Bakı Apellyasiya Məhkəməsi Yasamaldakı silsilə saxtakarlığa son qoymasa, Konstitusiya Məhkəməsinə şikayət ediləcək

Araşdırma mətbuatın vacib funksiyalarından biridir. Artıq beşinci aydır ki, bəzi KİV-lərdə, eləcə də Reyting.az da “Caspian Service” MMC-nin həmtəsisçisi Rəhim Sultanova qarşı törədilmiş dələduzluq faktı ilə bağlı Yasamal Rayon Polis İdarəsində açılmış cinayət işinə dair yazılar paylaşılır. Cinayət işindəki süründürməçilik, 2015-ci ildən qaldırılmasına baxmayaraq, bu günə kimi nəticəsinin olmaması, işin gah xitam edilməsi, gah da istintaqın gedişatına təzyiqlər barədə məlumatlar verilir.

Bir müddət əvvəl həm KİV-lər, həm də zərərçəkən tərəf bildirirdi ki, məsələ ictimailəşdikdən sonra problem tezliklə qanuni həllini tapacaq. Təəssüf ki, hələ də, Yasamal rayon hüquq-mühafizə orqanlarından ədalətli qərar əldə etmək mümkün olmayıb. Daxil olan məlumatlardan belə anlaşılır ki, rayon hüquq-mühafizə orqanları dələduzluqda təqsirli bilinən şəxsləri məsuliyyətə cəlb etməmək üçün ardıcıl saxtakarlıqlara yol verirlər.

İstintaqda baş verən saxtakarlıq haqqında əvvəlki yazılarımızda məlumat vermişdik. Bu qanunsuzluğun qarşısını almağa cavabdeh olan məhkəmə isə daha da irəli gedərək saxtakarlığa göz yumur.

Murad Məmmədov

Yasamal Rayon Məhkəməsinin hakimi Murad Akif oğlu Məmmədov tərəfindən məhkəmə nəzarəti qaydasında baxılan işdə zərərçəkən Rəhim Sultanova qarşı törədilən qanun pozuntularını və elementar hüquq prosedurlarına əməl edilməməsini diqqətinizə çatdırırıq:

- məhkəmənin 16.11.2021-ci ildə qəbul etdiyi qərar 30.11.2021-ci ildə dəftərxanaya verilib, 01.12.2021-ci ildə poçtla yola salınıb və yalnız 04.12.2021-ci ildə R. Sultanova çatıb. Halbuki, məhkəmə nəzarəti qaydasında baxılan iş üzrə qərarlar təxirəsalınmadan təqdim edilməlidir.

- qərar Yasamal rayon prokuroruna, Yasamal rayon polis rəisinə, müstəntiqə göndərilib. Həmçinin həmin qərar 25.11.2021-ci ildə Elmaz Hüseynova da təqdim edilib. Halbuki, həmin şəxs iş üzrə tərəf deyil və heç bir subyektiv hüququ yoxdur. Həmin qərarı işə aidiyyəti olmayan şəxsə verməklə, məhkəmə təkcə qanunu pozmayıb, eləcə də, Rəhim Sultanovun şikayətini təmin edilmədikdən sonra, süni şəkildə həmin şəxsə şikayət hüququ tanıyaraq, apellyasiya qaydasında da özlərinə sərf edən qərar çıxarılmasına cəhd ediblər. Belə ki, apellyasiya qaydasında işə R. Sultanovun iştirakı olmadan baxılması, Yasamal Rayon Məhkəməsinin qanunsuz qərarının qüvvədə saxlanması məqsədi güdürdü.

- 16.11.2021-ci il tarixdə olan məhkəmənin yekun qərarı həmin günə rəsmiləşdirilsə də, üstündən 18 gün keçdikdən sonra zərərçəkmişə çatıb. Təsəvvür edin ki, həmin qərarı 25.11.2021-ci ildə iş üzrə heç bir hüququ olmayan şəxsə təqdim edəndə də, məhkəmə narahat olmayıb ki, axı qərarı şikayətçiyə və iş üzrə əsas şəxsə göndərməyib. Görəsən bu arxayınlıq məhkəmədə hardandır?

- Yasamal Rayon Məhkəməsində baş verən ən böyük qanun pozuntusu isə məhkəmə iclasında katibin iştirak etməməsidir. Lakin, hakim qərarında göstərib ki, guya katib Emin Kamil oğlu Əlizadə prosesdə katib olub. Bu barədə Məhkəmə-Hüquq Şurasına ayrıca şikayətlər edilib. Belə ki, məhkəmə iclasının audio-video yazısı tədqiq edilən kimi məlum olacaq ki, məhkəmə iclası katibin iştirakı olmadan keçirilib.

- hakim Murad Məmmədov iclasda təqdim olunan vəsatətə münasibət bildirməyib, qərar qəbul etmək üçün müşavirəyə çıxıb və müşavirə otağından qayıdandan sonra isə cinayət işi üzrə şikayətin təmin olunmadığını elan edib. Halbuki, vəsatət cinayət işinin məhkəməyə gətirilməsi ilə əlaqədar olub. Necə ola bilər ki, cinayət işi məhkəmədə tədqiq edilmədən, müstəntiqin xitam qərarının qanuni olub-olmaması barədə hakim qərar versin? Qərar elan edildikdən sonra vəsatətə niyə münasibət bildirmədiyi hakimə irad tutulduqda, o, vəsatətin rədd edildiyini bildirib. Qərar elan edildikdən sonra vəsatətə münasibət bildirməyin əhəmiyyətsiz olduğuna dair təkrar etiraz edildikdə isə, hakim deyib ki, qərarımda mövqeyimi əsaslandıraram. Lakin, qərar əldə edildikdən sonra məlum olub ki, qərarda heç bir əsaslandırma, ümumiyyətlə vəsatətə dair heç nə yoxdur.

