Şamaxı Rəsədxanasında xidməti mənzillər kənar şəxslər tərəfindən tutulub

“İndiyə qədər Şamaxı Astrofizika Rəsədxanasının həlli çox vacib olan infrastruktur problemi - onun Bakı şəhər bölməsinin (institunun) bu vaxta qədər normal təşkil olunmamasıdır. Rəsədxana yaradıldığı vaxtdan (1959) onun Bakı şəhər bölməsi də təsis edilib və hazırda da mövcuddur”.

Bunu AMEA Şanaxı Astorfizika Rəsədxanasının icraçı direktoru, professor Nəriman İsmayılov “Şamaxı Astrofizika Rəsədxanası: Müasir vəziyyəti və problemləri haqqında” müraciətində bildirib.

O qeyd edib ki, bu bölmənin stabil binası (iş yeri) heç vaxt olmadığından Rəsədxana həmişə sosial problemlərlə, kadr itkisi və digər təşkilati problemlərlə üzləşib: “Hazırda Bakıda şəhər bölməsi kimi iş yerimiz AMEA-nın əsas binasında (H.Cavid prospekti), qüllələrdən birində - Coğrafiya İnstituna məxsus olan, 10-11-ci mərtəbələrdə yerləşən, texniki məqsədlər üçün nəzərdə tutulmuş otaqlarda uyğunlaşdırılıb. Həmin otaqlarda su və sanitar qovşağın olmaması, qış aylarında çox soyuq, yayda isə çox isti olması, hər otaqda 10-dan çox əməkdaşın yerləşməsi nəticəsində elmi, elmi-təşkilati, təhsil və digər fəaliyyət üçün şərait yoxdur. Bununla bağlı ayrı-ayrı vaxtlarda AMEA rəhbərliyinə dəfələrlə müraciətlər edilməsinə baxmayaraq, bu məsələ hələ də öz həllini tapmayıb. Son vaxtlar problemin həll edilməsi üçün AMEA Prezidenti akademik Ramiz Mehdiyevə də tərəfimizdən müraciət edilib. Ramiz müəllim bu məsələnin nə qədər vacib olduğunu düzgün dəyərləndirərək onun həlli istiqamətində xüsusi göstəriş verib. Çox ümid edirik ki, onun göstərişi ilə bu məsələ nəhayət ki, yaxın vaxtlarda öz həllini tapacaq”.

İcraşı direktor vurğulayıb ki, coğrafi baxımdan Rəsədxana ərazisinin sərt iqlim şəraitində yerləşməsi (dəniz səviyyəsindən 1500 m hündürlükdə ilin 6-7 ayında havanın qarlı, şaxtalı, yağışlı, küləkli və dumanlı keçməsi) yaradılmış infrastrukturun istismarını, qorunub saxlanmasını, inkişafını çətinləşdirir və Rəsədxana üçün ciddi maliyyə problemləri yaradır: “Belə ki, illər ötdükcə tikililərdə və Rəsədxanaya xidmət göstərən texniki avadanlıqlarda baş verən nasazlıqların vaxtaşırı aradan qaldırılması zərurəti yaranır. Cari təmir işlərini, nəqliyyatın, avadanlıqların təmirini və yenilənməsini, təsərrüfat sektorunu normal vəziyyətdə saxlaması üçün maliyyə dəstəyinə daim ehtiyac yaranır. Astroturizmin təşkili və bundan əldə olunan vəsaitin bu problemlərin həllinə yönəldilməsi vəziyyətdən çıxış yolu kimi qiymətləndirilməlidir. Lakin son illərdə bir sıra vacib sosial yönümlü problemlər tərəfimizdən həll olunsa da, yarımçıq qalmış və tamamilə həll edilməmiş məsələlər də var. Bunlardan məhdud sayda olan xidməti mənzillərin rəsədxanaya aidiyyəti olmayan şəxslər tərəfindən tutulması, Rəsədxananın içməli su ilə təminatı, kanalizasiya üçün təmizləyici qurğunun tikilməsi, yolların asfalt örtüyünün və səkilərin dağılması, istilik-kommunikasiya xətlərinin tam erroziyaya uğraması, ərazinin mühafizəsi ilə bağlı bir-sıra problemlər, kottec və yaşayış binalarının cari təmiri və s. kimi işlər göstərilə bilər”/APA.

Ana səhifəyə dön