Milyarderin və ailə üzvlərinin müəmmalı qətli - Polis müxtəlif versiyalar üzərində çalışır

Vladislav Avayev

Rusiyanın aparıcı simalarından biri, bir vaxtlar Kremldə yüksək səviyyəli menecer olan və Putinə yaxınlığı ilə tanınan milyarder Vladislav Avayev iki gün əvvəl Moskvadakı evində həyat yoldaşı və qızı ilə birlikdə ölü tapılıb. Polis rus oliqarxın əvvəlcə həyat yoldaşını və 13 yaşlı qızını öldürüb intihar edə biləcəyi versiyasına diqqət yetirərkən, qonşuları hadisənin qətl ola biləcəyini düşünürlər.

Reyting.az-ın məlumatına görə, Rusiyanın aparıcı banklarından olan “Qazprombank”ın keçmiş vitse-prezidentinin ölüm hadisəsinin Ukrayna ilə müharibə və Rusiyaya sərt sanksiyalardan rus oliqarxların narazı olması fonunda baş verməsi də diqqət çəkir.

Moskva polisi həmçinin bildirib ki, 51 yaşlı multimilyonçu Avayevin cəsədi onun 47 yaşlı hamilə həyat yoldaşı və 13 yaşlı qızı Marianın yanında tapılıb. Onların meyiti böyük qızları Anastasiyanın evə gəlməsi nəticəsində aşkar edilib.

Meyitlərin üzərində güllə izləri aşkar edilərkən, silahın Avayevə məxsus olduğu və həmin vaxt onun əlində olduğu qeyd edilir. Bu səbəbdən də polis, milyonçunun əvvəlcə həyat yoldaşını və qızını, sonra isə özünü güllələməsi versiyasına üstünlük verir. Hadisənin Avayevin iş və şəxsi həyatı ilə bağlı hər hansı əlaqəsinin olub-olmadığı da araşdırılır.

Anastasiya deyib ki, cəsədi tapanda silah atasının əlində olub.

Xatırladaq ki, Avayev əvvəllər Putinin xarici şirkətlərdən bankda hesab açmasını tələb etdiyi “Qazprombank”da yüksək vəzifədə çalışıb. İnşaat işlərindən isə milyonlar qazanıb.

Rusiya mətbuatında yer alan bir versiyaya görə, Avayevin qətli törətməsinə səbəb qısqanclıq ola bilər. Müvafiq olaraq, Avayevin arvadı Yelena onu sürücüsü ilə aldadıb və ondan hamilə olub. Bunu öyrənən rus milyonçu vəziyyəti qəbul edə bilməyib və həyat yoldaşını öldürüb.

Polis hadisə ilə bağlı istintaqın davam etdiyini bildirərkən, Avayevin evinin qonşuluğunda yaşayan Kristina adlı şəxs deyib ki, üç güllə və qışqırıq eşidib: “Bir qadın qışqırırdı. Daha sonra daha iki atəş açıldı. Daha səs-küy eşitmədim”.

Başqa bir qonşu isə deyib: “Bəlkə də sanksiyalara görə oldu. Hamı depressiyadadır, bəziləri hətta həddindən artıq tədbirlər görməyə başlayıb”.

O, sanksiyaların və iqtisadi tənəzzülün onun biznesinə zərbə vura biləcəyini irəli sürüb.

Başqa biri isə iddia edir ki, çox güman onun borcu olub və bu səbəbdən intihar etmək qərarına gəlib: “Amma onun bunu etmək üçün heç bir səbəbi yox idi. O, varlı idi, ağıllı idi. Belə bir insanı öldürmək olmaz. Ola bilsin ki, Avayev və ailəsi kimsə tərəfindən öldürülüb”.

Ana səhifəyə dön