Məhkəmə çəkişməsi: “Kaspian Servise”nin iddiaları rədd edilir

“Caspian Service” MMC ilə Bakı şəhəri, Nəsimi rayonu, Süleyman Ələsgərov küçəsinin bir qrup sakini arasında mənzil problemi ilə bağlı uzun müddətdir məhkəmə çəkişmələri davam edir. Hətta MMC-nin təsisçisi və rəhbəri Rəhim Sultanov bir müddət əvvəl redaksiyamıza müraciət edərək prokurorluq orqanlarının qanunsuz qərarlarından, eləcə də Yasamal Rayon Polis İdarəsində aparılan cinayət işindən narazılığını bildirib.

“Caspian Service” MMC-nin rəhbəri R. Sultanov bildirib ki, şirkətinə Bakı Şəhər İcra Hakimiyyəti tərəfindən 2003-cü ildə Nəsimi rayonu, Dilarə Əliyeva və Kiçik dəniz küçələrinin kəsişməsində torpaq sahəsi ayrılıb. Kiçik dəniz küçəsi üzrə mənzillərin köçürülməsi zamanı Elmaz Hüseynov və şərikləri Rəhim Sultanova təklif ediblər ki, həmin ərazini və sakinləri yaxşı tanıdıqlarına görə mənzillərin köçürülməsini təşkil edə bilərlər. Şirkətin tikinti işlərinin çoxluğunu nəzərə alan R. Sultanov Kiçik dəniz küçəsində olan sakinlərin köçürülməsini həmin şəxslərə həvalə edib. Əsas problem də bundan sonra yaranıb.

MMC-nin bununla bağlı Reyting.az-a göndərdiyi müraciətlərin yayılması isə qarşı tərəfin - Elmaz Arif oğlu Hüseynovun narazılığına səbəb olub. MMC ilə məhkəmə çəkişməsində olan mülkiyyətçilər Elmaz Hüseynovun, Emin Hüseynovun və Qurban Verdiyevin də mövqeyinə hörmətlə yanaşdığımızı və onların da məsələyə münasibətinə yer ayırmağa hazır olduğumuzu bildirsək də, xeyli müddət sonra qarşı tərəf - Elmaz Hüseynov redaksiyanı qanunları pozmaqda və Rəhim Sultanovun tərəfini saxlamaqda ittiham edib.

Məhkəmə proseslərindən və hüquq-mühafizə orqanlarında aparılan istintaq işlərinin bəziləri başa çatsa da, E. Hüseynov Reyting.az-a göndərdiyi müraciətində yazır ki, “Kaspian Service”nin prezidenti R. Sultanovun Nəsimi rayonu, S. Ələsgərov küçəsində yerləşən evdə mənzillərin mülkiyyətçiləri ilə (həmçinin onunla) uzunmüddətli münaqişəsindən bəhs edən məqalələrdə Konstitusiyanın, “KİV haqqında” Qanunun tələbləri pozulub. E. Hüseynov iddia edir ki, guya redaksiya davam edən məhkəmə proseslərinə və istintaqlara müdaxilə edib, adıçəkilən tikinti baronunun əsassız uydurmalarına yer ayırıb.

E. Hüseynov müraciətində yazır:

“Həmin məqalələrdə reallıqlara və özü-özünə zidd olan əsassız cümlələr yer alıb. Belə ki, vəziyyətdən asılı olaraq və ancaq R. Sultanovun əsassız sözlərinə söykənərək, məhkəmə və prokurorluq orqanları gah tənqid olunur, gah da təriflənir. Bununla yanaşı, məqalələrdə mənim həmin iş üzrə şahid qismində olmaq halım qeyd edilsə də, mən burada əsassız və qanunsuz olaraq cinayətlərin törədilməsində ittiham olunuram. Halbuki, ölkə Konstitusiyasının və cinayət qanunvericiliyinin mütləq tələblərinə görə, heç kəs qanuni qüvvəsini almış məhkəmə qərarı olmadan cinayətin törədilməsində ittiham oluna bilməz. Bundan başqa, mən, məqalələrdə həmin ərazidə xidmət göstərən “makler” kimi təqdim olunuram - halbuki, mən ali təhsilli mütəxəssisəm (həkim) və heç vaxt maklerliklə məşğul olmamışam.

