Türkiyə universitetlərinə qəbulda ciddi problemlər yaranıb

Reklamlardan və sosial şəbəkələrdəki paylaşımlardan görünür ki, Azərbaycan gənclərinin böyük maraq göstərdiyi qardaş Türkiyə universitetlərinə qəbul başlayır və tezliklə xarici vətəndaşlar üçün imtahanlar keçiriləcək. Bu imtahan YÖS (yabançı öğrenci sınavı) adlanır. İmtahanı hər universitet özü keçirir. Ali məktəblərə sadəcə attestatla qəbulla bağlı da çoxlu elanlar verilir. Amma qəbulda ciddi problemlərin olduğu da bildirilir.

Reyting.az-ın əməkdaşı vəziyyəti öyrənmək üçün YÖS hazırlığına gedənlər, onların valideynləri və bu sahədə çalışan - xaricdə təhsil xidmətinin əməkdaşları ilə görüşərək problemlərlə maraqlanıb.

Məlum olub ki, Türkiyə universitetlərinə qəbulla bağlı ciddi problemlə yaranıb və narazılıqlar var. Yaranmış problem şagird və valideynləri ciddi şəkildə narahat edir.

Ötən ilin sonunda ayrı-ayrı universitetlərin keçirdiyi YÖS imtahanı artıq ləğv olunub. Yüksek Öğretim Kurumunun (Ali Təhsil Qurumunun) – YÖK-ün keçirəcəyi Mərkəzi YÖS sınavı olacağı deyilir. Universitetə SAT imtahanı balı ilə qəbula hazırlaşanlar indi YÖS imtahanına hazırlaşmaq məcburiyyətində qalıblar. Bunu da anlamaq olar, çünki imtahanların məzmunu fərqlidir. Amma bir müddət keçəndən sonra qərar dəyişib. İlin ortasında verilən və ortasında ləğv edilən qərar bu işdə maraqlı olan şəxslərə mənfi yöndə təsir göstərib.

Türkiyə universitetləri tələbələri həm də SAT imtahanı balı ilə qəbul edir. Hər kəs deyir ki, Azərbaycanda və bütün dünyada çoxlu saxta SAT imtahan nəticələri dolaşır. Azərbaycanda isə 1400-1500 balı olan çoxsaylı abituriyent var. Az pula bu imtahan nəticəsini almaq olurmuş. Bu haqda şikayətlər imtahanı keçirən ABD təşkilatına bəllidir. Onlar isə problemi həll etmək üçün onlayn imtahan sisteminə keçiblər.

YÖS imtahanlarına gəlincə, bu sahədə də çoxlu problemlər mövcuddur və bu, insanlarda inamsızlıq yaradır.

Ankara Universiteti kimi nüfuzlu bir ali məktəb hər il YÖS imtahanı keçirir, amma əksər reytinqli proqramlara YÖS-lə kimsəni qəbul etmir, qəbulun necə keçirildiyi isə açıqlamır, imtahan sualları qəsdən bilik və İQ bacarıqlarına uyğun gəlməyən çətin suallarla doldurulur.

Məlumata görə, çox sayda universitet imtahan keçirmir və onların qəbulu şəffaf deyil. Hətta imtahan keçirən bəzi universitetlərdə də qəbulun qeyri-şəffaf olması barədə iddialar səslənir.

Qeyd edək ki, bu il bir neçə universitet onlayn imtahan elan edib. Üstündən xeyli müddət keçmiş YÖK-də bir məmur qərar verib ki, onlayn imtahan olmaz! Halbuki Adnan Menderes Universiteti illərdir onlayn imtahan keçirir. Onlayn imtahan olmayacaqdırsa, bu, öncədən elan olunmalı idi. Yeni qərar isə bir çox problemlərə səbəb olub.

Şagirdlər deyir ki, Türkiyədə ən şəffaf qəbul imtahanı keçirən birinci universitet “Uludağ”dır. Bütün öhdəliklərini yerinə yetirir, heç zaman əyriliyə yol verməz. Bu il onun onlayn imtahanı ləğv olunub, imtahanlar başqa imtahanlarla bir günə salınıb. Şagirdlər isə əvvəlcədən başqa imtahanlara da qeyd olunub, pulunu da ödəyiblər. Nəticədə çıxılmaz vəziyyət yaranıb.

Elə gün var ki, 4 universitetə imtahan olacaq. Təqvimdə heç bir tənzimləmə yoxdur, YÖK illərdir bunu həll etmir.

Bu ilin ən çətin problemlərindən biri odur ki, imtahanlar elan olunub, amma hansı proqramlara yer olduğu açıqlanmayıb. Elanda yazıblar ki, bunu YÖK-ün qərarından sonra bəyan edəcəklər. Halbuki insanların bunu öncədən bilməsi daha yaxşı olardı.

Digər problem oldur ki, demək olar, hər il təhsil haqları çox böyük fərqlə artırılır. Amma imtahan keçirən universitetlər bunu öncədən elan etmir. Yenə də YÖK-ün qərarından sonra olacağını deyirlər. Halbuki bunu da öncədən elan etmək mümkündür.

Valideynlər və şagirdlərdə bu problemlər görə böyük ümidsizlik, narazılıq yaranıb. Onlar deyirlər ki, Türkiyəyə sevgiləri böyük olduğu üçün bir çox problemləri dilə gətirməyi özlərinə rəva görmürlər. Amma bu problemlər Türkiyənin özünə ziyan vurur. Onlar qardaş Türkiyənin səlahiyyət sahiblərindən və YÖK-dən bu problemlərin həllini gözləyirlər.

Ana səhifəyə dön