Türkiyəli iş adamı Bakıda otel əməkdaşlarına kələk gəlib

Bakı şəhərindəki “Metro Citi” otelini təşkil edən bir qrup peşəkar otel personalı Azərbaycan Respublikasının Prezidenti cənab İ. Əliyevə, I vitse-prezident xanım M. Əliyevaya, Prezident Administrasiyasının rəhbəri cənab R. Mehdiyevə və digərlərinə (F. Ələsgərova, S. Babayevə, Ə. Qarayevə, Ş. Mustafayevə, E. Özorala, E. Süleymanovaya, Z. Qaralova, R. Usubova, M.Cabbarova və başqalarına) müraciət ediblər.

Yaqub Əzizov, Təhmasib Həmidzadə, Rüstəm İbrahimov, Rəfael Rzayev, Nizami Qasımov, Fərid Quliyev, Özal Əliyev, Nəzifə Abbasova, Sevil Hacıyeva və Nəbi İsayevin müraciətinə səbəb “Azəri Türk” otellər qrupunun rəhbəri olmuş Türkiyə vətəndaşı Murad adlı şəxsin onların hüquqlarını kobud şəkildə pozmasıdır.

Şikayətçilər Reyting.az-ın redaksiyasına da təqdim etdikləri müraciətlərində yazırlar ki, bir qrup peşəkar otel personalı kimi onları Nərimanov rayonu, Fətəli Xan Xoyski küçəsi, 157 ünvanında yerləşən yeni açılacaq “Metro City” otelinin təşkili və açılışı üçün dəvət ediblər. Dəvət edən “Azəri Türk” otellər qrupunun rəhbəri olmuş Türkiyə vətəndaşı Murad bəyin (soyadı yazılmayıb) dostu Mehmet Ayan olub:

“Bizi - oteldə işləyəcək peşəkar personalı yığaraq son ay yarım ərzində gecə-gündüz işlətdilər ki, “Metro City” otelinin çatışmayan işlərini avqustun 16-na kimi başa çatdıraq. Şəxsi vəsaitimizlə nəqliyyat, qidalanma, rabitə və s. üçün tələb olunan müxtəlif xərcləri qarşıladıq ki, gələcəkdə oteldə işimizi rahat davam etdirə bilək.

Təəssüflər olsun ki, otelin açılmasına bir gün qalmış (15 avqustda) Murad adlı şəxs “Riyad” Mühafizə Xidmətinin əməkdaşları və əvvəldən planlaşdırdığı işçilərlə birlikdə otelə daxil olaraq bütün depertament rəhbərlərinə qəbuledilməz və ağır şərtlər irəli sürdü. Belə ki, personalın iş yükünün 15 saata qədər artırılmasını, məvacibin 50 faiz azaldılmasını, əvvəlcədən təlim və treyninq görmüş peşəkar heyətin ən azı yarısının saxlanmasını depertament rəhbərlərinə tapşırdı. Biz - otel sisteminin peşəkarları olaraq belə əsassız, beşulduz otel standartlarına cavab verməyən və yaraşmayan məntiqsiz tələbə qəti etirazımızı bildirdik. Bu zaman hər gün otelə gəlib, gördüyümüz işlərə görə bizə “Allah köməyiniz olsun!”,- deyib, bizi müşahidə edən Murad adlı şəxs bizi tanımadığını və bizə gördüyümüz işlərin qarşılığında borcunun olmadığını bildirdi. O, bu iş üçün hazır kadrlarının olduğunu bildirərək “Riyad” Təhlükəsizlik Xidmətinin əməkdaşlarına bizi (xanım və bəy qarışıq) dərhal oteldən uzaqlaşdırmağı əmr etdi. Biz isə bunun qarşılığında, otel təcrübəsi kasad olan, mədəniyyəti, qabiliyyəti, savadı olmayan Murad adlı bu şəxslə heç vaxt işləyə bilməyəcəyimizi diqqətə çatdırıb, əziyyət çəkib “Metro City” otelini tam hazır vəziyyətə gətirdiyimiz günlərin haqqının dərhal ödənilməsini tələb etdik. Murad isə “Sizi işə mən dəvət etməmişəm, sizi tanımıram və heç nə vermirəm”,- cavabını verdi”.