Əgər qarşıya tikinti baronunun sifarişi deyil, əsl həqiqəti əks etdirmək məqsədi qoyulsaydı, tamamilə fərqli faktlar üzə çıxardı.

Belə ki, mən, 2003-cü ildən bu günə kimi Bakı şəhəri, Nəsimi rayonu, Süleyman Ələsgərov küçəsində yerləşən mənzilin və yarızirzəminin mülkiyyətçisiyəm. Digər vətəndaşlar da mənizllərin sahibləridirlər.

2008-ci ilin noyabr ayında bizim binaya “Kaspian Servise” tikinti şirkəti tərəfindən basqın edildi və binamızın bir hissəsi söküldü (Bu şirkətin prezidenti Rəhim Sultanovdur – Prokurorluqda və DİO-da istintaqa nəzarət edən sahədə uzun müddət məsul vəzifələr tutan Elçin Sultanovun qardaşı). Daşınmaz əmlaklarımızın mənimsənilməsi üçün qanunsuz hərəkətlərə və basqına bilavasitə rəhbərlik edən bu tikinti şirkətinin rəhbərləri həmin vaxt əməllərini Bakı Şəhər İcra Hakimiyyətinin sabiq başçısının burada çoxmərtəbəli yaşayış binasının inşasına icazə verməsi haqqında sərəncamla əsaslandırdılar”.

E. Hüseynov yazır ki, uzunmüddətli süründürməçilikdən sonra, 2009-cu ildə Nəsimi Rayon Polis İdarəsində (müstəntiq Tofiq Nəbiyev) bu basqın faktı ilə əlaqədar Cinayət Məcəlləsinin 322.1-ci maddəsi ilə 8200 saylı cinayət işi başlanıb: “Halbuki, cinayət işinin materiallarından da göründüyü kimi, bu basqın iradəmizə zidd olaraq, zorla daxilolma ilə müşahidə olunurdu. Eyni zamanda bu basqın onun çoxsaylı iştirakçıları tərəfindən əmlaklarımızı ələ keçirmək məqsədi güdüb və hədələrlə, hətta həyatımıza və sağlamlığımıza təhlükə ilə baş verib. Bunlarla yanaşı, basqın nəticəsində daşınmaz və digər əmlaklarımızın sökülməsi və yararsız hala salınması nəticəsində bizə külli məbləğdə zərər vurulub. Reallıqda Cinayət Məcəlləsinin 157.2-ci (Mənzil toxunulmazlığını pozma-zor tətbiq etməklə), 181.2-ci (Quldurluq-qabaqcadan əlbir olan bir qrup şəxs tərəfindən törədilən, yaşayış sahəsinə qanunsuz olaraq girməklə törədilən, zərərçəkmiş şəxslərə xeyli miqdarda ziyan vurmaqla törədilən, silah qismində istifadə edilən əşyalar tətbiq etməklə törədilən-link, bel, dəmir parçası və s.), 186.2-ci maddələri ilə (Əmlakı qəsdən məhvetmə və ya zədələmə) nəzərdə tutulmuş əməllər mövcuddur.

İstintaq zamanı sakinlərin və tikinti şirkəti əməkdaşlarının (prezidenti R. Sultanov və onun müvinindən başqa – basqına bilavasitə rəhbərlik edənlər) üzləşmələri, basqının video-yazılarına baxış və sübut qismində qəbul edilməsi, mənzillərimizə vurulmuş ziyanın təsdiqi barədə məhkəmə ekspertiza rəylərinin alınması, zərərçəkmiş qismində sakinlərin tanınması barədə istintaqın qərarları (Hüseynov Elmaz, Abdullayev Faiq, Kərimova Firəngiz, Verdiyev Qurban) istintaqdan yayındıqları üçün R. Sultanovun və müavininin məcburi gətirilmələri barədə istintaqın qərarının verilməsi və s. hərəkətlər həyata keçirilib.

Lakin bunlardan sonra iş üzrə istintaq qəflətən dayandırıldı. İstintaqın davam etdirilməsi və hətta istintaqın bu barədə qərarının qanunamüvafiq qaydada bizə təqdim olunması üçün çoxsaylı müraciətlərimiz cavabsız qaldı - Baş Prokurorluqdan və Ombudsmandan bizə göndərilən məktublara baxmayaraq.