Onu da qeyd edək ki, qərarı müşayət edən məktubda məhkəmələrdə kargüzarlıq haqqında təlimata zidd olan münasibət sərgilənib. Belə ki, məhkəmə elementar etik qaydalara riayət etməyib və tərəflərə xitab edərkən ayrı-seçkiliyə yol verib.

Ümumiyyətlə, Yasamal Rayon Məhkəməsinin hakimi Murad Məmmədov tərəfindən qəbul edilən 16.11.2021-ci il tarixli qərarda qanun pozuntularını geniş açıqlamaq bir yazıya sığmır. Pozuntular, azacıq da olsa hüquq savadı olan şəxsdə sual yaradır: - bir qərarda bu qədər səhv edən hakimin məqsədi, qərəzi var, yoxsa elementar bilgisizlikdir?

Fikrimizi təsdiq etmək üçün aşağıdakı saxtakarlıqları diqqətinizə çatdırırıq:

- hakim məhkəmə iştirakçılarını elan etmir;

- iştirakçıların kimliyi və şəxsiyyəti müəyyən edilmir;

- hansı işə baxıldığı bilinmir;

- hakimə və katibə etiraz hüququ izah olunmur, ümumiyyətlə iclasda katib olmur;

- məhkəmə araşdırılması aparılmır;

- işdə olan yuxarı instansiya məhkəməsinin qüvvədə olan qərarı nəzərə alınmır.

Ən əsası, qərardan görünür ki, Yasamal rayon prokurorunun böyük köməkçisi Tural Yaqubov “şikayətin təmin edilməməsini və Yasamal Rayon Rolis İdarəsinin müstəntiqi C. Əhmədov tərəfindən qəbul edilmiş cinayət işinə xitam verilməsi haqqında 25.09.2021-ci il tarixli qərarın qanuni hesab edilməsini” xahiş edib. Halbuki, iclasda iştirak edən prokuror bildirib ki, hazırda cinayət işi Bakı Şəhər Prokurorluğundadır və nəticəsi barədə məlumat yoxdur. Cinayət işi üzrə yuxarı prokurorluğun qərarı olmadan rayon prokurorluğunun mövqe bildirməsi mümkünsüzdür. Bu nə deməkdir? Görəsən, bu qədər qanun pozuntusuna yol verməyə Yasamal Rayon Məhkəməsini nə və ya kim vadar edir?

Məhkəmə iclasında şikayətçi Rəhim Sultanovun əsaslı faktları qarşısında hakim qanunlara istinad etmədən qeyri-müəyyən cavablar verərək qanundan deyil, “praktikadan” danışıb. Bir faktı nəzərinizə çatdıraq: R. Sultanov hakim M. Məmmədova bildirir ki, Bakı Apellyasiya Məhkəməsinin qüvvədə olan qərarına görə cinayət işinə xitam verilə bilməz və həmin qərar qüvvədə olduğu halda, məhkəmə hansı əsasla şikayətimi təmin etməyərək, cinayət işinə xitam verilməsi ilə bağlı qərarı qüvvədə saxlayır? Hakimin cavabı sadə olur: “praktikada belə qərarlar olur…”.

Yasamal Rayon Məhkəməsinin sözügedən qərarından Bakı Apellyasiya Məhkəməsinə, həmçinin hakim Murad Məmmədovun qanunsuz hərəkətlərindən Məhkəmə-Hüquq Şurasına şikayət edilib. Həmçinin, şikayətlərin mətbuatda işıqlandırılması barədə hakimin məlumatı olub. Amma bütün bunlara baxmayaraq, hakim yenə də qanunsuz əməllərini davam etdirib. Şikayətin Apellyasiya Məhkəməsinə göndərilməsinə dair olan prosesdə yenə də katib olmayıb, iclasın aparılması qaydalarına riayət edilməyib, iştirak edən vəkilin izahatı ətraflı dinlənilməyib, həmçinin iş üzrə subyekt olmayan kənar şəxsin də şikayəti təmin edilib. Halbuki, həmin kənar şəxs üzürlü səbəb olmadan prosessual müddəti ötürüb. Belə ki, şikayəti 25.11.2021-ci ildə əldə edən şahid, 3 gün ərzində şikayət verməyib. Belə çıxır ki, hakim Murad Məmmədov tərəfindən qanunların pozulması potoloji hal alıb, ya da ki, hakim qanunsuz işlərə vərdiş edib.

Sonda diqqətinizə çatdırırıq ki, Yasamal Rayon Məhkəməsinin sözügedən iş haqqında məlum qərarından verilən şikayətə Bakı Apellyasiya Məhkəməsində hakim İbrahim İbrahimli tərəfindən baxılacaq. Görəsən, Yasamal Rayon Məhkəməsinin, Yasamal Rayon Prokurorluğunun və Yasamal Rayon Polis İdarəsinin illərdir davam etdirdikləri silsilə saxtakarlığa bu instansiyada son qoyulacaq, yoxsa R. Sultanovun pozulmuş hüquqlarının bərpası üçün Avropa və Konstitusiya məhkəmələrinə müracət etməyə zərurət yaranacaq?

Zəruri qeyd: redaksiya qarşı tərəfin də fikirlərinə hörmətlə yanaşır və mövqeyini ictimailəşdirməyə hazırdır.

Ana səhifəyə dön