətta müalicələrdə belə dietoterapiyadan da istifadə edirik. Mədə-bağırsaq xəstəliklərinin əsas əlamətləri qarında ağrı, iştahın pozulması, ürəkbulanma, qusma, gəyirmə, qıcqırma, qarının köpməsi, qəbizlik, ishal və s. ilə özünü göstərir”.

Reyting.az xəbər verir ki, bunu qastroenteroloq Vüqar Abbasov deyib. Onun sözlərinə görə, ağrılar xəstəliyin səbəblərinə uyğun olaraq uzunmüddətli və ya qısamüddətli tutmalar şəklində, yemək zamanı və ya yeməkdən 2-3 saat sonra ola bilər:

“Qarında çox şiddətli ağrılar olduqda ağrıkəsici dərmanlar verməyə tələsmək lazım deyildir. Çünki ağrıların müxtəlif vasitələrlə kəsilməsi diaqnozun düzgün qoyulmasına mane ola bilər, cərrahi əməliyyat aparmaq lazımdırsa, onu da ləngidər”.

V. Abbasov bildirib ki, müayinə zamanı bir neçə üsuldan istifadə edilir: “Endoskopiya həm diaqnoz, həm də müalicə üçün istifadə edilə bilər. Endoskopik müayinə üsullarından biri olan qastroskopiya həzm sisteminin yuxarı şöbələrini yoxlamaq üçün cərrahi olmayan ağızdan edilən bir prosedurdur.

Endoskopiya həkimə bədəndə kəsik etmədən orqanı müayinə etməyə imkan verir. Qida borusu, mədə və onikibarmaq bağırsaq xəstəliklərinin diaqnozu və bəzən müalicəsində istifadə edilən endoskop, ucunda kamera və işığı olan elastik bir borudan ibarətdir. Bəzi hallarda, biopsiya materialı almaq üçün endoskopa xüsusi alətlər əlavə edilə bilər. Endoskopiya cihazına xüsusi vasitələr əlavə etməklə müalicəvi məqsədlər üçün də yararlanmaq olar”.

Qastroenteroloq əlavə edib ki, qida borusu darlıqlarının açılması, yığılmış mayenin boşaldılması, poliplərin kəsilməsi, yad bir cismin və ya öd kisəsi kimi kiçik orqanların çıxarılması endoskopiya üsulu ilə edilə bilər:

“Rentgenoqrafiya mədə və onikibarmaq bağırsağın kontrast maye içməklə müayinəsidir. Endoskopik metodlardan istifadə edildikdən sonra bu müayinəyə ehtiyac xeyli azaldı. Çünki rentgen müayinəsi bir çox hallarda təkbaşına kifayət etməyə bilir. Xəstənin anamnezinə uyğun müayinə üsulları seçilir. Diaqnoz - müalicənin onurğa sütunudur. Bu səbəbdən daha ciddi narahatlıqlarda müayinə üsulu həkimlər tərəfindən təyin edilməlidir”.

Onun sözlərinə görə, qıcqırma, ağrı (xüsusən ac qarına və gecə ağrıları), gəyirmə, ürəkbulanma və qusma, ağızda pis qoxu, mədədə tikə qalma hissiyyatı kimi əlamətlərlə keçən mədə-bağırsaq bağırsaq xoraları, eroziya, diafraqmal yırtıq, reflüks ezofagit kimi xəstəliklər çox yayılmış həzm problemlərindəndir:

“Genetik meyillilik və qidalanma vərdişləri mədə xəstəliklərinin meydana gəlməsində əhəmiyyətli faktordur.

Havaların soyuması ilə gündüzlər qısalmağa başlayır. Soyuq aylarda ağır xəmir xörəklərə üstünlük verilməyə başlanır. Bu da öz növbəsində yuxudan dərhal öncə yeyilən ağır yeməklərlə birgə mədə problemlərinə gətirib çıxarır. Son qida qəbulunun yatmazdan ən azı 3 saat əvvəl bitməsi məqsədəuyğundur. Bundan əlavə, mövsümi infeksiyalar səbəbindən qışda antibiotiklər çox tez-tez istifadə olunur. Bunlar həzm sisteminə mənfi təsir göstərir. Xüsusilə yaşlıların əzələ və skelet sistemi ağrılarında, revmatik xəstəliklərdə ağrıkəsicilərdən istifadədə artım müşahidə olunur. Bu dərmanların həddindən artıq qəbulu səbəbiylə mədə və bağırsaq qanaması ən çox görülən problemlərdən biridir. Bu tip ağrıkəsicilərdən istifadə edən insanların mədəsini qoruyan bir dərman qəbul etmələri vacibdir”.

Ana səhifəyə dön