İstintaqın və ona nəzarət edən prokurorluğun qanunsuz hərəkətlərindən (hərəkətsizliyindən) istifadə edən R. Sultanov, basqın hadisəsindən bir neçə il keçdikdən sonra tamamilə başqa bir “əsas” ilə (guya binamızdakı mənzillər hansısa “şifahi” (?!) alqı-satqı müqavilələri əsasında 2003-cü ildə onun tərəfindən alınıb) Nəsimi Rayon Məhkəməsinə müraciət etdi. Onun bu iddiası hər üç məhkəmə instansiyası tərəfindən rədd olundu.(2012)

İstintaqın və ona nəzarəti həyata keçirən prokurorluğun hərəkətlərindən (hərəkətsizliyindən) istifadə edən R. Sultanov, “şifahi” alqı-satqı müqavilələrinin olmaması halına dair Ali Məhkəmənin sözügedən qərarına və AR CPM-nin 142.2-ci maddəsinin mütləq tələblərinə zidd qaydada, bundan sonra 2015-ci ildə həmin “əsaslar” üzrə AR CM-nin 178.3-cü maddəsi (Dələduzluq) ilə cinayət işinin açılmasına nail oldu. Bu dəfə Yasamal RPİ-də (AR CPM-si ilə ərazi prinsipinə dair mütləq tələbi ötüb keçmək və basqın ilə bağlı cinayət işinin icraatda olduğu Nəsimi RPİ-yə getməmək məqsədilə yeni bir “dəlil” uydurub ki, guya deyilən “şifahi” müqavilələr Yasamal rayonu ərazisində “bağlanıb”). Bu cinayət işi həmçinin, AR CM-nin 75-ci maddəsində göstərilən, müddətin keçməsinə dair prinsipin mütləq qaydada tətbiqi haqqında tələbə zidd başlanılıb.

Hazırda Nəsimi Rayon Məhkəməsinin məhkəmə nəzarəti qaydasında qanuni qüvvəsini almış qərarına əsasən, 8200 saylı cinayət işinin (tikinti şirkəti tərəfindən mənzillərimizə basqın faktı ilə bağlı) dayandırılması barədə müstəntiqin qərarı ləğv olunub və icraatın dayandırılması üçün istintaqa göndərilib. Həmin məhkəmə qərarında müəyyən olunduğu kimi, bu cinayət işində olan bütün sübutlar qanunsuz qaydada buradan götürülüb. (Dindirmə və üzləşmə protokolları, məhkəmə ekspertiza rəyləri və s.) Nəsimi Rayon Prokurorluğundan aldığımız rəsmi məktubdan məlum olur ki, bu cinayət işi sonuncu dəfə R. Sultanovun həmin vaxt Bakı Şəhər Prokurorluğunda işləyən qardaşı Elçin Sultanovun “şifahi” sorğusuna əsasən ona göndərilib. Halbuki, məlum olduğu kimi, AR CPM-si ilə cinayət işinin qeyri-rəsmi tələb olunması və göndərilməsi nəzərdə tutulmayıb”.

E. Hüseynov iddia edir ki, növbəti əməllərini gizlətmək məqsədilə Rəhimov qardaşları, bundan əvvəl icraatına xitam verilmiş Yasamal RPİ-nin cinayət işinin icraatını bərpa ediblər və hazırda istintaq vasitəsilə qarşı tərəfə psixoloji təzyiq göstərilir: “Yəni AR CPM-nin 226-cı maddəsi ilə mütləq qaydada tələb olunan çağırışların əvəzinə öz şəxsi mobil telefonları vasitəsilə dərhal gəlməyimizi tələb edir, bizə hədə-qorxu gəlirlər və s.”.

Bütün bunları nəzərə alan Elmaz Hüseynov “Kaspian Service” MMC-nin və onun prezidenti Rəhim Sultanovun iddialarını əsassız sayaraq rədd edir.

Redaksiyanın zəruru qeydi: bir daha diqqətə çatdırırıq ki, həm E. Hüseynovun, həm “Kaspian Service” MMC-nin rəhbəri R. Sultanovun, həm də bu işdə adı hallanan digər şəxslərin mövqeyinə hörmətlə yanaşırıq və tərəflərə bir daha yer ayırmağa hazırıq. Redaksiyanı hansısa tərəfin müdafiəçisinə çevrilməkdə ittiham etməyə əsas yoxdur.

Ana səhifəyə dön