Prokurorluq “Caspian Service”nin həqiqətini ortaya çıxarmaq istəmir

“Caspian Service” şirkətinin kollektivi bir qrup şəxs tərəfindən dələduzluq yolu ilə onlara məxsus əmlakın mənimsənilməsindən şikayətçidir. Bu səbəbdən də “Caspian Service” şirkəti respublika prokurorluğuna yenidən müraciət edərək, cinayət törətməkdə təqsirli bilinən şəxslərin yalanlarına son qoyulmasını xahiş edib.

Bu barədə müxtəlif KİV-lərdə dəfələrlə yazıldığından Reyting.az məsələyə yenidən qayıtmaq istəmir.

Xatırladaq ki, “Caspian Service”nin üzləşdiyi problem barədə 2015-ci ildən cinayət işi qaldırılsa da, hələ də nəticəsi yoxdur. Görünən odur ki, şirkətin həqiqətlərini (tikinti ərazisinə düşən köhnə evlərin köçürülməsi üçün vasitəçi şəxslərə etibar edən şirkət, sökülməsi nəzərdə tutulan mənzilləri onların adına alır, eyni zamanda danışığa əməl edərək barter məqsədilə yeni binada 4 otaqlı lüks mənzili də onların adına rəsmiləşdirir, sonda isə vasitəçilik edənlər həm yeni mənzilə sahib çıxır, həm də köhnə mənzilləri şirkətə təhvil veməkdən imtina edir) heç kəs dinləmək istəmir. Əksinə, cinayət yolu ilə 500.000-lik əmlakı mənimsəmək istəyənlərin yalanı, prokurorluq və məhkəmə tərəfindən bəyənilir. Düzü, heç kəs istəməz ki, onu aldatsınlar, amma prokurorluq və məhkəmə sisteminin yuxarı qatında təmsil olunan bəzi şəxslər, özlərinin belə aldadılmasına yol verirlərsə və buna görə qanunu pozurlarsa, bu, başadüşülən deyil.

Ortada olan qanun pozuntuları və yalanları diqqətinizə çatdırırıq:

25.09.2021-ci ildə xitam edilən cinayət işinin arxa tarixlə rəsmiləşdirilməsi. Belə ki, məhkəmə nəzarəti qaydasında 6(004)113-21 saylı iş üzrə 23.09.2021, 30.09.2021, 08.10.2021 tarixlərinə Yasamal Rayon Məhkəməsində icraatlar olub və hakim Rauf Daşdəmirov tərəfindən, şahidin müstəntiq barədə şikayətinə baxılaraq rədd edilib.

08.10.2021-ci ildə məhkəmə nəzarəti qaydasında qərar qəbul edilərkən, Yasamal rayon prokuroru niyə nəzarət etmirdi ki, axı cinayət işi artıq xitam edilib?

21.10.2021-ci il tarixində “Caspian Service” şirkəti Baş Prokurorluğa müraciət edib ki, cinayət törətməkdə təqsirkar bilinən şəxslər hüquq-mühafizə orqanlarının bəzi vəzifəli şəxsləri tərəfindən himayə edilir. Daha doğrusu, “Caspian Service”nin həqiqətlərinə kimlərsə göz yumaraq, qarşı tərəfin yalanlarına rəvac verir. Həmin müraciətə bu günə kimi cavab verilmir.

Yasamal rayon prokuroru Elman Süleymanova dəfələrlə çoxsaylı şikayətlər edilib ki, 25.09.2021-ci ildə qəbul edilən xitam qərarı prosessual məcəllənin 39.1.2-ci maddəsinə ziddir. Lakin, Yasamal rayon prokuroru 28.10.2021-ci il tarixli cavab məktubu ilə bildirib ki, cinayət işi 25.09.2021-ci il tarixli xitam qərarının qanuni və əsaslı olmasının yoxlanılmasından ötrü 14.10.2021-ci il tarixdə Bakı Şəhər Prokurorluğuna göndərilib. Görəsən, rayon prokuroru nəyə görə cinayət işini şəhər prokurorluğuna göndərir? Axı, onun səlahiyyətləri çərçivəsindədir ki, xitam qərarının qanuni olub-olmamasını yoxlasın. Harda görünüb ki, təqsirləndirilən şəxs qismində cəlb edilməyən şəxsin əməlində tərkib olmasın?

Yasamal rayon prokuroru həm məcəllənin, həm də şikayətlərə cavab verilməsini nəzərdə tutan qanunların tələblərinə riayət etmədən, sadəcə cinayət işini yuxarı prokurora göndərməklə başından rədd edib. Qanuna görə prokuror, təhqiqatçının və ya müstəntiqin qanunsuz və əsassız qərarlarını ləğv edə bilər. Lakin, Yasamal Rayon Prokurorluğu qanunun verdiyi bu səlahiyyəti icra etmək istəməyib.

Təkidli müraciətlərdən sonra Yasamal rayon prokurorunun müavini Rəşadət Orucov 10.11.2021-ci il tarixli cavab məktubu ilə bildirib ki, cinayət işi Yasamal Rayon Prokurorluğunda öyrənilib, həmin qərarın ləğvi üçün əsaslar olmayıb və qüvvədə saxlanılıb. Halbuki, bundan əvvəlki 15.10.2021-ci il tarixli məktubda bildirilir ki, cinayət işi qəbul edilən 25.09.2021-ci il tarixli xitam qərarının qanuni və əsaslı olmasının yoxlanılmasından ötrü 14.10.2021-ci il tarixdə Bakı Şəhər Prokurorluğuna göndərilib. Necə olur ki, cinayət işi Bakı Şəhər Prokurorluğunda olduğu halda, rayon prokurorluğu onu öyrənir və barəsində qərar qəbul edir? Görünən odur ki, Yasamal Rayon Prokuroluğunun rəsmi məktubları da həqiqəti əks etdirmir və qanuna söykənmir?

Qanunun tələbinə görə xitam qərarının qanuniliyi həm şəhər prokurorluğunda, həm də məhkəmədə yoxlanılıb qərar qəbul edilə bilər. Mövcud vəziyyət isə ondan ibarətdir ki, cinayət işi 14.10.2021-ci ildən şəhər prokurorluğundadır. 21.10.2021-ci ildən olan şikayətlərə cavab isə yoxdur. Həmçinin 28.12.2021-ci ildə Bakı Apellyasiya Məhkəməsində cinayət işi öyrənilmək üçün tələb edilib. Belə çıxır ki, cinayət işi 2 ay yarım şəhər prokurorluğunda (və ya Baş prokurorluqda) qalsa da, yekunda qanuna müvafiq qərar qəbul edilməyib. Həmçinin, şəhər prokurorluğundan (və ya Baş prokurorluqdan) məhkəməyə gətirilən cinayət işi üzrə prokurorluğun məhkəmədə mövqeyi necə olacaq? Şəhər prokurorluğu necə deyəcək ki, xitam qərarının qanuni olub-olmamasını yoxlamaq üçün cinayət işini 2 ay yarım özümüzdə saxladıq, amma qərar qəbul edə bilmədik?

Göründüyü kimi, dələduzluq yolu ilə şirkətin külli miqdarda vəsaitini mənimsəmək istəyən şəxslərin əməllərinin yalan üzərində qurulmasına baxmayaraq, bu günə kimi səlahiyyətli orqanlar qanuna müvafiq olaraq qərar qəbul etmək istəmir. Qanunun keşiyində durmağa məsul olan orqanlar, sadəcə bir həqiqəti ortaya çıxarmaq istəmirlər ki, kim yalan danışır, kim isə həqiqəti deyir.

Ana səhifəyə dön