Müraciət müəllifləri yazır ki, bu cavabdan sonra “Riyad” Mühafizə Xidmətinin əməkdaşları ilə qarşıdurma yaranmaması üçün əvvəlcə yerli polisə müraciət etməyi qərara alıblar:

“Oteli kor-peşman tərk etdikdən sonra qərara gəldik ki, Muradın bizə qarşı törətdiyi özbaşnalığın və dələduzluğun qarşısının alınması üçün AHİK sədri cənab Səttar Mehbalıyevə müraciət edək, məsələnin həllində bizə köməklik göstərsin. Bunun üçün 17 avqust tarixində müraciət etsək də, bu günədək şikayətimizə reaksiya verilməyib. Sadəcə, Murad bu müraciəti də “yola vermək” üçün bizi 25 avqust tarixində “Metro City” otelə dəvət etdi və yenə də “növbəti günlər gələrsiz”,- xəbərini göndərməklə bizi get-gələ saldı.

Növbəti gün otelə daxil olduqda şahidi olduğumuz mənzərə qarşısında sanki şoka düşdük. Belə ki, Mədəniyyət Nazirliyinin Qiymətləndirmə Komissiyası tərəfindən beşulduzlu otel statusu alan “Metro City”ni, Murad bəyin əvvəl bizə təqdim etdiyi “peşəkarlar” işlədə bilmədiyi üçün məcbur qalıb hansısa dönərçiyə icarəyə veriblər. Yəni, standartlara uyğun qurduğumuz oteldə tələb olunan qaydalardan əsər-əlamət qalmamışdı və kafe səviyyəsində xidmət göstərirdi. Oteldəki otaqlardan yalnız qonaq otağı və ofis kimi istifadə olunur. Hər tərəfdə natəmizlik, səliqəsizlik vardı, yüksək xidmətdən söhbət gedə bilməzdi”.

Şikayətçilər dövlət başçısının və digər rəhbər şəxslərin diqqətinə çatdırıblar ki, Türkiyəli iş adamının onlara qarşı planlaşdırdığı bu hərəkət etibardan və peşəkarlıqdan sui-istifadədir: “Yəni bizim qurub-yaratdığımız iş başa çatdıqdan sonra o, öz təcrübəsiz adamlarını bizim əvəzimizə rəhbəri olduğu otelə, bizim zəhməthaqqımızı belə vermədən təyin edib, oteli isə əvvəl və indi idarə etdiyi otellərin – “Hotel 28 Baku”, ”Gorgud time”, ”Oscar”, “Riva”, ”Sarg Plaza”, “Iva”, ”Old Baku” kimi pis gününə salıb. O, bizim peşəkarlığımızdan sui-istifadə etməklə, həm də bizə qarşı dələduzluq əməli törətmişdir.

Eyni zamanda, adları sadalanan və hansısa şəxslərin Murada həvalə etdiyi bu otellərdə də xarici vətəndaşları (Türkiyə və Pakistandan olan) işə qanunsuz cəlb etməklə qul kimi işlədir, vergi və gömrük rüsumlarından yayınmalar baş verir, özünə layiq təcrübəsiz işçiləri 15 saat, həm də az əməkhaqqı ilə istismar edirlər. Bunun nəticəsində, xidmətin keyfiyyəti aşağı düşür və otellərin imicləri zərbələr altına qalır”.

Müraciət müəllifləri sonda qeyd ediblər ki, 10 günlük qısa tarix sübut edib ki, əslində Murad Bakı şəhərində rəhbəri olduğu 15-ə yaxın otellər qrupunun hamısını pis günə qoymaqda və Azərbaycanda turizmin inkişafına zərbə vurmaqda davam edir:

“Murad vəzifəli şəxslərə güvənərək istər rəhbəri olduğu otelləri pis günə qoymaqla, istərsə də bizim gördüklərimiz iş və xidmətlərin haqqını ödəməkdən imtina etməklə biz otel personalına qarşı maddi və mənəvi zərər vurur.

Cənab Prezident! Sizdən xahiş edirik ki, Azərbaycanda turizm sektorunun inkişafına pul qazanmaq hərisliyi ucbatından ciddi ziyan vuran və vurmaqda davam edən “Azəri-Türk” otellər qrupunun rəhbəri olmuş, otelçilikdən xəbəri olmayan Murad adlı xarici vətəndaşın son beş il ərzində rəhbəri olduğu otellərdəki qanunsuz fəaliyyətin, vergidən yayınmaqla topladığı vəsaitin hansı təyinat üçün xəclədiyinin araşdırılmasına və biz otel pesonalına vurduğu maddi və mənəvi ziyanın dərhal ödənilməsi üçün aidiyyatı təşkilatlara göstəriş verəsiniz”.

Reyting.az

Ana səhifəyə dön