Deputat: “Vəkil başa düşməlidir ki, onun rəqibi dövlət deyil...”

“Dekabrın 28-i Azərbaycanda Vəkil Günüdür. Cənab İlham Əliyevin xüsusi diqqətinin nəticəsidir ki, vəkillərimiz artıq 3-cü ildir öz peşə bayramlarını qeyd edirlər. Vəkillərin peşə bayramının qeyd edilməsi dünyada geniş yayılmış bir təcrübə deyil və üstəlik, digər prosessual şəxslər, təhqiqatçı, müstəntiq, hətta hakimlərin ayrıca peşə bayramları olmadığı halda Vəkil Gününün təsis olunması vəkillərin nüfuzunun artırılması istiqamətində ciddi iradə nümayişidir”.

Reyting.az xəbər verir ki, bunu Milli Məclisdə çıxışı zamanı deputat Bəhruz Məhərrəmov səsləndirib.

O, qeyd edib ki, bu gün Azərbaycan vəkilliyi inkişaf dövrünü yaşayır: “Xüsusən, son 4 ildə aparılan islahatlar vəkilliyin simasını müsbət mənada dəyişdirməkdədir”.

Deputat əlavə edib ki, vəkilliklə bağlı problemlər də var: “Vəkillərin pensiya təminatı, ağır vergi və sosial ödəniş yükü, habelə, dövlət hesabına ödənilən məbləğin artırılma zərurəti kimi məsələlər dəfələrlə parlament tribunasından da səsləndirilib və məndə olan məlumata görə, yaxın dövrlərdə bu istiqamətdə ciddi yeniliklər gözlənilir. Həmçinin, vəkilliyə qəbul üçün tələb olunan təcrübənin azaldılması, habelə, cinayət prosesində vəkilə ittiham tərəfi ilə bərabər prosessual imkanların yaradılması kimi ciddi məsələlər həllini gözləyir. Amma bu, qanunvericilik səviyyəsində əsaslandırılıb həll ediləcək məsələdir.

Azərbaycan vəkilliyinin daha ciddi bir problemi var. Bildiyimiz kimi, müdafiəçi, müdafiə etdiyi şəxsin şəxsiyyəti və baxılan cinayət işinin xarakteri ilə eyniləşdirilə bilməz. Vəkil terrorçunu, qulduru da müdafiə edə bilər. Bu o demək deyil ki, onları müdafiə edirsə, vəkil də cinayətkardır. Artıq biz cəmiyyətdə tədricən bu mühiti formalaşdıra bilməkdəyik”.

Deputat təəssüflə deyib ki, bəzi vəkillərimiz özləri hələ eyniləşdirmənin təsirindən çıxa bilmir: “Bəzən görürük ki, vəkil hansısa müxalifət funksionerini müdafiə edərkən özü daha radikal bir müxalifətçiyə çevrilir. Adam müdafiə fəaliyyətini atıb bir kənara məhkəməni siyasiləşdirir, antidövlət kampaniyaları başladır və s. Mən açıq deyim, xaricdən ayrı-ayrı qüvvələrin məhz belə vəkilləri qəsdən qəhrəmana çevirməsi, “dövlətlə döyüşməyin cəsarətli vəkilliyin göstəricisi olması” barədə məqsədli təbliğatı təəssüf ki, bu kimi hallara rəvac verir. Bilirsiz, vəkil başa düşməlidir ki, onun rəqibi dövlət deyil, vəkil ittiham tərəfi ilə çəkişməlidir. Ümumiyyətlə, hər kəs anlamalıdır ki, bu ölkədə dövlət vəkilliyi zəiflətməkdə maraqlı deyil. Baxın, oxşar inkişaf yolu keçən bir sıra dövlətlərdə vəkillik icra hakimiyyətinin tabeliyindədir, hətta, bəzilərində vəkil vəsiqəsini də Ədliyyə Nazirliyi verir. Azərbaycana baxaq, cənab prezidentin 22 fevral 2018 və 3 aprel 2019-cu il tarixli sərəncam və fərmanlarında da müstəqil və güclü vəkillik institutunun formalaşmasında dövlətin marağı ifadə olunur. Bu mənada hesab edirəm ki, bu yersiz düşüncə və cəhdlərdən imtina edib, diqqəti peşəkar fəaliyyətlə yönəltmək işin xeyirinə olar və inanıram ki, belə də olacaq.

Mən çıxışımın sonunda, başda kollegiya sədri, sədr müavinləri, vəkil büro rəhbərləri olmaqla, hər bir vəkilimizi peşə bayramı münasibəti ilə təbrik edir, eyni zamanda vəkilliyin inkişafına ciddi dəstəyinə görə cənab prezidentə təşəkkür edirəm”.

Ana səhifəyə dön