40 ilin sirrini açmaq istəyirlər

Papaya sui-qəsdə cəhd edən Ağcanın “dəyişdirmədə”' istifadə etdiyi iddia olunan Emanuela Orlandı ilə bağlı “sirr pərdəsi” 40 ildir ki, qaldırılmır. Hətta mafiya və pedofiliya qalmaqalları ilə əlaqəli olan şahzadələrin məzarları açılsa da. Almaniyanın “Bild” qəzeti isə onun bir müddət Türkiyənin Dənizli şəhərində yaşadığını iddia etsə də, 40 ilin sirri hələ də açılmayıb.

Reyting.az vaxtilə dünya mətbuatının gündəminə çevrilmiş bu məsələ ilə bağlı məqamları təqdim edir:

22 iyun 1983-cü il. İtaliyanın paytaxtı Romada 15 yaşlı qız itkin düşür. Vatikan məmurunun qızı Emanuela Orlandı musiqi dərsinə getmək üçün evdən çıxıb və bir daha geri qayıtmayıb.

14 yaşlı qızın itməsi, qısa müddətdə Katolik xristianların lideri Papa II. Paula sui-qəsdə cəhd edən Mehmet Ali Ağca məsələsinə qədər uzanıb.

3 may 1981-ci ildə Vatikanın San Pietro meydanında Papanı güllələyən Mehmet Ali Ağca hücumdan sonra həbs edilib. Ağca Emanuela Orlandın sui-qəsd cəhdindən sonra azadlığa buraxılması üçün girov götürüldüyünü bildirib. Hətta sonrakı illərdə gənc qızın Türkiyədə olduğu iddia olunub.

İtkin qızın məsələsi illər boyu sirr qalıb, ailəsi Emenuelanın tapılması üçün döymədiyi qapı qalmayıb.

2011-ci ilin iyununda yayılan səs yazısı İtaliyanı sanki silkələyib. Söhbət Mehmet Ali Ağcanın Emanuela Orlandın böyük qardaşı Pietro Orlandı ilə bir saatlıq təkbətək görüşündən gedirdi. Mehmet Ali Ağca qızın Vatikan hökuməti tərəfindən qaçırıldığını, onda bu haqda qəti dəlil olduğunu iddia edib. Bildirib ki, planın icrası CIA, ABŞ Gizli Xidməti və SISMI, İtaliya Gizli Xidməti ilə birlikdə həyata keçirilib.

Ağca görüş zamanı Vatikanın hadisədə rolunu bilən şəxs kimi kardinal Giovanni Battista Renin adını çəkib. Amma yenə real nəticə əldə edilməyib.

Hadisə 2019-cu ildə yenidən dünya mətbuatının gündəminə qayıdıb. Orlandın yoxa çıxmasından 36 il sonra ailəyə məktub göndərilib. Məktubda Orlandın cəsədinin Vatikandakı alman qəbiristanlığında tapılacağını, “Rahat yat”, - yazısı olan bir mələk fiqurunun tapıldığı bildirilib.

Şübhələrdən sonra Vatikan ərazisindəki qəbiristanlıqda iki alman şahzadəsinin məzarı açılıb. Qazılan məzarlar 1836-cı ildə vəfat etmiş şahzadə Sofi fon Hohenlohe və 1840-cı ildə şahzadə Karlotta Federika di Meklemburqoya aid olub. Lakin məzarlarda nə Orlandın izləri, nə də şahzadələrin sümükləri olub. Şahzadə Sofinin məzarının 12 kvadratmetrlik boş bir otağa açıldığı da anlaşılıb.

Orlandı ilə bağlı digər iddia isə onun mafiya lideri Enriko De Pedis tərəfindən öldürülməsidir. Bu səbəbdən daha əvvəl De Pedisin məzarı açılıb, lakin heç bir dəlil tapılmayıb.

2022-ci ilin son aylarında Emanuela Orlandı davası onlayn serial və kino platformasında yayımlanan sənədli filmlə yenidən dünya gündəminə gəlib. Müasir tarixin ən müəmmalı hadisələri arasında öz yerini tutan Orlandın yoxa çıxması mafiya və məxfi xidmət çəkişmələri, həmçinin Soyuq Müharibə dövrünün siyasi münaqişələri, Vatikanın çirkli pulların yuyulması əməliyyatları ilə əlaqələndirilir.

İddialardan biri də Roma mafiyası Magliana Gang-ın Vatikan bankı vasitəsilə pulların yuyulması, lakin pul itirən mafiyanın Vatikana təzyiq etmək üçün Orlandı qaçırması olub.

Digər iddia qızın Vatikan rəsmisi tərəfindən təcavüzə məruz qalması və pedofiliya qalmaqalının qurbanı olmasıdır.

Vatikandan izahat gözləyən böyük qardaş Pietro Orlandı, indiki Papa Fransiskin ailəyə “Emanuela səmadadır”,- dediyini söyləyib.

Vatikan 9 yanvar 2023-cü il Bazar ertəsi günü Emanuela Orlandın yoxa çıxması ilə bağlı yeni təhqiqat aparılacağını bildirib. Vatikan məhkəmə sistemində Baş Prokurorluq ofisi ilə üst-üstə düşən Ədalətin Təşviqi Bürosu Orlandı işi ilə bağlı faylları, sənədləri və ifadələri yenidən araşdıracaq. Prokurorluq ilk mərhələdə Emanuela Orlandının böyük qardaşı Pietro Orlandın etdiyi müraciətləri qiymətləndirəcək.

Onu da qeyd edək ki, gənc qızın yoxa çıxması Katolik Kilsəsini və İtaliyanı 40 ildir təqib edir.

Reyting.az

Ana səhifəyə dön